Lil le efezushenge

Fejezetek:

1 2 3 4 5 6

1. vers

O Pal anda Devlesko kamipe le Kristo Jezushesko aposhtolo si, ando Efezush sile suntonge haj ando Kristo Jezush patyamnenge.

2. vers

Gracija tumenge haj pachipe kathar o Del, kathar amaro dad haj kathar amaro Raj Jezush Kristo!

3. vers

Te avel ashtyilime amare Rajesko, le Jezush Kristosko Del haj Dad, kon ando Kristo sagda rajosarde, haj duhoske ashtyilipesa ashtyilisardas amen.

4. vers

Ke avrialosardas amen ande leste
angla lumako kerdyipe,
ke suntura haj uzhe te avas angla leste ando kamipe.

5. vers

Ke anda kodo kerdas amen,
ke peske shavenge te lel amen perdal pa Jezush Kristo,
kathar pesko kamipesko fajlipe,

6. vers

haj asharas leski luvudyisardi gracija,
so das amenge ande pesko kamado Shavo.

7. vers

Ande leste si amenge o muntoipe perdal pa lesko rat,
le bezexengo jertisaripe, leski gracija, sar so si lesko barvalipe,

8. vers

so butardes das amenge
sakone platnikipesa haj pinzharipesa kethanes.

9. vers

Ke pinzharadas amenca peske kamipeski tajna
kathar pesko lashipesko fajlipe, so avri gindisardas ande leste,

10. vers

pa vramengo intregonimasko kerdyipe:
ke ando Kristo, sar Angluno, pale kethanes te xutyilel sakofalo,
so ando cheri haj pe phuv si.

11. vers

Ande leste vi reslam kado muklosaripe, ame, kon pe kado arakhadyilam kathar kodalesko kamipe, kon sakofalo kathar pesko kamipe kerel,

12. vers

ke te asharas lesko luvudyipe, ame, kon aba vi angla kodo sperantisarasas ando Kristo.

13. vers

Ande leste vi tume ashundine le chachimasko alav, vi patyanas leske, haj vi line le Suntone Duhosko stemplo,

14. vers

kon samalelari si amare muklosaripeke, zhikaj o Del intregones chi lel palpale so leskoj pe pesko luvudyimasko asharipe.

15. vers

Anda kado vi me, pala soste ashundom, ke patyan ando Raj Jezush, haj ke kamen sa le intregone sunton,

16. vers

chi nachuvavtar najisipe te phenav anda tumende, haj serojisajvav pa tumende ande mure rudyimata,

17. vers

ke amare Rajesko, le Jezush Kristosko Del, le luvudyimasko Dad te del tumenge le platnikimasko haj avri sikadyimasko Duhos, ke te pinzharen les.

18. vers

Te fimlalisarel tumare duhikane jakha, ke te zhanen, ke pe sosko sperantipe akhardas tumen, ke sosko barvaloj lesko luvudyisardo muklipe pe suntongi rig,

19. vers

haj sosko baro si lesko saktimo pe amende, kon patyas. Peski bari zor ando

20. vers

Kristo sikadas, kana opretrajardas les anda meripe haj pe peski chachi rig tordyardas les ando rajo,

21. vers

opralutnes pe sakono krajipe haj saktimo, zor haj rajipe, haj sakono anav, so na feri pe kadi luma pomonin, ba vi ando avlimasko.

22. vers

Sakofalo tala leske punre shudas, haj le majbareske shutas les ande eklezhia,

23. vers

so lesko trupo si, haj kodalesko intregonipe, kon ande sakofaloste sakofalo andre pherdyarel.

Fejezetek:

1 2 3 4 5 6