Evangeliumo kathar o Janosh

capítulo 1


Capítulos:


Anglardi vorba


verso 1

Majanglal sas o alav, haj o alav kaj o Del sas, haj o Del sas o alav.


verso 2

Voj sas majanglal kaj o Del.


verso 3

Sakofalo lestar kerdyilas, haj bi lesko khanchi chi kerdyilas, so kerdyilas.


verso 4

Ande leste trajo sas, haj o trajo sas le manushengo fimlalipe.


verso 5

O fimlalipe ando tunyarikipe fimlal, ba o tunyarikipe kodo chi xutyildas opre.


verso 6

Sas jekh manush, kas o Del bishaldas, Janosh sas lesko anav.


verso 7

Anda chacharimata avilas, te kerel chacharipe pa fimlalipe, haj sakon te patyal perdal pa leste.


verso 8

Na voj sas o fimlalipe, numa chacharipe trubusardas te kerel pa fimlalipe.


verso 9

O Chacho fimlalipe, savo sakone manushes fimlalisarel, ande luma avilas.


verso 10

Ande luma sas, e luma lestar kerdyilas, ba e luma chi pinzhardas opre les.


verso 11

Ande pesko avilas, ba leskire chi svagardine les andre.


verso 12

Ba sa kodalenge, kon andre svagardine les, saktimo das, ke le Devleske shavora te aven: kodalenge, kon patyan ande lesko anav,


verso 13

kon na anda rat, haj chi anda truposko hatyaripe, haj chi anda murshengo kamipe, ba anda Del arakhadyiline.


verso 14

O alav truposke kerdyilas, haj mashkar amende beshelas, haj ame dikhlam lesko luvudyipe, sar le Dadesko jekh arakhadyilinesko luvudyipes kon pherdo sas gracijasa haj chachimasa.


verso 15

O Janosh chacharipe kerel pa leste, haj viacarel: „Voj si kodo pa kaste kado phendom: Kon pala mande avel, anglalarel man, ke maj anglal sas, sar me.”


verso 16

Ame savora zhene anda lesko intregonipe lam gracija pe gracija butardes.


verso 17

Ke e kris perdal pa Mozesh lam, e gracija haj o chachipe pale perdal pa Jezush Kristo kerdyilas amaro.


verso 18

Le Devles, chikana, khonyik chi dikhlas: o jekh arakhadyilo Del, kon pe Dadesko kolyin si, voj phendas avri.


Le Bolare Janoshesko vorbisaripe


verso 19

Kado le Janoshesko chacharipe si, kana le bibolde rashajen haj levitan bishaldine leste anda Jeruzhalemo, te pushen les: „Kon san tu?”


verso 20

Voj avr phendas, chiasvikardas, haj avriphendas: „Na me som o Kristo.”


verso 21

Pe kado pushline lestar: „So san apol? O Illesh san?” Voj kodo phendas: „Chi som.” „Profeta san?” Kodo phendas pe kado: „Na:”


verso 22

Atunchi kodo phendine leske: „Atunchi kon san? Ke vorba trubuj te ingras kodalenge, kon bishaldine amen! So phenes pa tute?”


verso 23

Voj kodo phendas:
„Ande pusta cipisardeski vorba som:
»Lasharen vortaske le Rajesko drom«, sar o Izajash profeta phendas.”


verso 24

Le bishalde mashkar le farizana sasle.


verso 25

Anda kado majdur pushenas les: „Sostar boles apol, kana na tu san o Kristo, haj chi o Illesh, haj chi e profeta?”


verso 26

O Janosh kado phendas lenge: „Me pajesa bolav, ba mashkar tumende tordyol kodo, kas tume chi pinzharen.


verso 27

Voj si kodo, kon pala mande avel, haj kaske chi som dosta chi leske sandalengo brichinari avri te putrav.”


verso 28

Kadal ande Betania pecisardyiline, perdal pa Jordano, kaj o Janosh bolelas.


Le Bolare Janoshesko chacharipe


verso 29

Kaver dyes dikhlas, ke o Jezush avel karing leste. Pe kado kade das duma: „Aketa, le Devlesko Bakro, kon lel la lumake bezexa!


verso 30

Voj si kodo, pa kaste phendom: Palamande avel jekh mursh, kon anglalarel man, ke majanglal sas sar me.


verso 31

Me chi pinzharos les: ba anda kodo avilom pajesa te bolav, ke les te pinzharavav le Izraelesa.”


verso 32

O Janosh chacharipe kerdas haj kado phendas: „Dikhlom, ke o Duho, sar gulunbo tele hural anda cheri haj pe leste ashilas.


verso 33

Chi pinzharos les, ba kon anda kodo bishaldas man, ke pajesa te bolav, kodo phendas mange: »Pe kaste dikhes le Duhos tele te hural haj pe leste te ashol, voj si kodo, kon Suntone Duhosa bolel.«


verso 34

Me dikhlom, haj chacharipe kerdom pa leste, ke voj si le Devlesko Shavo!”


Le anglune sityarde


verso 35

Kaver dyes pale kothe tordyolas o Janosh peske duje sityardenca kethanes.


verso 36

Kana dikhlas le Jezushes, ke intye zhalas, kodo phendas: „Aketa, le Devlesko Bakro.”


verso 37

Le duj sityarde ashundine leske vorbi, haj geline pala o Jezush.


verso 38

O Jezush pale boldaspe, haj kana dikhlas, ke zhan pala leste, pushlas lendar: „So roden?” Kodo phendine leske: „Rabbi – so kodo phenel, ke Maistro –, kaj beshes?”


verso 39

Voj kodo phendas lenge: „Aven, haj dikhenales.” Gelinetar apol, haj dikhline, ke kaj beshel. Kodo dyes leste ashiline. Karing le desh chasura sas.


verso 40

Mashkar le duj, kon kado ashundine kathar o Janosh, haj geline pala leste, o jekh o Andrash sas, le Shimon Peteresko phral.


verso 41

Voj anglunes peske phralesa, le Shimonesa arakhadyilas, haj kodo phendas leske: „Rakhlam le Messhiashos, le Opremakhles!”


verso 42

Haj ingerdas les kaj o Jezush. O Jezush pe leste dikhlas, haj kade das duma: „Tu o Shimon san le Janoshesko shavo. Kefash avla tyo anav.” Kado kodo phenel, ke Peter (so plaj anavarel).


verso 43

Kaver dyes kana o Jezush ande Galilea kamlas te zhal, maladyilas le Filiposa. Kodo phendas leske: „Av pala mande!”


verso 44

O Filip anda Betsaida sas, anda le Andrashesko haj Peteresko foro.


verso 45

O Filip maladyilas le Natanaelesa, haj phenadasles leske: „Rakhlam kodales, pa kaste o Mozesh iskirisardas ande kris haj le profeti: le Jezushes, le Jozhefeske shaves anda Nazaret.”


verso 46

O Natanael pe kado kodo phendas: „Shaj avel variso lasho anda Nazaret?” O Filip kodo phendas leske pe kado: „Av haj dikhles!”


verso 47

Kana o Jezush dikhlas le Natanaeles sar avelas, kodo phendas pa leste: „Aketa, jekh chacho Izraelicko, ande kaste naj xoxamnipe.


verso 48

„O Natanael pushlas les: „Kathar pinzhares man?” O Jezush kodo phendas: „Zhiso majanglal o Filip akhardasas tut, dikhlom tut, kana tala gular kasht sanas.”


verso 49

O Natanael kado phendas palpale: „Rabbi, tu san le Devlesko shavo, tu san le Izraelesko kraj!”


verso 50

O Jezush pe kado kade das duma: „Ke kodo phendom tuke: dikhlom tut tala gular kasht, patyas? Majbare butya dikhesa inke kathar kadal.”


verso 51

Haj kado phendas pashe: „Amen, Amen, phenav tumenge: dikhena o avriputerdyilino cheri, haj ke le Devleske andyela opre tele hurana opral pa Manushesko Shavo.”

Capítulos:


Libros