chapter 28
Kana nachilas o savato, ande kodo chaso, so pe kurkesko angluno dyes zorisardyol, e Maria Magdolna haj e kaver Maria gelastar te dikhel o murmunto.
Haj aketa, zurales mishkisardyilas e phuv: le Devlesko andyelo tele huraldas anda cheri, kothe gelas, pizdas kothar le barres, haj pe leste beshlas.
Kasavo sas lesko sikadyipe, sar o strafin, haj leske gada parne sas sar o jiv.
Le ketani zurales drajline lestar, haj sar le mule, kasave kerdyiline.
O andyelo duma das haj kodo phendas le romnyange: „Tume na daran! Ke zhanav, ke le Jezushes, kas po trushul tannardine, kodales roden.
Naj kathe, ke opretrajisardyilas, sar phendasla. Aven, haj dikhen o than kaj pashjolas.
Zhantar sigo haj phenen kado leske sityardenge: »Opretrajisardyilas anda meripe, haj angla tumende zhal ande Galilea. Kothe apol dikhena les! Aketa, phendomles tumenge!«”
Atunchi vi gelinetar kathar o murmunto. Bara darasa haj losshasa nashenas, te ingren e viaca le sityardenge.
Atunchi aketa o Jezush avelas lenge mostar haj kade das duma: „Drobovjipe tumenge!” Von pale kothe geline leste, perdal xutyildine leske punren haj tele burdosardyile angla leste.
Atunchi o Jezush kodo phendas lenge: „Na daran! Zhantar, haj ingren e viaca mure phralenge, ke te zhantar ande Galilea. Ke kothe dikhena man.”
Kana gelinetar, mashkar ketani unyizhene gelinetar haj ingerdine e viaca le angrashajange pa sakofaloste, ke so pecisardyilas.
Pe kado kodal kethane aviline le phurenca, svato inkerdine, pala kodo but love dine le ketanen,
haj kodo phendine lenge: „Phenen kodo: »Leske sityarde aviline ratyi haj chordine les, zhi- kaj ame sovasas.«
Kana o prefekto a-shunela kado, ame maj pacharasa les, haj avri muntusarasa tumen.”
Kodal perdal line le love haj kade kerdine, sar avri sityardine len.” Kadal vorbimata inke vi kaj kado dyes vorbardyon mashkar le bibolde.
Le deshuduj sityarde pale gelinetar ande Galilea, pe kodo than, kaj o Jezush akhardas len.
Kana dikhline les, tele burdosardyiline, ba unyizhene inke chi akanak chi patyanas.
O Jezush kothe gelas haj kado phendas lenge: „Mange davadyilas sako saktimo ando rajo haj pe phuv.
Zhantar apol, haj keren sityardenge sakone popularon. Bolen len ande Dadesko haj ande Shavesko haj ande Sunto Duhosko anav,
haj sityaren len pe kodo, ke te inkren sa kodo, so vladisardom tumenge! Haj aketa, me tumenca som sako dyes zhikaj lumako agor!”
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly