chapter 23
O Jezush pala kado kade das duma kaj e butimata haj kaj peske sityarde:
„Le iskiritora haj le farizana ande Mozeshesko iskamin beshen.
Anda kado sakofalo, so phenen tumenge, keren kodo haj inkren andre – ba lenge kerdyimata na keren, ke phenen von, ba chi kerenles.
Phare haj bi shaj inkerde pharimata phanden kethane haj shon pel manushenge phike, ba von chi jekhe najenca chi kamen te mishkisaren kodo.
Sakono kerdyimata so keren anda kodo keren, te di-khen len le manusha. Penge rutyikane brichinara po bulho shinen, le chipti bararen.
Faj len le anglune thana pe xamimata, le anglune thana ande zhinagogi,
le dyes dinipe pe forosko mashkar, haj kodo, kana le manusha rabbeske anavaren len.
Tume na anavaren tumen rabbeske, ke jekh si tumaro Sityari, tume pale savorazhene phrala sanle.
Chi tumare Dadeske na anavaren khanyikas pe phuv, ke jekh si tumaro Dad, o rajuno.
Na anavaren tumen chi Maistrovoske, ke jekh si tumaro Maistrovo, o Kristo.
Kon mashkar tumende o majbaroj, te avel tumari sluga.
Ke kon pes opreasharel, kodales tele lazhavaren, haj kon pes tele lazhavarel, kodales opreasharen.
Jaj tumenge, paxande iskiritora haj farizana, ke andre phandaven le rajosko them angla manusha. Ke tume chi zhan andre, haj kon andre kamelas te zhal, chi kodalen chi muken andre te zhan.
Jaj tumenge paxande iskiritora haj farizana, ke andre phiren e mara haj la phuva, ke jekhe kaj o Del boldadyiles te rakhen, haj kana rakhlineles, kathar tumende inke majduvar le dyehennaske shaveske shonles.
Jaj tumenge korrenge drom sikavara, kon kodo phenen: »Kana varikon colaxarel pe khangeri, kodo khanchij, ba kon colaxarel pe khangerako somnakaj, kodo aba krisarel.«
Tume dile thaj korre! Haj so si majbaro, o somnakaj bake e khangeri, so suntosarel le somnakajes?
Haj kodo phenen: »Kana varikon po oltaro del colaxa, kodo khanchij, ba kon so pe leste si tofna del colaxa, kodo aba krisarel.«
Tume korre! Haj so si majbaro, e tofna, bake o oltaro, savo suntosarel le tofnipes?
Haj ke kon po oltaro del colaxa, kodo colaxarel po oltaro haj pe sakofaloste so pe leste si.
Haj kon pe khangeri del colaxa, kodo colaxarel pe khangeri, haj pe kodo, kon ande late beshel.
Kon pale po cheri del colaxa, kodo pe le Devlesko iskamin del colaxa, haj pe kodo, kon pe kodo beshel.
Jaj tumenge paxande iskiritora haj farizana, ke deshtope den anda menta, anda kapro haj kemenyo, ba chi grizhontume la krisake majbare vladimatanca, la krisasa, e lashipesa haj le imandimosa. Kadal trubujas te keren, haj chi kodolen ch«avlas slobodo te muken.
Korre dorm sikavara, kon avri alosaren le cincara, le dromedaros pale tele nakhaven.
Jaj tumenge paxande iskiritora haj farizana, ke uzharen le taxtajengo haj le tejarengo avralutnipe, ba andral pherde sanle choripesa haj biuzhipesa.
Tu korre farizano! Uzhar majanglal le taxtajesko andralipe, ke vi lesko avralipe uzho te avel!
Jaj tumenge paxande iskiritora haj farizana, ke cirden pe andre farbosarde murmuntura, save avral shukarenge dichon, ba andral pherdi si kodal mulenge kokalenca haj but sakofalone biuzhipenca.
Kade vi tume avral dore chachenge dichon angla manusha, ba andral pherdo sanle paxandipesa haj nasulipesa.
Jaj tumenge paxande iskiritora haj farizana, ke serovjimaske murmuntura vazden le profetange, haj opreshukaraven le chachenge murmuntura,
haj kodo phenen: »Ame ande amare dadenge vrami te trajisardamas, ame chi avilamas lenge bezexasle amala ande profetange rata.«
Ba tume sikaven andre, ke lenge shave sanle kodalenge, kon le profetan mudardine.«
Vi tume andre pherdyaren tumare dadenge pecimata!
Sapa, viperange falura! Sar shaj muntosajvenas kathar e dyehennaki kris?
Anda kado aketa, bi-shalav tumende profetan, platnikonen haj iskiritoren. Mashkarlende unyizhenen mudarena haj po trushul tannarena, kaveren chunyarena ande tumare zhinagogi haj nashavena len anda jekh foro ando kaver.
Kade pe tumende hural sako chacho rat, so avri mukle pe phuv zhikathar le chache Abelesko rat zhikaj le Zakaria-shesko haj Barakiasheske shavesko rat, kas mudardine mashkar e khangeri thaj oltaro.
Amen, phenav tumenge: oprehural sa kado pe kado generaciovo.
Jeruzhalem, Jeruzhalem, tu mudares le profetan, barrenca shudes kodalen, kas tute bishaldine! Sodivar kamlom kethane te kidav tye shaven, sar e khanyi tala peske phaka kethane kidel peske pujon, ba tume chi kamline kodo!
Aketa, muklino pusto avla tumaro kher!
Ke phenav tumenge: Chi dikhena man kathar kadi vrama, zhikaj kado chi phenena: »Ashtyilimej, kon ande Rajesko anav avel!«”
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly