Evangeliumo kathar o Mate
12. fejezet
Dyiv kidipe savatone
1. vers
Ande kodi vrama o Jezush mashkar beshavjimata nakhlas perdal. Haj ke leske sityarde bokhale kerdyiline, linepe haj tele kidenas le dyiv haj xanas kodal.
2. vers
Le farizana dikhline kado haj kado phendine leske: „Aketa, tye sityarde kodo keren, so savatone naj slobodo te keren.”
3. vers
Voj kodo phendas lenge palpale: „Chi ginade, ke so kerdas o David, kana bokhalo kerdyilas voj haj kon lesa sas?
4. vers
Sar gelas andre ande Devlesko kher, haj xalas le avri shutine manren, so nas slobodo leske te xal, haj chi kodalenge kon lesa sas, feri korkori le rashajenge?
5. vers
Bake chi ginade ande krisaki hertilya, ke savatone le rashaja ande khangeri xan le savatones, haj vi kade bi bezexaslej?
6. vers
Phenav tumenge: vi kathar e khangeri maj baro si kathe.
7. vers
Te hatyardinesas, ke so sikavel kado: »Lashipo kamav haj na sarkafimo«, chi krisardinesas le bi bezexaslen.
8. vers
Ke le Manushesko Shavo raj si le savatoneske.”
Le paralizanesko sastyaripe
9. vers
Kana kothar majdur gelas, andre gelas ande lengi zhinagoga.
10. vers
Aketa, sas kothe jekh manush kaske tele sas shutyilime lesko vast. Te shaj dosharen les, pushline lestar: „Slobodo si savatone te sastyaren?”
11. vers
Ba voj kado phendas lenge palpale: „Kon si mashkar tumende kodo manush, kas jekh bakro si haj savatone andre perel andekh gropa, chi xutyilelles haj chi cirdel avri kodales?
12. vers
Haj apol sodenca majbut si o manush kathar o bakro! Slobodo si kade lasho te keren savatone.”
13. vers
Pala kodo kade das duma kaj o manush: „Lunzhar avri tyo vast!” Kodo avri lunzhardasles, haj sastyilas, kasavo sasto kerdyilas, sar o kaver.
14. vers
Le farizana pale avri geline haj linepe te vorbinpe pe leste, ke sar te xasaren les.
Jezush, le Devleski sluga
15. vers
O Jezush zhanelas kado, anda kado gelastar kohar. But manusha zhanas pala leste, haj voj savorazhenen sastyardas,
16. vers
Ba vladisardas lenge zurales, tena phenen avri, ke kon si voj,
17. vers
andre te pherdyol o alav, so o Izajash profeta phendas:
18. vers
„Aketa, muri sluga, kas alosardom,
muro kamado, ande kaste muro dyi pesko fajlipo araklas.
Pe leste dav muro Duho,
Haj voj kris viacarela le popularenge.
19. vers
Chi xalpe haj chi cipil,
khonyik chi ashunel pe placcura lesko glaso.
20. vers
Le kole trestijas chi phagel kethane,
o melcho so inke phabol chi mudarel tele,
zhikaj po viktornope chi ingrel la krisa.
21. vers
Ande lesko anav sperantisaren le populara.
Le Jezushesko pestar-chacharipe
22. vers
Atunchi kothe ingerdine leste jekhe korre haj mutone bengales. Voj sastyardas les, haj o muto dikhelas haj vorbilas.
23. vers
E intrego butimata chudilaspe haj kade vorbilas: „Dore na kadoj le Davidesko shavo?”
24. vers
Le farizana kana kado ashundine kado phendine: „Nashtig nashavel kado avri le bengen, feri le bengenge krajeske, le Belzebubeske zhutimatasa kethane.”
25. vers
Apol ke pinzharelas lenge gindimata, kade das duma lende: „Sakono them savo nasul kamel peske, merel, haj vi savo foro bake kher, savo nasul kamel peske, opre chi ashola.
26. vers
Kana o shatano avri nashavel le shatanos, atunchi kodo nasul kamel peske, haj atunchi sar shaj asholas opre lesko them?
27. vers
Kana me le Belzebubeske zhutimatasa nashavav avri le bengen, tumare shave kaske zhutimatasa nashaven len avri? Kade von avna tumare krisara.
28. vers
Ba kana me le Devleske duhoske zhutimatasa nashav avri le bengen, atunchi reslas tumende le Devlesko them.
29. vers
Ke sar shaj zhalas andre varikon ande zuralesko kher, te chorel leske butyan, kana maj anglal chi phandel le zurales? Feri kade zhanel avri te xapavel lesko kher.
30. vers
Kon naj manca, muro dushmanoj, haj kon chi kidel manca, kodo rispisareltar.
31. vers
Anda kado phenav tumenge: le manushengo sako bezex haj kushlipe jertipe rakhel, ba varikon le duhos te kushel, kodo chi rakhel jertipe.
32. vers
Kana varikon pe Manushesko Shavo te phenel variso, kodo jertipe resela, ba varikon po Sunto Duho te phenla variso, chi resla jertipe chi pe kadi luma, chi ande avlimaski.
O kasht haj lesko frukto
33. vers
O kasht vaj lashoj, haj vi leske fruktura lashej; bake nasul si o kasht, haj vi leske fruktura nasulaj. Le kashtes apol pa leske fruktura shaj pinzharen opre.
34. vers
Viperange falura! Sar shaj zhanenas lashe butya te phenen, kana nasula san? Haj ke anda ilesko butipe del duma o muj.
35. vers
O lasho manush anda lashi avucija lashe butya del angle; o nasul manush pale anda nasuleske avucija nasul del angle.
36. vers
Phenav tumenge: Anda sakone khanchi kerde vorbi, so avri phenen le manusha, resen pengo potyinipe pe krisarimako dyes.
37. vers
Ke anda tye vorbi muntuna tut opre, bake anda tye vorbi krisarena tut.”
O Jezush chi del somno
38. vers
Atunchi mashkar le iskiritora haj le farizana unyi zhene kodo phendine leske: „Maistro, fajas amen tutar jekh somno te dikhas.”
39. vers
Voj kado phendas lenge palpale: „O nasul haj marhime generaciovo somno dorosarel, ba chi lel kaver somno, feri le Jonash profetasko somno.
40. vers
Ke sar o Jonash ande cetmasheski rinza sas trin dyes thaj trin ratya, kade avla vi le Manushesko Shavo ande phuvako ilo trin dyes thaj trin ratya.
41. vers
Le ninivicka mursha opretrajina kaj o krisipe kadale generaciovosa kethanes, haj krisarena kodo, ke von patyanas pe Jonashesko alav viacaripe; haj aketa, maj baro si kathe sar o Jonash.
42. vers
E sudnoski krajkinya opretrajila kaj o krisipe kadale generaciovosa kethanes, haj krisarela kodo, ke voj avilastar pa phuvake granici, te ashunel le Shalamoneske platnikimata; haj aketa, maj baro si kathe, sar o Shalamon.
Pa biuzhe duhura
43. vers
Kana o biuzho duho avri zhal anda manush, kaj bipajutne thana phirel haj pachimata rodel, ba chi rakhel.
44. vers
Atunchi kodo phenel: „Palpale zhav ande muro kher, kathar avri avilem. Kana kothe resel, shushes rakhelles, avri shiladines haj opre shukardines.
45. vers
Atunchi zhaltar, pasha peste lel inke efta kavere duhon, pestar maj nasulen; andre zhan haj kothe beshen. Kodole manusheske pale o paluno hatyaripe maj nasul avla kathar o angluno. Kade pecisajvela vi kadale nasule generaciovosa.”
Le Jezusheske chache phral
46. vers
Sar vorbilas kaj e butimata, aketa, leski dej haj leske phral tordyiline avral haj mangenas les, te shaj vorbin lesa.
47. vers
Varikon duma das leske: „Aketa, tyi dej haj tye phral avral tordyon, haj kamenas te vorbin tusa.”
48. vers
Voj kado phendas palpale kodaleske kon duma das leske: „Kon si muri dej haj kon si mure phral?”
49. vers
Pala kodo avri lunzhardas peske vast karing peske sityarde haj kade das duma: „Aketa, muri dej haj mure phral.
50. vers
Ke sa kodo kon kerel mure Dadesko kamipe, kon ando rajo si, kodo si muro phral, muri pheny haj muri dej.”
Könyvek
