Janosheske viziovura
capítulo 1
Anglardivorba
verso 1
Le Jezush Kristosko avrisikadyipe, so o Del das leske, ke te sikavel peske slugenge sa kodo, soske na pa buteste trubuj te pecisardyol. Bishaldas peske andyelos, haj avriphendas peske slugaske, le Janosheske,
verso 2
kon chacharipe kerdas pa Devlesko alav haj pa Jezush Kristosko chacharipe, sa pa kodo, so dikhlas.
verso 3
Anandoj kodo, kon ginavel haj kon ashunel kadale profecimaske alava, haj andre inkrel sa kodo, so ande kodo tele si iskirime, ke e vrama pashe si.
Anglelasharipe
verso 4
O Janosh le efta eklezhiange, so ande Azhia si. Gracija tumenge haj pachipe kathar kodo, kon si haj kon sas haj kon avlimaskoj; haj kathar le efta duhura, kon angla lesko krajunoiskamin si;
verso 5
haj kathar o Jezush Kristo, kon chacho chacharij, angluno arakhadyilino le mulenge, haj kraj le phuvakire krajenge; kon kamel amen haj thodas amen kathar amare bezexa perdal pa pesko rat,
verso 6
haj le Devleske haj peske krajimaske rashajeske shutas amen; leskoj o luvidyipe haj o saktimo sagutno-sagutnes! Amen.
verso 7
Aketa pe norura avel, haj dikhela les sakone jakha, haj kon les perdal pusadine. Penge kolyina marena maj le intregone populara anda leste. Ova! Amen.
verso 8
Me som o Alfa haj Omega, phenel o Raj, o Del, kon si, haj kon sas haj kon avlimaskoj: o Sgutnokerimasko.
Le Janosheski butyi
verso 9
Me, o Janosh tumaro phral haj amal ando kikidyipe haj ande Jezushesko pachimasko toleranshipe, pe Patmosesko niso somas anda Devlesko alav haj anda Jezushesko chacharipe.
verso 10
Ando transo pelom pe Rajesko dyes, haj pala muro dumo kasavo baro glaso ashundom, sar o fanfari,
verso 11
so kade ashundyolas: „So dikhes iskirisar tele andekh hertija, haj bishal kodo le efta eklezhiange, so ande Azhia si, ando Efezush, Samaria, Pergamono, Tiatira, Sardes, Filadelfia haj ande Laodicea!”
verso 12
Boldomman te dikhav o glaso, so manca vorbilas: haj kana boldadyilom, efta somnakuno memelyengo inkritori dikhlom,
verso 13
haj mashkar efta somnakune memelyake inkritora kasaves, sar le Manushesko Shavo te avilino, zhikaj e koch resenas leske gada, haj lesko kolyin somnakune brichinaresa sas krujal brichinisardo.
verso 14
Lesko shero haj leske bal parne sas, sar e parni postila, haj sar o jiv, haj leske jakha pale kasave sar e jag.
verso 15
Leske punre kasave sas, sar ande bov vrazdisardino xarkom, haj lesko glaso, sar le bare pajengo bashadyipe.
verso 16
Ande pesko chacho vast efta cherhaja inkerlas, haj anda lesko muj duj rigako xanro tordyolas avri. Leski mosura kasavo sas, sar ando intrego fimlalipe ablyosardo kham.
verso 17
Kana dikhlom les angla leske punre pelom, sar jekh mulo. Pesko chacho vast pe mande shutas, haj kodo phendas: „Na dara, me som o angluno haj o paluno,
verso 18
o zhuvindo, ba chaches mulo somas: ba aketa, trajiv sagutno-sagutnes: mande si le merimaske haj la telalutna lumake kiji.
verso 19
Iskirin apol opre, so dikhlan haj so si, haj savenge inke pala kado trubuj te pecisardyontar!
verso 20
Le efta cherhajengi tajna, so ande muro chacho vast dikhlan, haj le efta somnakune memelyenge inkritoron: le efta cherhaja le efta eklezhiange andyelaj: haj le efta memelyenge inkritora le efta eklezhiji si.
Libros
