Evangeliumo kathar o Mate
5. fejezet
Le Plajeski Vorbimata; sityaripe pa Devlesko them
1. vers
Kana dikhlas le manushengo butipe opre gelas po plaj. Tele beshlas, leske sityarde kothe aviline leste,
2. vers
voj pale pe vorbimata puterdas pesko muj haj kade sityarelas len:
Le oxto anandimata
3. vers
„Anandej ando duho chorre, ke lengoj le rajonge thema.
4. vers
Anandej kon roven, ke von ushorimata lena.
5. vers
Anandej le blindura, ke pe lende ashola e phuv.
6. vers
Anandej kon bokhajven haj trushajven o chachipe, ke von andre pherdyimata resena.
7. vers
Anandej le lashe, ke von lashimata resena.
8. vers
Anandej le uzhe ilengire, ke von dikhena le Devles.
9. vers
Anandej le pachake manusha, ke len le Devleske shavenge anavarena.
10. vers
Anandej kas anda chachipe nashavena, ke lengoj le rajongo them.
11. vers
Anande san kana marhin tumen haj nashaven tumen, haj xoxamnes sakofalo nasulimata phenen pe tumende anda mande.
12. vers
Losshan haj vojin tumen, ke tumaro potyinipe baroj ando rajo; ke kade nashavenas vi le profetan, kon angla tumende sasle.
La phuvako lon, la lumako fimlalipe
13. vers
Tume san la phuvako lon. Ba o lon bi svadaslo kerdyola, sosa londyarena les? Pe khancheste chi avla aba lasho majdur, kade avri shuden haj punresa ushtyavena pe leste le manusha.
14. vers
Tume sanle la lumako fimlalipe. Nashtig garaven o foro, so po plaj vazdine.
15. vers
Chi phabardi na anda kodo phabaren, ke pala kodo tala balalyi te shonla, ba pe phabardako inkritoro, te fimlal sakoneske, kon ando kher si.
16. vers
Kade te fimlal tumaro fimlalipe agla manusha, te dikhen penge lashe kerde trabi, haj te luvudyin tumare Dades, kon ando rajo si.
E kris haj e profeta
17. vers
Na gindisaren, ke anda kodo avilom, te nacharav le krisa bake le profetan; na anda kodo avilom te nacharav len, ba anda kodo andre te pherdyarav len.
18. vers
Ke Amen, phenav tumenge: zhikaj chi nacholatar o cheri thaj e phuv, chi jekh i teleiskiripe haj chi jekh ramope chi xasajvelatar anda kris, zhikaj sakofalo andre chi pherdyola.
19. vers
Kon apol vi jekhes te mukela anda vi majcine vladimata haj kade sityarla le manushen, kodales le majcineske anavarena ande rajosko them; kon pale kerela les thaj kade sityarela, kodales bareske anavarena ande rajosko them.
20. vers
Ke phenav tumenge: kana tumaro chachipe chi avla maj baro sar le iskiritorengire thaj farizanengire, chi sar chi zhana andre ande rajosko them.
E xolyi haj e pacharimata
21. vers
Ashundine, ke kado phendine le dulmutanenge: »Na mudar; kon pale mudarel, phirel leske o krisaripe«
22. vers
Ba me kodo phenav tumenge, ke sakon kon xolyajvel pe pesko phral, phirel leske o krisaripe. Varikon kodo te phenela peske phraleske: »Dile«, phirel leske le anglune svatosko krisaripe; kon pale kado phenel: »Chalade«, phirel leske la dyehennaki jag.
23. vers
Kana apol opre shos tyi dimata po oltaro, haj kothe ande tyi godyi serojpe, ke tye phrales variso dukh si pe tute,
24. vers
mukh kothe tyi dimata angla oltaro, haj majanglal zha thaj pachardyu avri tye phralesa, haj numa atunchi zha haj shu po oltaro tyi dimata.
25. vers
Le po lasho tye dushmanos sigo, zhikaj lesa san po drom, dore tena del tut perdal tyo dushmano le krisareske, o krisari pale la krisake slugaske, kodo pale ande robija te shudel tut.
26. vers
Amen phenav tuke, chi sar na avesa avri kothar, zhikaj chi potyinesa les avri zhikaj maj palune krecara.
Ansuripe opre phaglimata
27. vers
Ashundine, ke kado phendine le dulmutane: »Na phag ansuripe!«
28. vers
Me pale kodo phenav tumenge, ke sa kodo, kon pe romnyi dikhel anda kodo, ke dorosarel la, aba ansuripe phagel kodalesa ande pesko ilo.
29. vers
Kana pale tyi chachi jakh marhil tut, shinla avri haj shudeles tutar; ke maj mishtoj tuke jekh rig te xasajvel anda tyo trupo, sar tye intregone trupos pe dyehenna te shuden.
30. vers
Haj kana tyo chacho vast marhil tut, shinles tele haj shudeles tutar; ke maj mishtoj tuke jekh rig te xasajvel anda tyo trupo, sar tyo intrego trupo pe dyehenna te resel.
O shindyipe
31. vers
Vi kodo phendine: »Kon bishalel peska romnya, te del la shindyimasko lil«.
32. vers
Me pale kodo phenav tumenge, ke sa kodal kon bishalen penga romnya – o marhipe chi inkerdyol kethe -, ansurimata phagavel lasa opre, haj kon bishalda zhulya lel romnyake, ansurimata phagel.
E colax
33. vers
Vi kodo ashundine, ke kodo phendine le dulmutanenge: »Na colaxar xoxamnes, ba de le Devleske, so colaxasa avri phendan!«.
34. vers
Me pale kodo phenav tumenge, chi sar na colaxaren; chi po cheri, ke kodo le Devlesko krajipe si,
35. vers
chi pe phuv, ke kodo pale leske punresko iskamin si, chi po Jeruzhalemo, ke kodo le bare krajesko foroj.
36. vers
Chi pe tyo shero na colaxar, ke chi tyo jekh bal chi zhanes te parnyares bake te kaljares.
37. vers
T«avel tumari vorba: ova, ova, na, na; so kathar kadal majbut si, kathar o nasul si.
O bladope
38. vers
Ashundine, ke kodo phendine: »De jakh anda jakh haj de dand anda dand«.
39. vers
Ba me kodo phenav tumenge: na bolden tumen karing o nasul, keren kado, kon malavel tut pe tyi mosuraki chachi rig, bolde leske kothe vi e kaver rig.
40. vers
Haj kon kamel te lel tutar tyo gad, de leske perdal vi tyo zubuno;
41. vers
haj kon kamel te ingrel tut zorasa pekh mija ushtyavjimata dur, zhatar lesa vi pe dujende.
42. vers
Kon mangel tutar, kodales de, haj kathar kodo kon unzhiles kamel te mangel tutar, na bolde tut.
Le dushmanengo kamipe
43. vers
Ashundine, ke kodo phendine: »Kam tye dopashone vortakos haj rucisar tye dushmanos«
44. vers
Me pale kodo phenav tumenge: Kamen tumare dushmanon, haj rudyin anda tumare nashavara,
45. vers
ke shave te aven tumare rajune Dadeske, ke voj opre ushtyavel pesko dyes pe nasula haj lashe, haj brishind del chacheske haj nasuleske.
46. vers
Ke kana numa kodalen kamen, kon vi tumen kamen, so avla tumaro potyinipe? Apol le Financura na zhikado keren?
47. vers
Haj kana feri tumare phralen den dyes, so baro keren? Apol le murtikana na zhikado keren?
48. vers
Tume apol aven federa, sar tumaro rajuno Dad feder si.
Könyvek
