Evangeliumo kathar o Mate

Chapters:

… 4 5 6 7 8 …   ⇤ ← 6 → ⇥

verse #1

Len sama pe kodo, ke tumaro chachimo na angla manusha chacharen, bare te aven angla lende, ke kade ch«avla tumen potyinipe kaj tumaro Dad, kon ando rajo si.

verse #2

Kana apol des, na zhanav avri sakonesa, sar le paxande keren ande zhinagoga haj pe vujici, te luvudyisaren len le manusha. Amen, phenav tumenge: line pengo potyinipe.

verse #3

Kana tu dimatipe keres, tena zhanel tyo stungo vast, ke so kerel o chacho,

verse #4

tena zhanardyol avri tyo dinipe; tyo Dad, kon dikhel tut garades, potyinla tuke.

verse #5

Kana pale rudyin, na keren kade, sar le paxande, saven faj ande zhinagoga haj avral pe vujici tordyindos te rudyinpe, ke te shaj dikhen len le manusha. Amen, phenav tumenge: line pengo potyinipe.

verse #6

Tu, kana rudyis, zha andre ande tyi soba, phandav andre tyo vudar, haj kade rudyin kaj tyo Dad, kon dikhel tut garades; atunchi tyo Dad, kon ando garadyipe si, potyinla tuke.

verse #7

Ando rudyipe pale na vorbin anda khanchimata, sar le murtikana, kon kade gindin, ke anda penge but vorbimata ashundyipe rakhena.

verse #8

Na cirden apol pe lende; ke tumaro Dad zhanel, ke so trubuj tumen, zhimajanglal inke mangenas les.

verse #9

Anda kado kade rudyin:
Amaro Dad, kon san ando rajo,
te suntosardyol tyo anav;

verse #10

te aveltar tyiro them;
te kerdyolpe tyiro kamipe,
sar ando rajo, kade vi pe phuv.

verse #11

Amaro sako dyesesko manro
de amenge adyes;

verse #12

haj jertisar amare bezexa,
sar vi ame jertisaras
kodalenge, kon amenge bezexaren;

verse #13

haj na inger amen ande zumavjimata;
ba slobodisar amen kathar o Nasul.

verse #14

Ke te jertina le manushenge lenge doshimata, vi tumenge jertila tumaro rajuno Dad.

verse #15

Ba tena jertina le manushenge, chi tumaro Dad chi jertila tumare dosha.

verse #16

Kana postyin, na sikaven pe tumari mosura briga, sar le paxande. Ke von xoxamni mosura sikaven, ke pe lengo postyipe le manusha bari te dikhen. Amen, phenav tumenge: von aba line pengo potyinipe.

verse #17

Tu, kana postyis, makh tyo shero, tyi mosura pale thov.

verse #18

Tena dikhen le manusha, ke postyis, feri tyo Dad, kon ando garadyipe si; haj tyo Dad, kon dikhel ando garadyipe, potyinela tuke.

verse #19

Na kiden kethane tumenge avuciji pe phuv, kaj kira haj e vrama xalle, kaj le chor andre phagen haj choren.

verse #20

Kiden tumenge kethane avuciji ando rajo, kaj chi kir haj chi vrama chi nacharel, haj kaj chor chi phagen andre haj chi choren.

verse #21

Ke kaj tyi avucija si, kothe avla vi tyo ilo.

verse #22

Le truposko fimlalipe e jakh si. Kana apol tye jakha lashej, tyo intrego trupo fimlalo avla,

verse #23

ba kana tye jakha nasulaj, tyo intrego trupo tunyariko avla. Kana pale o fimlalipe, so ande tute si, tunyarikipe si, kabor avla atunchi o tunyarikipe!

verse #24

Khonyik nashtig slugil duje rajeske: ke vaj rucil le jekhes, le kaveres pale kamel, bake patyivil le jekhes, le kaveres pale tele dikhel. Nashtig slugisaren je-kharsa le Devleske haj vi le mammoneske.

verse #25

Anda kado kodo phenav tumenge: Na daraven tumaro trajo, ke so te xan, haj chi tumare trupos, ke ande soste te uraven tumen. Naj maj but o trajo kathar o xamasko, o trupo pale kathar le gada?

verse #26

Dikhen le chereske chiriklyan: chi beshaven, chi kosin, chi ande sinura chi kiden ande jekh, haj tumaro rajuno Dad xaxavel len. Chi sanle zurales maj but kathar kadal?

verse #27

Kon si mashkar tumende, kon peske daramnimatasa zhanel peske trajoski vrama te lunzharel vi jekhe kujesa?

verse #28

Haj anda gada sostar khinyaren tumen? Dikhen le malyange liliomon, ke sar baron: chi khinyarenpe haj chi xuven;

verse #29

haj vi kade, phenav tumenge: inke chi o Shalamon nas kade opre urado ande pesko maj baro krajipe, sar jekh mashkar kadal.

verse #30

Kana pale le malyangi char, so adyes si, haj tehara ande bov shudena, o Del kade opre uravel, sodivar majfeder tumen, cerra patyamne?

verse #31

Na daran apol haj na phenen: »So te xas«, bake: »So te pas«, bake: »Ande soste te uravas amen?«

verse #32

Ke kadalen le murtikana roden. Ke zhanel tumaro rajuno Dad, ke sa kadal trubuj tumenge.

verse #33

Tume roden majanglal le Devlesko them haj kodalesko chachipe, haj sa kado lena pasha leste.

verse #34

Na daran apol anda tehara: ke e tehara maj darala anda peste. Dostaj le dyeseske peski bida.

Chapters:

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28