Lil le Filemoneske

1. fejezet


Adresipe haj drobovjipe


1. vers

O Pal, kon roboj anda Kristo Jezush, haj o Timoteush phral le Filemoneske, amare kamade butyake amaleske,


2. vers

haj la Appia phenyake, haj le Archippos vortakoske, haj le kethanipeske, kon ande tyo kher si.


3. vers

Gracija haj pachipe tumenge kathar o Del, kathar amaro Dad, haj kathar o Raj Jezush Kristo!


Le aposhtolesko najisimasko rudyipe


4. vers

Najisipe phenav mure Devleske, haj sagda serosardyuvav pa tute ande mure rudyimata –


5. vers

ke ashundom pa tyo kamipe haj patyape, so karing o Raj Jezush haj sa karing le suntura hatyares –,


6. vers

ke perdal pa tyiro patyape o kethanipe pinzhardo te kerdyol sa pa lashe kerdyimango pinzharipe, so mashkar amende ando Kristo andre pherdyol.


7. vers

Zurales losshav haj vojiv man ande tute, ke ushordyilas le suntongo ilo tutar, phrala!


Manglipe anda Onezimos


8. vers

Anda kado, apol chaches kathar ando Kristosko patyape vi shaj vladisaros tuke kodo, soske trubuj te avel,


9. vers

ba kathar o kamipe barem mangav tut me, o phuro Pal, kon akanak vi roboj ando Kristo Jezush.


10. vers

Anda muro shavo, anda Onezimos rudyij, kas ande mure sastra kerdom,


11. vers

kon varikana khanchi kerdo sas pe tyi rig, ba akanak vi tuke haj vi mange trubuimaskoj.


12. vers

Palpale bishaldom les tute, sar mure iles.


13. vers

Fajlosardino man mande te inkrav les, ke anda evangeliumo dukharde sastra anda tute te slugisarel mange,


14. vers

ba bi tyira vorbako chi kamlom khanchi te kerav, ke tyo lasho kerdyipe tena anda trubuipe, ba kathar tyo gindipe te kerdyol.


15. vers

Shajke anda kodo gelastar tutar pekh vrama, ke palpale te lesles po sagdipe,


16. vers

aba na kade sar robune slugas, ba majbutindes: sar slugas, sar kamade phrales. Mange zurales kodo si voj, ba sodivar barem tuke: vi kathar o trupo, haj vi kathar o Raj.


17. vers

Anda kado, apol amaleske te inkres man, patyivin les kade, sar man.


18. vers

Haj kana variso te las tutar bake kamel tuke, gindinles mange:


19. vers

– me, o Pal mure vastenca iskirisarav – me potyinavles avri. Apol – tena phenav tuke – tu vi tusa mange kames.


20. vers

Bater, phrala! Tyo hasnipe kamav te lav ando Raj, ushorisar apol muro ilo ando Kristo!


Drobovjimata haj ashtyilipe


21. vers

Ande tyo muklipe patyindes iskirsardom tuke: zhanav tu vi majbut keresa kathar kodo, so mangav.


22. vers

Haj inke lashar mange vi than: ke sperantisarav, ke anda tumare rudyimata palpale lena man.


23. vers

Drobovjisarel tut o Epafras, muro robicko amal ando Kristo Jezush,


24. vers

haj o Mark, o Aristarchos, o Demas haj o Lukach, mure butyake amala.


25. vers

Le Raj Jezush Kristoski gracija te avel tumare duhosa! Amen.

Fejezetek:


Könyvek