Evangeliumo kathar o Janosh
14. fejezet
O Jezush si kaj o Dad inkerdo drom
1. vers
Tena daral tumaro ilo. Patyan ando Del, haj vi ande mande patyan.
2. vers
Ande mure Dadesko kher but than si. Apol na kade te avilno, dore phendomas tumenge, ke zhavtar than te lasharav tumenge?
3. vers
Haj kana aba gelomtar haj than lashardom tumenge, pale avotar, haj mande lav tumen, ke kaj me som, vi tume kothe te aven.
4. vers
Ke pinzharen o drom kothe, kaj me zhav.”
5. vers
O Tamash pe kado kodo phendas leske: „Raja, chi zhanas, kaj zhas, sar shaj pinzharasas o drom?”
6. vers
O Jezush kodo phendas leske: „Me som o drom, o chachipe haj o trajo. Khonyik chi resel kaj o Dad, feri perdal pa mande.
7. vers
Man te pinzhardinesas, vi mure Dades pinzharenas. Ba kathar kado pinzharen les haj dikhline les.”
8. vers
Atunchi o Filip pushlas les: „Raja, sikav amenge le Dades, haj kodo dostaj amenge!”
9. vers
O Jezush kade das duma palpale leske: „Aba kattyi vrama ke tumenca som, haj chi pinzhardan man Filip? Kon man dikhlas, le Dades dikhlas. Sar shaj phenes apol: »Sikav amenge le Dades«?
10. vers
Chi patyas, ke me ando Dad som, haj o Dad ande mande? Le alava, so me phenav tumenge, na mandar phenav, ba o Dad, kon ande mande beshel, voj kerel peske trabi.
11. vers
Patyan mange, ke me ando Dad som, haj o Dad ande mande. Kana anda kaver na, atunchi barem anda kerdyimata patyan.
12. vers
Amen, amen phenav tumenge: Kon patyal ande mande, zhikodal trabi kerela, so me kerav, haj inke vi majbare kerela kathar kodal, ke me kaj o Dad zhav.
13. vers
Zhiso mangen ande muro anav, kerav kodo, ke o Dad te luvudyisajvel ando Shavo.
14. vers
Kana variso mangen mandar ande muro anav, kerav kodo.
Le Sunto Duhoski bishavlimaski vorba
15. vers
Te kamen man inkren mure vladimata.
16. vers
Me pale mango le Dades, haj kaver Ushores dela tumen, ke tumenca te avel sagutnes:
17. vers
le chachimasko Duhos, kas e luma nashtig lel, ke chi dikhel les haj chi pinzharel les. Ba tume pinzharena les, ke tumende ashola haj ande tumende avla.
18. vers
Chi mukav tumen geres, avotar tumende.
19. vers
Inke jekh cerra vrama, haj e luma chi dikhela man majbut. Ba tume dikhen man, ke me trajiv, haj vi tume trajina.
20. vers
Pe kodo dyes maj zhanenala, ke me ando Dad som, tume pale ande mande, haj me ande tumende.
21. vers
Kon pinzharel mure vladimata haj vi andre inkrel kodalen, kamel man. Kon pale kamel man, kodales vi muro Dad kamela, vi me kamoles, haj avrisikavav man leske.”
22. vers
Atunchi duma das o Judash, na o ishkarioticko: „Raja, sostar si kodo, ke amenge kames tut avri te sikaves, haj na la lumake?”
23. vers
O Jezush kado phendas leske: „Kana varikon kamel man, inkrel muri vorba. Vi muro Dad kamela les, leste zhas, haj beshlimasko than kinas leste.
24. vers
Kon chi kamel man, chi inkrel mure alava. O alav pale so ashundine, na muroj, ba le Dadesko, kon bishaldas man.
25. vers
Kadal phendom tumenge zhikaj tumenca somas.
26. vers
O Ushori pale, o Sunto Duhoj, kas o Dad bishalel ande muro anav, sityarela tumen pe sakofaloste, haj ande tumari godyi anel sakofalo, so me phendom tumenge.
27. vers
Pacha mukav pe tumende, muri pacha dav tumenge. Na kade davla tumenge, sar e luma del. Tena daral tumaro ilo.
28. vers
Ashundine, ke kodo phendom tumenge: „Zhavtar, haj palpale avo tumende, te kamenas man, losshanas kodoleske, ke kaj o Dad zhav, ke o Dad majbaroj mandar.
29. vers
Phendomles aba tumenge aba vi akanak, zhiso majanglal pecisardyolas, ke kana andre pherdyol, te patyan.
30. vers
Abakanak na but vorbisarav tumenca, ke avel la lumako kraj: pe mande apol najles saktimo,
31. vers
ba te zhanel e luma, ke kamav le Dades, haj kade kerav sar o Dad muklas mange: ushtyen opre, zhastar kathar.
Könyvek
