Evangeliumo kathar o Janosh
capítulo 17
O Jezush kaj o Dad boldelpe
verso 1
Kana o Jezush sa kadal phendas, peske jakha po cheri vazdindes kade das duma: „Muro Dad, reslas o chaso: luvudyisar tye Shaves, ke vi tyo Shavo te luvudyisarel tut,
verso 2
ke saktimo dan les pe sako trupo, ke sakoneske, kas leske dan, sagutno trajo te del.
verso 3
O sagutno trajo pale kodoj, ke te pinzharen tut, le korkorune chache Devles, haj kas bishaldan, le Jezush Kristos.
verso 4
Me luvudyisarav tut pe phuv: kerdom e traba, so pe mande mukhlan.
verso 5
Akanak tu luvudyisar man muro Dad, tute, kodale luvudyimatasa, so muro sas tute, so majanglal e luma sas.
verso 6
Pinzharadom tyo anav le manushenca, saven anda luma mange dan. Von tyire sas, haj mange dan len, haj von inkerdine tyi vorba.
verso 7
Abakanak, avri zhangline, ke sakofalo, so mange dan, tutar si,
verso 8
ke le alava, so mange dan, perdal dom lenge: von linele mandar, haj chachikanes oprepinzhadine, ke tutar avilom, haj patyajline, ke tu bishaldan man.
O Jezush rudyil anda sityarde
verso 9
Anda lende rudyisarav. Na anda luma rudyij, ba anda kodal, kas mange dan, ke von tyire si.
verso 10
Sa kodo so muroj, tyiroj, haj so tyiroj, kodo muroj, haj me luvudyisardyilom ande lende.
verso 11
Me aba chi som ande luma, ba von ande luma si, me pale tute zhav.
Muro Sunto Dad, inker len ande tyiro anav, so mange dan, ke jekh te aven, sar ame.
verso 12
Zhikaj lenca somas, inkerdom len ande tyiro anav, kas mange dan. Inkerdom len, haj khonyik kaver chi xasajlas mashkar lende, numa le nasulesko shavo, ke o iskiripe andre te pherdyol.
verso 13
Akanak pale tute zhav, haj kadal phenav ande luma, ke muri lossh intrego te avel ande lende.
verso 14
Phendom lenge tye alava, haj e luma rucilas len, ke na anda lumate si, ke sar chi me chi som anda luma.
verso 15
Na anda kodo mangav, ke te les len anda luma, ba te feris len kathar o nasul.
verso 16
Na anda lumate si von, sar ke chi me chi som anda lumate.
verso 17
Suntosar len ando chachipe. Tyiro alav chachipej.
verso 18
Sar man ande luma bishaldan, kade bishaldom vi me len ande luma.
verso 19
Anda lende suntosarav man, ke vi von te suntosardyon ando chachipe.
O Jezush rudyil anda kodal, kon patyan
verso 20
Ba na feri anda lende rudyisarav, ba vi anda kodal, kon pa lengi vorba perdal patyana ande mande,
verso 21
ke savorazhene jekh te aven: sar tu, muro Dad, ande mande san, haj me ande tute, kade vi von jekh te aven ande amende, haj kade te patyal e luma, ke tu bishaldan man.
verso 22
Kodo luvudyipe so mange dan, perdal dom lenge, ke jekh te aven, sar ame jekh sam.
verso 23
Me ande lende, tu ande mande, ke chachikanes jekh te aven. Te pinzharel pa kado e luma, ke tu bishaldan man, haj kamlan len, sar man kamlan.
verso 24
Muro Dad, kodo kamav, ke vi von, kas mange dan, kothe te aven manca, kaj me som, ke te dikhen muro luvudyipe, so mange dan, ke kamesas man angla lumako genezaripe.
verso 25
Muro chacho Dad! E luma chi pinzhardas tut, ba me pinzhardom tut, haj vi von pinzhardine, ke tu bishaldan man.
verso 26
Pinzharadom lenca tyo anav, haj vi pinzharavav lenca, ke o kamipe, sosa man kamesas, ande lende te avel, haj me ande lende.”
Libros
