Evangeliumo kathar o Mate
capítulo 6
E dimata
verso 1
Len sama pe kodo, ke tumaro chachimo na angla manusha chacharen, bare te aven angla lende, ke kade ch«avla tumen potyinipe kaj tumaro Dad, kon ando rajo si.
verso 2
Kana apol des, na zhanav avri sakonesa, sar le paxande keren ande zhinagoga haj pe vujici, te luvudyisaren len le manusha. Amen, phenav tumenge: line pengo potyinipe.
verso 3
Kana tu dimatipe keres, tena zhanel tyo stungo vast, ke so kerel o chacho,
verso 4
tena zhanardyol avri tyo dinipe; tyo Dad, kon dikhel tut garades, potyinla tuke.
O rudyipe: Amarodad
verso 5
Kana pale rudyin, na keren kade, sar le paxande, saven faj ande zhinagoga haj avral pe vujici tordyindos te rudyinpe, ke te shaj dikhen len le manusha. Amen, phenav tumenge: line pengo potyinipe.
verso 6
Tu, kana rudyis, zha andre ande tyi soba, phandav andre tyo vudar, haj kade rudyin kaj tyo Dad, kon dikhel tut garades; atunchi tyo Dad, kon ando garadyipe si, potyinla tuke.
verso 7
Ando rudyipe pale na vorbin anda khanchimata, sar le murtikana, kon kade gindin, ke anda penge but vorbimata ashundyipe rakhena.
verso 8
Na cirden apol pe lende; ke tumaro Dad zhanel, ke so trubuj tumen, zhimajanglal inke mangenas les.
verso 9
Anda kado kade rudyin:
Amaro Dad, kon san ando rajo,
te suntosardyol tyo anav;
verso 10
te aveltar tyiro them;
te kerdyolpe tyiro kamipe,
sar ando rajo, kade vi pe phuv.
verso 11
Amaro sako dyesesko manro
de amenge adyes;
verso 12
haj jertisar amare bezexa,
sar vi ame jertisaras
kodalenge, kon amenge bezexaren;
verso 13
haj na inger amen ande zumavjimata;
ba slobodisar amen kathar o Nasul.
verso 14
Ke te jertina le manushenge lenge doshimata, vi tumenge jertila tumaro rajuno Dad.
verso 15
Ba tena jertina le manushenge, chi tumaro Dad chi jertila tumare dosha.
O postyipe
verso 16
Kana postyin, na sikaven pe tumari mosura briga, sar le paxande. Ke von xoxamni mosura sikaven, ke pe lengo postyipe le manusha bari te dikhen. Amen, phenav tumenge: von aba line pengo potyinipe.
verso 17
Tu, kana postyis, makh tyo shero, tyi mosura pale thov.
verso 18
Tena dikhen le manusha, ke postyis, feri tyo Dad, kon ando garadyipe si; haj tyo Dad, kon dikhel ando garadyipe, potyinela tuke.
Le xoxamne haj le chache avuciji
verso 19
Na kiden kethane tumenge avuciji pe phuv, kaj kira haj e vrama xalle, kaj le chor andre phagen haj choren.
verso 20
Kiden tumenge kethane avuciji ando rajo, kaj chi kir haj chi vrama chi nacharel, haj kaj chor chi phagen andre haj chi choren.
verso 21
Ke kaj tyi avucija si, kothe avla vi tyo ilo.
verso 22
Le truposko fimlalipe e jakh si. Kana apol tye jakha lashej, tyo intrego trupo fimlalo avla,
verso 23
ba kana tye jakha nasulaj, tyo intrego trupo tunyariko avla. Kana pale o fimlalipe, so ande tute si, tunyarikipe si, kabor avla atunchi o tunyarikipe!
verso 24
Khonyik nashtig slugil duje rajeske: ke vaj rucil le jekhes, le kaveres pale kamel, bake patyivil le jekhes, le kaveres pale tele dikhel. Nashtig slugisaren je-kharsa le Devleske haj vi le mammoneske.
Le bidi haj o visvarimo
verso 25
Anda kado kodo phenav tumenge: Na daraven tumaro trajo, ke so te xan, haj chi tumare trupos, ke ande soste te uraven tumen. Naj maj but o trajo kathar o xamasko, o trupo pale kathar le gada?
verso 26
Dikhen le chereske chiriklyan: chi beshaven, chi kosin, chi ande sinura chi kiden ande jekh, haj tumaro rajuno Dad xaxavel len. Chi sanle zurales maj but kathar kadal?
verso 27
Kon si mashkar tumende, kon peske daramnimatasa zhanel peske trajoski vrama te lunzharel vi jekhe kujesa?
verso 28
Haj anda gada sostar khinyaren tumen? Dikhen le malyange liliomon, ke sar baron: chi khinyarenpe haj chi xuven;
verso 29
haj vi kade, phenav tumenge: inke chi o Shalamon nas kade opre urado ande pesko maj baro krajipe, sar jekh mashkar kadal.
verso 30
Kana pale le malyangi char, so adyes si, haj tehara ande bov shudena, o Del kade opre uravel, sodivar majfeder tumen, cerra patyamne?
verso 31
Na daran apol haj na phenen: »So te xas«, bake: »So te pas«, bake: »Ande soste te uravas amen?«
verso 32
Ke kadalen le murtikana roden. Ke zhanel tumaro rajuno Dad, ke sa kadal trubuj tumenge.
verso 33
Tume roden majanglal le Devlesko them haj kodalesko chachipe, haj sa kado lena pasha leste.
verso 34
Na daran apol anda tehara: ke e tehara maj darala anda peste. Dostaj le dyeseske peski bida.
Libros
