Evangeliumo kathar o Janosh
17. fejezet
O Jezush kaj o Dad boldelpe
1. vers
Kana o Jezush sa kadal phendas, peske jakha po cheri vazdindes kade das duma: „Muro Dad, reslas o chaso: luvudyisar tye Shaves, ke vi tyo Shavo te luvudyisarel tut,
2. vers
ke saktimo dan les pe sako trupo, ke sakoneske, kas leske dan, sagutno trajo te del.
3. vers
O sagutno trajo pale kodoj, ke te pinzharen tut, le korkorune chache Devles, haj kas bishaldan, le Jezush Kristos.
4. vers
Me luvudyisarav tut pe phuv: kerdom e traba, so pe mande mukhlan.
5. vers
Akanak tu luvudyisar man muro Dad, tute, kodale luvudyimatasa, so muro sas tute, so majanglal e luma sas.
6. vers
Pinzharadom tyo anav le manushenca, saven anda luma mange dan. Von tyire sas, haj mange dan len, haj von inkerdine tyi vorba.
7. vers
Abakanak, avri zhangline, ke sakofalo, so mange dan, tutar si,
8. vers
ke le alava, so mange dan, perdal dom lenge: von linele mandar, haj chachikanes oprepinzhadine, ke tutar avilom, haj patyajline, ke tu bishaldan man.
O Jezush rudyil anda sityarde
9. vers
Anda lende rudyisarav. Na anda luma rudyij, ba anda kodal, kas mange dan, ke von tyire si.
10. vers
Sa kodo so muroj, tyiroj, haj so tyiroj, kodo muroj, haj me luvudyisardyilom ande lende.
11. vers
Me aba chi som ande luma, ba von ande luma si, me pale tute zhav.
Muro Sunto Dad, inker len ande tyiro anav, so mange dan, ke jekh te aven, sar ame.
12. vers
Zhikaj lenca somas, inkerdom len ande tyiro anav, kas mange dan. Inkerdom len, haj khonyik kaver chi xasajlas mashkar lende, numa le nasulesko shavo, ke o iskiripe andre te pherdyol.
13. vers
Akanak pale tute zhav, haj kadal phenav ande luma, ke muri lossh intrego te avel ande lende.
14. vers
Phendom lenge tye alava, haj e luma rucilas len, ke na anda lumate si, ke sar chi me chi som anda luma.
15. vers
Na anda kodo mangav, ke te les len anda luma, ba te feris len kathar o nasul.
16. vers
Na anda lumate si von, sar ke chi me chi som anda lumate.
17. vers
Suntosar len ando chachipe. Tyiro alav chachipej.
18. vers
Sar man ande luma bishaldan, kade bishaldom vi me len ande luma.
19. vers
Anda lende suntosarav man, ke vi von te suntosardyon ando chachipe.
O Jezush rudyil anda kodal, kon patyan
20. vers
Ba na feri anda lende rudyisarav, ba vi anda kodal, kon pa lengi vorba perdal patyana ande mande,
21. vers
ke savorazhene jekh te aven: sar tu, muro Dad, ande mande san, haj me ande tute, kade vi von jekh te aven ande amende, haj kade te patyal e luma, ke tu bishaldan man.
22. vers
Kodo luvudyipe so mange dan, perdal dom lenge, ke jekh te aven, sar ame jekh sam.
23. vers
Me ande lende, tu ande mande, ke chachikanes jekh te aven. Te pinzharel pa kado e luma, ke tu bishaldan man, haj kamlan len, sar man kamlan.
24. vers
Muro Dad, kodo kamav, ke vi von, kas mange dan, kothe te aven manca, kaj me som, ke te dikhen muro luvudyipe, so mange dan, ke kamesas man angla lumako genezaripe.
25. vers
Muro chacho Dad! E luma chi pinzhardas tut, ba me pinzhardom tut, haj vi von pinzhardine, ke tu bishaldan man.
26. vers
Pinzharadom lenca tyo anav, haj vi pinzharavav lenca, ke o kamipe, sosa man kamesas, ande lende te avel, haj me ande lende.”
Könyvek
