chapter 7
Na krisaren, tena krisarentar tumen.
Ke soski krisasa tume krisaren, kasavasa krisarena vi tumen, haj sodenca tume vazaren, kattyenca vazarena vi tumenge palpale.
Sostar dikhes e pansliga ande tye phraleske jakha, kana ande tyire jakha pale chi les sama o berando?
Bake sar shaj phenes tye phraleske: mukh te lav avri anda tye jakha e pansliga, kana aketa, o berando kothej ande tyire jakha?
Paxande! Shude avri majanglal anda tyire jakha o berando, atunchi dikhesa, te shaj les avri e pansliga anda tye phraleske jakha!
Na den le sunci butya le zhuklenge, haj tumare bisora na shuden angla bale, tena ushtyaven pe lende penge punrenca, haj kana boldenpe, te mudaren tumen.
Mangen haj dena tumenge, roden haj rakhena, katnaren o vudar haj putrena kodo tumenge.
Ke sakon, kon mangel, lel, kon rodel, arakhel, haj kon o vudar katnarel kodaleske avri putren kodo.
Bake kon si mashkar tumende, kon, kana lesko shavo manro mangel lestar, barr del les?
Bake kana masho mangel, dore sap del les?
Apol tume, kon nasula sanle, zhanen lashe dimata te den tumare shavorenge, sodivar majfeder dela tumaro Dad, kon ando rajo si, lashe butya kodalen, kon mangen les?
Sa kodo, so fajas tumen, te keren tumenge le manusha, keren kodol vi tume lenge. Ke kado si e kris haj le profeciji.
Pa tang vudar zhan andre, ke bulhoj o vudar haj bulhoj o drom, savo ando meripe ingrel, haj but zhene si, kon andre zhan pa leste.
Haj sosko tang si o vudar haj o drom, savo po trajo ingrel, haj soske cerra zhene si, kon rakhenles!
Ferin tume kathar le xoxamne profeti, save ande bakreski faca aven tumende, andral pale turbatone ruv si.
Pa lenge fruktura pinzharena len opre. Dore kiden pa kanro drakh, bake pa churindi gular?
Kade sako lasho kasht lasho frukto upajil, o nasul kasht pale nasul frukto upajil.
O lasho kasht nashtig upajil nasul frukto, haj chi o nasul kasht nashtig upajil lasho frukto.
Sakone kashtes, savo chi upajil lasho frukto, avri shinen haj pe jag shuden.
Apolal, pa lenge fruktura pinzharena opre len.
Na sakon, kon kodo phenel mange: »Raja, Raja!«, zhal andre ande rajosko them, numa kodo, kon kerel mure Dadesko kamipe, kon ando rajo si.
But zhene phenena mange kodo dyes: »Raja, Raja! Na ando tyiro anav profetisarasas, na ande tyiro anav nashavasas bengen, haj na ande tyiro anav kerasas but chudimata?«
Atunchi maj avri pheno lenge: »Chikana pinzharos tumen. Durutnisajven mandar tume, kon nasulimata kerdine!«
Ke sakon, kon ashunel mure akanutne vorbi haj kerdyimata kerla kodalen, cirdel po godyaver manush, kon pesko kher po plaj kerdas.
Shindyolas o brishind, shordyolas o paji, phurdenas le balvaja haj le khereske denas. Ba kodo chi phagerdyilas kethane, ke lesko fundo po plaj shutine tele.
Sa kodal pale, kon ashunel mure akanutne vorbi, ba chi kerla kerdyimatange kodala, cirdel pe kodo dilo manush, kon peske kheres po kishaj kerdas.
Shindyolas o brishind, shordyolas o paji, phurdenas le balvaja haj le khereske denas. Kodo kethane phagerdyilas, haj baro sas lesko chorripe.
Pecisajlas apol, ke kana o Jezush agurutnisardas kadal vorbi, sa le manusha bari dikhenas pe lesko sityaripe,
ke kade sityarelas len, sar kas saktimo siles, haj na kade, sar le iskiritora.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly