Evangeliumo kathar o Mate
8. fejezet
Le lepralesko sastyaripe
1. vers
Kana pale tele avilas pa plaj, but manusha avile pala leste.
2. vers
Haj aketa, kothe avilas jekh lepralo, changa das angla leste, haj kodo phendas: „Raja, te kames, shaj uzhares man!”
3. vers
O Jezush avri lunzhardas pesko vast, leste reslas, haj kade das duma: „Kamav, av uzho!” Pe kado kuko atunchi uzho kerdyilas kathar e lepra.
4. vers
Atunchi o Jezush kodo phendas leske: „Lesama, khanyikaske na vorbin pa kado, ba zha haj sikav tut le rashajeske haj inbisar opre dimata, so o Mozesh vladisardas, po chacharipe lenge.”
O Kafarnaumicko shelari
5. vers
Kana pale andre gelas ando Kafarnaumo, kothe gelas leste jekh shelari, haj mangelas les:
6. vers
„Raja, muri sluga ande muro kher pashjol bi mishkisardes, haj zurales bare dukha siles.”
7. vers
Kodo phendas leske: „Zhav haj sastyarav les.”
8. vers
Ba o shelari kade das palpale duma: „Raja, chi som dosta, ke ande muro kher te aves, ba numa jekha vorbasa phen, haj sastyol muri sluga.
9. vers
Ke vi me tala saktimo inkerdo manush som, telalutne ketani slugin vi mange, haj kodo te pheno jekheske: »Zha!«, zhaltar, bake le kavereske »Av«, kothe avel, mure slugaske pale: »Ker kado«, kerelles.”
10. vers
Kado ashundes o Jezush bari dikhlas, haj kado phendas le manushenge, kon lesa inkrenas: „Amen, phenav tumenge: ando Izrael chi arakhlom kabor patyape khanyikaste.
11. vers
Phenav tumenge: But zhene avna pa oriento haj pa okidento, haj vatra malavena le Abrahamosa haj le Izhakosa haj le Jakobosa ande rajosko them.
12. vers
Le themeske shaven pale avri shudena ande avralutni tunyarikimata. Avla kothe rovjipe haj dand kircipe!”
13. vers
Pala kado o Jezush kade das duma kaj o shelari: „Zha, haj t«avel kade, sar patyajlan.” Haj sastyilas leski sluga ande kodo chaso.
Le Petereski sokrako sastyaripe
14. vers
Kana pala kado o Jezush andre gelas ande Peteresko kher, dikhelas, ke kodaleski sokra pashjol haj nasvali si.
15. vers
Kaj lako vast reslas, pe soste mukhlas la o nasvalipe. Opre ushtyilas haj opre slugisardas leske.
Le bengalenge haj le nasvalengo sastyaripe
16. vers
Kana andre ratyilas, kothe andine leste bute bengale manushen. Avri nashadas peska vorbasa le duhon, kodalen pale kas varisoske dukha sas, sastyardas,
17. vers
ke kade andre te pherdyon, so o Izajash profeta phendas:
»Voj amare slabimata pe peste las,
haj amare nasvalimata phiravelas«
Pala Jezush zhape
18. vers
Kana dikhlas, ke soske but manusha len les krujal, kodo vladisardas te zhan perdal pe kaver dolma.
19. vers
Atunchi kothe gelas leste jekh iskiritori, haj kodo phendas leske: „Maistro, zhav pala tute, zhikaj feri zhas.”
20. vers
O Jezush kado phendas leske palpale: „Le hilpan sile gropa, le chereske chiriklyan pale kujbo sile, ba le Manusheske Shaveske naj kaj tele te shol pesko shero.”
21. vers
Mashkar leske sityarde jekh pale kado manglas lestar: „Raja, mukh mange majanglal te zhavtar, haj te shaj praxosarav mure dades.”
22. vers
Ba o Jezush kodo phendas palpale leske: „Av pala mande, mukh pe mule, te praxon penge mulen.”
Le tufanesko tele pacharipe
23. vers
Kana andre hulyisardas ando bero, kade kerdine vi leske sityarde.
24. vers
Haj aketa, kasavo baro tufano kerdyilas pe mara, ke ando bero andre marenas le plemeni. Voj pale sovelas.
25. vers
Kothe aviline haj opre ushtyadine les: „Raja, muntusar amen, ke xasajvas!”
26. vers
Voj kodo phendas lenge: „Sostar sanle daramne, tume cine patyamne?” Pala kodo opre tordyilas, duma das pe balvaja haj pe mara, haj baro pachipe kerdyilas.
27. vers
Le manusha pale bari dikhline haj kade denas duma: „Kon si kado, ke inke vi le balvaja haj vi e mara mukelpe leske?”
Le gadaricka bengalenge sastyarimata
28. vers
Kana perdal resline pe kaver dolma, pe gadarenge phuva, angla leste avile duj bengale. Anda murmuntura aviline avri, anda kado khonyik chi tromalas pe kodo drom te phirel.
29. vers
Haj kodal aketa, kade cipinas: „So grizha si amen tute, Devlesko Shavo? Anda kodo avilan kathe, ke angla e vrama te dukhares amen?”
30. vers
Dur lendar jekh balengo kethanipe sas pe mal.
31. vers
Le beng mangenas les: „Avri te nashavesa amen, bishal amen ande balengo kethanipe.”
32. vers
Kodo phendas lenge: „Zhantar.” Kodal avri geline, haj andre huraldine ande balende. Haj aketa, tele nashlas o intrego kethanipe, tele pa mal ande mara, haj tasadyiline ando paji.
33. vers
Le balara pale nashletar ando foro, haj ingerdine e viaca, ke so pelaspe le bengalenca.
34. vers
Haj aketa, o intrego foro avri avilas angla o Jezush. Kana dikhline les, mangenas les, ke te zhaltar pe kaver phuva anda lengi granica.
Könyvek
