Evangeliumo kathar o Janosh
13. fejezet
Le punrengo thovjipe
1. vers
Angla Patradyako barodyes o Jezush zhanelas, ke avilastar lesko chaso, ke perdal te zhal anda kadi luma kaj o Dad, ba chaches kamelas peskiren, kon ande luma sas, sagutnes kamelas len.
2. vers
Kana sas o xamo, haj kana aba o beng ande Judashesko ilo phurdas, le ishkariotickone Shimoneske shaveske, ke te purrisarel les,
3. vers
o Jezush zhanindes, ke sakofalo ande lesko vast das o Dad, haj ke kathar o Del avilastar haj kaj o Del zhal palpale,
4. vers
opreushtyilas kathar o xamo, tele shutas peske opralutne gada, xutyildas jekh dikhlo haj angla peste phanglasles.
5. vers
Pala kodo paji shordas ande thovjimasko vaso, haj las te thovel le sityardenge punre, pala kodo khoslasle kodale dikhlesa so pe lesko mashkar sas phanglo.
6. vers
Kana kothe reslas kaj o Shimon Peter, kodo kade das duma: „Raja, tu thoves mure punre?”
7. vers
O Jezush kodo phendas leske: „So me kerav, kodo tu akanak chi hatyares, ba majpalal hatyaresales.”
8. vers
O Peter pe kado kade das duma: „Mure punre apol chi tovesa chi kana!” O Jezush kodo phendas leske: „Tena thovav tut, chi avla tut rig manca.”
9. vers
Atunchi o Shimon Peter kodo phendas: „Raja, na feri mure punre, ba vi mure vast haj vi moro shero!”
10. vers
O Jezush kodo phendas pe kado: „Kon najilas, kodaleske dostaj kana feri leske punre thoven, atunchi intregones uzhoj. Vi tume uzhe san, ba na savorazhene.”
11. vers
Ke zhanelas, ke kon si, kon purril les, anda kodo phendas: „Chi san savorazhene uzhe.”
12. vers
Pala soste thodas lenge punre haj palpale las peske opralutne gada, pale tele beshlas haj kodo phendas lenge: „Zhanen tume apol, ke so kerdom tumenca?
13. vers
Tume kade akharen man: »Maistro« haj »Raj«, haj mishto phenen, ke kodo som.
14. vers
Kana apol, me o Raj o Maistrovo thodom tumare punre, vi tumenge trubuj te thoven jekhavreske punre.
15. vers
Ke parabola sikadom tumenge, ke so me kerdom tumenca, vi tume kade te keren.
16. vers
Amen, amen phenav tumenge: Naj majbaro o sluga kathar pesko raj, haj chi o bishaldo naj majbaro kathar kodo, kon les bishaldas.
17. vers
Haj apol, ke kadal aba zhanen, anande san, vi te kerenales.
18. vers
Na pa savorazhene phenav kado: zhanav me kas alosardom. Ba le Iskirimatake andre trubuj te pherdyol: »Kon muro manro xal, peski koch vazdas pe mande«.
19. vers
Aba akanak phenav tumenge, so anglal pecisardyolas, ke kana andre pherdyola, te patyan, ke me som.
20. vers
Amen, amen, phenav tumenge: Kon andre svagarel kodales, kas me bishalav, man svagarel andre, haj kon pale man svagarel andre kodales svagarel andre, kon man bishaldas.”
21. vers
Palasoste kadal phendas, o Jezush mishkisajlas ande pesko duho, haj chacharipe kerdas le vorbenca: „Amen, amen phenav tumenge: Jekh mashkar tumende purril man.”
22. vers
Le sityarde pe jekhavreste dikhline, ke pa kaste phenel kado.
23. vers
Mashkar leske sityarde o jekh, kas o Jezush kamelas, kaj o Jezush pashe beshlas tele.
24. vers
O Shimon Peter sikadas leske, ke te pushel: „Kon si pa kaste vorbil?”
25. vers
Kodo kothe bandyilas kaj o Jezush, haj pushlasles lestar: „Raja, kon si kodo?”
26. vers
O Jezush kodo phendas: „Kodo, kaske o andre boldo manro dav.” Pala kodo andre boldas o manro, haj kothe dasles le Judasheske, le ishkarioticone Shimoneske shaveske.
27. vers
Kana kodo o manro las, ande kodo minuto ande leste huralylas o shatano. O Jezush pale kodo phendas leske: „So keres, kerles sigo!”
28. vers
Mashkar kodal kon kaj e mesalya beshenas khonyik chi hatyarlas, sostar phendas kado leske.
29. vers
Ke kaj o Judash sas e trasta, sas kon kodo gindisardine, ke o Jezush kodo phendas leske: „Kin kodo, so trubuj amen pel baredyesa!”, bake le chorrenge te del variso.
30. vers
Voj pale pala soste las o manro, sigo avrigelas. Ratyi sas.
O nyevo vladipe
31. vers
Pala soste avrigelas, o Jezush kade das duma: „Akanak luvudyisajlas le Manushesko Shavo, haj o Del luvudyisajlas ande leste.
32. vers
Kana o Del luvudyisajlas ande leste, vi o Del luvudyisarel les ande peste, napa buteste luvudyisarela les.
33. vers
Mure shavora, aba feri cerra vrama som tumenca. Rodena man, ba sar aba le biboldenge phendom, akanak vi tumenge phenav: Kaj me zhav, kothe tume nashtig aven.
34. vers
Nyevo vladipe dav tumen, ke te kamen jekhavres: sar me kamos tumen, kade kamen vi tume jekhavren.
35. vers
Pa kodo pinzharela sakon, ke mure sityarde san, ke kamipesa san karing jekhavreste.”
Le Petereske asvikarimasko profecipe
36. vers
Atunchi o Shimon Peter duma das: „Raja, kaj zhas?” O Jezush kodo phendas: „Kaj me akanak zhav, kothe akanak nashtig aves pala mande, ba majpalal avesa pala mande.”
37. vers
O Peter pushlas les: „Raja, sostar nashtig zhav akanak pala tute? Vi muro trajo kothe dos anda tute!”
38. vers
O Jezush kodo phendas: „Tyo trajo desas anda mande? Amen, amen phenav tuke: Pe soste o bashno cipila, trivar asvikaresa man.
Könyvek
