Evangeliumo kathar o Janosh
10. fejezet
Parabola pa sino
1. vers
„Amen, amen phenav tumenge: Kon na po vudar zhal andre ande bakrengo sino, ba kaver thaneste zhal andre choral, kodo xapavari si haj chor.
2. vers
Kon pale po vudar zhal andre, kodo le bakrengo malyari si.
3. vers
Kadaleske vudar putrel o vudari, le bakre pale ashunen pe leski vorba. Peske bakren pe pengo anav akharel, haj avriingrel len.
4. vers
Kana pala soste sa avrimuklas peskiren, angla lende zhal, le bakre pale zhan pala leste, ke pinzharen lesko glaso.
5. vers
Pala streno pale chi zhan, ba nashentar lestar, ke le strenongo glaso chi pinzharen.”
6. vers
Kadi parabola phendas lenge o Jezush, ba von chi hatyardine, ke so phendas.
7. vers
O Jezush pala kado pale vorbilas: „Me som le bakrengo vudar.
8. vers
Savorazhene, kon anglamande aviline, xapavara si thaj chor, haj le bakre china chi ashundine pe lende.
9. vers
Me som o vudar: kon pa mande perdal zhal andre, muntosajvel, andre phirel haj avri phirel, haj pe mal arakhel.
10. vers
O xapavari numa anda kodo avel, te chorel, te mudarel haj te xalyarel. Me anda kodo avilom, trajo te avel len, haj ando mishtyipe te aven.
O Jezush o lasho malyari
11. vers
Me som o lasho malyari. O lasho malyari pesko trajo del anda bakre.
12. vers
O sluga, kon naj malyari, kaske naj leske le bakre, kana dikhel, ke avel o ruv, mukel le bakren haj nashentar – o ruv pale xutyilel len haj sa nashavel kodolen –,
13. vers
ke slugaj, haj chi grizhojpe le bakrenca.
14. vers
Me som o lasho malyari: pinzharav muren, haj mure pinzharen man,
15. vers
sar man pinzharel o Dad, haj me pinzharev le Dades: haj me muro trajo dav anda bakre.
16. vers
Vi kaver bakre si man, save na anda kado sino sile. Vi kodalen trubuj te grizhoj. Ashunena pe muri vorba, haj jekh sino avla, haj jekh malyari.
17. vers
Anda kodo kamel man o Dad, ke kothe dav muro trajo, ke pale palpale te lav kodo.
18. vers
Khonyik chi lelles mandar: me davles mandar kothe. Saktimo si man, kothe te davles, haj saktimo si man vi palpale te lavles. Kado vladipe lom kathar muro Dad.”
19. vers
Pale shindyipe kerdyilas mashkar le bibolde anda kadal vorbi.
20. vers
Ke but zhene kodo phendine: „Beng siles, haj dilyajlas! Sostar ashunen les?”
21. vers
Kavera kodo phendine: „Kadal na jekhe bengaleske vorbimataj. Dore, o beng shaj putrel opre le korrenge jakha?”
22. vers
Ando Jeruzhalemo avilastar o baro dyes kana suntosaren la khangera. Jivend sas.
23. vers
O Jezush ande khangeri phirelas, ande Shalamonesko ambito.
24. vers
Le bibolde krujal line les haj kodo phendine leske: „Sode vrama inkres amen inke ande labilimata. Tu te san o Kristo, phen avriamenge uzhes!”
25. vers
O Jezush kodo phendas lenge: „Phendom tumenge, ba chi patyan. Chacharen pa mande le kerdyimata, so ande mure Dadesko anav kerav,
26. vers
ba tume chi patyan, ke tume chi sanle mashkarutne anda mure bakre.
27. vers
Mure bakre ashunen pe muri vorba: me pinzharav len, von pale aven pala mande,
28. vers
haj me sagutno trajo dav len. Chi xasalyventar chikana haj khonyik chi lel len anda muro vast.
29. vers
So muro Dad mange das, kodo sakofalestar majbaro si, haj khonyik nashtig lel les avri anda Dadesko vast.
31. vers
Pe kado le bibolde pale barr xutyildine, te shuden les barrenca.
32. vers
O Jezush kodo phendas lenge: „But lashe kerdyimata sikadom tumenge kathar o Dad, mashkar kodal anda savo kamen te shuden pe mande barraren?”
33. vers
Le bibolde kodo phendine: „Anda lashimata chi shudas tut barrenca, ba anda kushlimata, ke manush san haj Devleske keres tut.”
34. vers
O Jezush kodo phendas lenge: „Dore, ande tumare krisa naj iskirime: »Me kodo phendom: Tume Devle san«?
35. vers
Kana kodalen phendas devlenge, kaste le Devleske alava resenas – haj ke o iskiripe peski zor chi xasarel –,
36. vers
sar shaj phenen pa kodo, kas o Dad suntosardas haj pe luma bishaldas: »Kushes!«, ke kodo phendom: le Devlesko Shavo som?
37. vers
Tena kerav mure dadeske trabi, na patyan mange,
38. vers
ba te keravle, atunchi, kana mange china chi patyan, patyan le kerdyimatange, te zhanenles haj andre te dikhenles, ke o Dad ande mande si, haj me ando Dad.”
39. vers
Pe kado pale kamline les te xutyilen, ba slobodisajlas anda lenge vast.
O Jezush perdal pa Jordano
40. vers
Pala kado pale gelastar perdal pa Jordano, kaj o Janosh majanglal bolelas, haj kothe ashilas.
41. vers
But zhene aviline leste haj kodo phendine: „Apol o Janosh khanchi chudicka somnura chi kerdas, ba sa kodo, so o Janosh pa leste phendas, chaches sas.
42. vers
Haj kothe butzhene patyanas ande leste.
Könyvek
