Evangeliumo kathar o Mate

Chapters:

… 23 24 25 26 27 28   ⇤ ← 25 → ⇥

verse #1

Atunchi anela le rajosko them pe desh sunci sheja, kon xutyildine penge phabarde haj avri geline angla piramno.

verse #2

Panzh mashkar lende chaladora sas panzh pale godyavera.

verse #3

Ke le chalade kana opre line penge phabarde, chi line pende uloj.

verse #4

Ba le godyavera penge phabardenca kethane vi uloj ingerdine penca ande penge vasura.

verse #5

Ke o piramno chi reslas pe vramate, savorazhene lindrale kerdyiline haj sutetar.

verse #6

Ba dopash ratyi cipipe ashundyolas: »Kathej o piramno, aven avri angla leste!«

verse #7

Atunchi le sunci sheja savora zhene opreushtyiline haj lashardine penge phabarden.

verse #8

Le chalade atunchi kade dine duma kaj le godyavera: »Den amen anda tumaro uloj, ke avri soventar amare phabarde.«

verse #9

Le godyavera kado phendine lenge: »Dore tena avel dosta chi amenge, chi tumenge, zhan barem kaj le biknara haj kinen tumenge.«

verse #10

Zhikaj kodola gelinetar te kinen uloj, reslas o piramno, haj kon gata sasle, andre geline lesa po colaxaripe. O vudar andre phandadine.

verse #11

Maj palal resline vi le majbut sunci sheja. Kodo phendine: »Raja, Raja! Puter avri amenge!

verse #12

Ba voj kado phendas palpale: »Amen, phenav tumenge: chi pinzharav tumen.«

verse #13

Aven apol samalinde, ke chi pinzharen chi o dyes, chi o chaso.

verse #14

Kade avla, sar kana jekh manush kodo kamlas, ke pe strene phuva te zhaltar. Akhardas peske slugan, haj perdal das lenge pesko barvalipe.

verse #15

Le jekhes panzh talentumo das, le kaveres dujen, le tritos pale jekh, savorenge sar pelaspe: haj gelastar pe strene phuva. Atunchi sigo

verse #16

gelastar kodo, kon panzh talentumo las, andre pashjardas kodalen, haj rodas inke panzhen.

verse #17

Zhikade vi kodo, kon dujen las, rodas inke dujen.

verse #18

Ba kodo kon jekh las, gelastar, ande phuv hunades garadas peske rajeske love.

verse #19

Pala but vrama khere avilas kadale slugango raj, haj oprepushlas len.

verse #20

Angle tordyilas atunchi kodo, kon panzh talenumura las, haj andas inke panzhe kavera talentumura, haj kade das duma: »Raja, panzh talentumura dan man, dikh, kavera panzh rodem inke pe lende.«

verse #21

Lesko raj kodo phendas leske: »Mishtoj, lasho haj chachi sluga san! Ando cino chacho sanas, abakanak but mukav pe tute: zha andre ande tye rajeski lossh.«

verse #22

Pala kado avilas vi kodo, kon le duj talentumura las, haj kade das duma: »Raja, duj talentumura dan man, dikh, inke duj talentumura rodem pe lende.«

verse #23

Lesko raj kado phendas leske: »Mishtoj, lasho haj chachi sluga san, ando cino chacho sanas, abakanak but mukav pe tute: zha andre ande tye rajeski lossh.«

verse #24

Palunes kothe avilas vi kodo kon jekh talentumo las, haj kado phendas: »Raja, zhanav pa tute, ke capeno manush san, kosis, kaj chi beshadan, haj andre kides vi kothar kaj chi ropnardan.

verse #25

Ke daros tutar, gelomtar haj garadom tyo talentumo ande phuv. Aketa, so tyiro si!

verse #26

Lesko raj kado phendas leske palpale: »Tu nasul haj bi butyako sluga! Zhanglan, ke kosij kaj chi beshadom haj kethane kidav kothar, kaj chi ropnardom.

verse #27

Haj zhianda kado trubusardino mure love te des kothe le love opre paruvarange, ke kana khere avav, butardes te lav palpale so muroj.

verse #28

Len apol lestar o talentumo haj denles kodaleske, kas desh talentumura si!

verse #29

Ke sa kodaleske, kas si, inke dena haj mishto trajila. Kathar kodo kas pale naj, inke vi kodo len, so siles.

verse #30

Le khanchikerde slugas pale shudenles avri po avralutno tunyarikipe! Avla kothe rovjipe haj dand kircipe!«

verse #31

Kana le Manushesko Shavo avelatar ande pesko luvudyipe, haj lesa kethanes le andyela savora zhene, atunchi tele beshela pe pesko luvudyaslo iskamin.

verse #32

Kethane kidena angla leste sakone popularon, voj pale alosarela len jekhavrestar, sar kana o malyari alosarel le bakren kathar le busnya.

verse #33

Le bakren pe peski chachi rig tordyarela, le busnyan pale po stungo rig.

verse #34

Atunchi o kraj kade dela duma kaj kodala, kon pe chachi rig tordyon: »Aventar, mure Dadeske ashtyilime, len perdal le themes, so tumenge keradyilas zhikathar la lumako kerdyipe.

verse #35

Ke bokhajlom haj dine man te xav, trushajlom haj dine man te pav, streno somas haj andre svagardine man,

verse #36

nango somas haj opreurade man, nasvalo somas haj aviline te dikhen man, phanglo somas haj aviline mande.«

verse #37

Atunchi le chache pushena lestar: »Raja, kana dikhlam tut te bokhajves, haj dam tut te xas, bake te trushajves haj dam tut te pes?

verse #38

Kana dikhlam tut sar strenos, haj andre xutyildam tut, bake nanges, haj opreuradam tut?

verse #39

Kana dikhlam tut nasvales bake phangles haj gelamtar tute?«

verse #40

O kraj kade dela vorba palpale lenge: »Amen, phenav tumenge: kana mashkar mure majcine phral kerde kado jekheske, mange kerdineles.«

verse #41

Pala kado kon pe leski stungo rig tordyon, kado phenela: »Zhantar mandar, tume armajasle, pe sagutni jag, so le bengeske haj leske andyelonge kerdyilas.

verse #42

Ke bokhajlom haj chi dine man te xav, trushajlom haj chi dine man te pav,

verse #43

streno somas haj chi svagardine man andre, nango somas haj chi urade man opre, nasvalo somas haj phanglo, haj ch«aviline te dikhen man.«

verse #44

Pe kado vi kodola pushena: »Raja, kana dikhlam tut te bo-khajves bake trushajves, sar strenes bake nanges, nasvales bake phangles, haj chi slugisardam tuke?«

verse #45

Atunchi voj kade dela vorba palpale lenge: »Amen, phenav tumenge: Kana chi kerdine kado mashkar kadal majcine jekheske, mange chi kerdineles.«

verse #46

Haj zhanatar kadal pe sagutne dukha, le chache pale po sagutno trajo.”

Chapters:

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28