Evangeliumo kathar o Mate

chapter 12


Chapters:


Dyiv kidipe savatone


verse #1

Ande kodi vrama o Jezush mashkar beshavjimata nakhlas perdal. Haj ke leske sityarde bokhale kerdyiline, linepe haj tele kidenas le dyiv haj xanas kodal.


verse #2

Le farizana dikhline kado haj kado phendine leske: „Aketa, tye sityarde kodo keren, so savatone naj slobodo te keren.”


verse #3

Voj kodo phendas lenge palpale: „Chi ginade, ke so kerdas o David, kana bokhalo kerdyilas voj haj kon lesa sas?


verse #4

Sar gelas andre ande Devlesko kher, haj xalas le avri shutine manren, so nas slobodo leske te xal, haj chi kodalenge kon lesa sas, feri korkori le rashajenge?


verse #5

Bake chi ginade ande krisaki hertilya, ke savatone le rashaja ande khangeri xan le savatones, haj vi kade bi bezexaslej?


verse #6

Phenav tumenge: vi kathar e khangeri maj baro si kathe.


verse #7

Te hatyardinesas, ke so sikavel kado: »Lashipo kamav haj na sarkafimo«, chi krisardinesas le bi bezexaslen.


verse #8

Ke le Manushesko Shavo raj si le savatoneske.”


Le paralizanesko sastyaripe


verse #9

Kana kothar majdur gelas, andre gelas ande lengi zhinagoga.


verse #10

Aketa, sas kothe jekh manush kaske tele sas shutyilime lesko vast. Te shaj dosharen les, pushline lestar: „Slobodo si savatone te sastyaren?”


verse #11

Ba voj kado phendas lenge palpale: „Kon si mashkar tumende kodo manush, kas jekh bakro si haj savatone andre perel andekh gropa, chi xutyilelles haj chi cirdel avri kodales?


verse #12

Haj apol sodenca majbut si o manush kathar o bakro! Slobodo si kade lasho te keren savatone.”


verse #13

Pala kodo kade das duma kaj o manush: „Lunzhar avri tyo vast!” Kodo avri lunzhardasles, haj sastyilas, kasavo sasto kerdyilas, sar o kaver.


verse #14

Le farizana pale avri geline haj linepe te vorbinpe pe leste, ke sar te xasaren les.


Jezush, le Devleski sluga


verse #15

O Jezush zhanelas kado, anda kado gelastar kohar. But manusha zhanas pala leste, haj voj savorazhenen sastyardas,


verse #16

Ba vladisardas lenge zurales, tena phenen avri, ke kon si voj,


verse #17

andre te pherdyol o alav, so o Izajash profeta phendas:


verse #18

„Aketa, muri sluga, kas alosardom,
muro kamado, ande kaste muro dyi pesko fajlipo araklas.
Pe leste dav muro Duho,
Haj voj kris viacarela le popularenge.


verse #19

Chi xalpe haj chi cipil,
khonyik chi ashunel pe placcura lesko glaso.


verse #20

Le kole trestijas chi phagel kethane,
o melcho so inke phabol chi mudarel tele,
zhikaj po viktornope chi ingrel la krisa.


verse #21

Ande lesko anav sperantisaren le populara.


Le Jezushesko pestar-chacharipe


verse #22

Atunchi kothe ingerdine leste jekhe korre haj mutone bengales. Voj sastyardas les, haj o muto dikhelas haj vorbilas.


verse #23

E intrego butimata chudilaspe haj kade vorbilas: „Dore na kadoj le Davidesko shavo?”


verse #24

Le farizana kana kado ashundine kado phendine: „Nashtig nashavel kado avri le bengen, feri le bengenge krajeske, le Belzebubeske zhutimatasa kethane.”


verse #25

Apol ke pinzharelas lenge gindimata, kade das duma lende: „Sakono them savo nasul kamel peske, merel, haj vi savo foro bake kher, savo nasul kamel peske, opre chi ashola.


verse #26

Kana o shatano avri nashavel le shatanos, atunchi kodo nasul kamel peske, haj atunchi sar shaj asholas opre lesko them?


verse #27

Kana me le Belzebubeske zhutimatasa nashavav avri le bengen, tumare shave kaske zhutimatasa nashaven len avri? Kade von avna tumare krisara.


verse #28

Ba kana me le Devleske duhoske zhutimatasa nashav avri le bengen, atunchi reslas tumende le Devlesko them.


verse #29

Ke sar shaj zhalas andre varikon ande zuralesko kher, te chorel leske butyan, kana maj anglal chi phandel le zurales? Feri kade zhanel avri te xapavel lesko kher.


verse #30

Kon naj manca, muro dushmanoj, haj kon chi kidel manca, kodo rispisareltar.


verse #31

Anda kado phenav tumenge: le manushengo sako bezex haj kushlipe jertipe rakhel, ba varikon le duhos te kushel, kodo chi rakhel jertipe.


verse #32

Kana varikon pe Manushesko Shavo te phenel variso, kodo jertipe resela, ba varikon po Sunto Duho te phenla variso, chi resla jertipe chi pe kadi luma, chi ande avlimaski.


O kasht haj lesko frukto


verse #33

O kasht vaj lashoj, haj vi leske fruktura lashej; bake nasul si o kasht, haj vi leske fruktura nasulaj. Le kashtes apol pa leske fruktura shaj pinzharen opre.


verse #34

Viperange falura! Sar shaj zhanenas lashe butya te phenen, kana nasula san? Haj ke anda ilesko butipe del duma o muj.


verse #35

O lasho manush anda lashi avucija lashe butya del angle; o nasul manush pale anda nasuleske avucija nasul del angle.


verse #36

Phenav tumenge: Anda sakone khanchi kerde vorbi, so avri phenen le manusha, resen pengo potyinipe pe krisarimako dyes.


verse #37

Ke anda tye vorbi muntuna tut opre, bake anda tye vorbi krisarena tut.”


O Jezush chi del somno


verse #38

Atunchi mashkar le iskiritora haj le farizana unyi zhene kodo phendine leske: „Maistro, fajas amen tutar jekh somno te dikhas.”


verse #39

Voj kado phendas lenge palpale: „O nasul haj marhime generaciovo somno dorosarel, ba chi lel kaver somno, feri le Jonash profetasko somno.


verse #40

Ke sar o Jonash ande cetmasheski rinza sas trin dyes thaj trin ratya, kade avla vi le Manushesko Shavo ande phuvako ilo trin dyes thaj trin ratya.


verse #41

Le ninivicka mursha opretrajina kaj o krisipe kadale generaciovosa kethanes, haj krisarena kodo, ke von patyanas pe Jonashesko alav viacaripe; haj aketa, maj baro si kathe sar o Jonash.


verse #42

E sudnoski krajkinya opretrajila kaj o krisipe kadale generaciovosa kethanes, haj krisarela kodo, ke voj avilastar pa phuvake granici, te ashunel le Shalamoneske platnikimata; haj aketa, maj baro si kathe, sar o Shalamon.


Pa biuzhe duhura


verse #43

Kana o biuzho duho avri zhal anda manush, kaj bipajutne thana phirel haj pachimata rodel, ba chi rakhel.


verse #44

Atunchi kodo phenel: „Palpale zhav ande muro kher, kathar avri avilem. Kana kothe resel, shushes rakhelles, avri shiladines haj opre shukardines.


verse #45

Atunchi zhaltar, pasha peste lel inke efta kavere duhon, pestar maj nasulen; andre zhan haj kothe beshen. Kodole manusheske pale o paluno hatyaripe maj nasul avla kathar o angluno. Kade pecisajvela vi kadale nasule generaciovosa.”


Le Jezusheske chache phral


verse #46

Sar vorbilas kaj e butimata, aketa, leski dej haj leske phral tordyiline avral haj mangenas les, te shaj vorbin lesa.


verse #47

Varikon duma das leske: „Aketa, tyi dej haj tye phral avral tordyon, haj kamenas te vorbin tusa.”


verse #48

Voj kado phendas palpale kodaleske kon duma das leske: „Kon si muri dej haj kon si mure phral?”


verse #49

Pala kodo avri lunzhardas peske vast karing peske sityarde haj kade das duma: „Aketa, muri dej haj mure phral.


verse #50

Ke sa kodo kon kerel mure Dadesko kamipe, kon ando rajo si, kodo si muro phral, muri pheny haj muri dej.”

Chapters:


Books