Evangeliumo kathar o Janosh
21. fejezet
O opretrajisardino sikadyol kaj o paji
1. vers
Pala kadal o Jezush pale sikadyilas le sityardenge, kaj e Tiberiasheski mara. Kade sikadyilas:
2. vers
Kethane sas o Shimon Peter, o Tamash, kas Ikereske akharenas, anda galileicko Kana o Natanael, le Zebedeusheske shave, haj inke kaver duj mashkar leske sityarde.
3. vers
O Shimon Peter kodo phendas lenge: „Zhavtar te masharav.” Kodal kodo phendine leske palpale: „Zhas tusa vi ame.” Gelinetar apol, haj andre hulyiline ando bero, ba kodi ratyi khanchi chi xutyildine.
4. vers
Kana aba zorisardyilas, o Jezush pe dolma tordyolas, ba le sityarde chi zhanenas, ke o Jezush si kodo.
5. vers
O Jezush kodo phendas lenge: „Mure shave, naj tumen variso xamasko?” Kodo phendine: „Naj!”
6. vers
Voj atunchi kodo phendas lenge: „Shuden avri o xudro pe beroski chachi rig, haj rakhena!” Avrishudineles, ba avri te cirdenles aba chi zhanenas kathar le zurales but mashe.
7. vers
Atunchi kodo sityardo, kas o Jezush kamelas, kade das duma kaj o Peter: „O Raj si kodo!” Kana o Shimon Peter ashundas, ke o Raj si kodo, pe peste las pesko pluvialo, ke dopash nago sas, haj ande mara xuttyilas.
8. vers
Le majbut sityarde pale le berosa aviline avri, ke nasle dur kathar e dolma, numa karing le dujshela kuja dur, haj cirdenas pala pende le mashenca pherdyiline xudros.
9. vers
Kana avri hulyiline pe dolma, phabardo zharo dikhline, pe leste mashes haj pasha leste manres.
10. vers
O Jezush kodo phendas lenge: „Anen anda mashe, saven akanak xutyildine!”
11. vers
Pe kado o Shimon Peter palpale gelas, haj pe dolma cirdas o xudro, savo pherdo sas shel thaj panzhvardesh thaj trine bare mashenca. Haj chaches ke kattyi sas, ba chi shindyolas o xudro.
12. vers
O Jezush kodo phendas lenge: „Aven, xan!” Mashkar le sityarde khonyik chi tromajlas te pushel les: „Kon san tu?” Ke zhanenas, ke o Raj si kodo.
13. vers
O Jezush kothe gelas, xutyildas o manro, kothe dasles lenge, zhikade vi le mashes.
14. vers
O Jezush aba po trito sikadyilas le sityardenge zhikathar kodo, ke opretrajisardyilas anda meripe.
Le opretrajisardeske vorbi kaj o Peter
15. vers
Pala soste xaline, o Jezush pushlas le Shimon Peteres: „Shimon, le Janoshesko shavo, dore maj feder kames man, sar kadal?” Voj kodo phendas: „Ova, Raja, tu zhanes, ke kamav tut!” Pe kado kodo phendas leske: „Le sama pe mure bakre!”
16. vers
Pala kodo vi po dujto pushlas: „Shimon, le Janoshesko shavo, kames tu man?” Kodo phendas palpale: „Ova, Raja, tu zhanes, ke kamav tut!” Pe kado kodo phendas leske: „Le sama pe mure bakre!”
17. vers
Pala kodo pale pushlas les: „Shimon, le Janoshesko shavo, kames tu man?”, haj kodo phendas: „Raja, tu sakofalo zhanes, tu zhanes, ke kamav tut!” Atunchi kade das duma: „Le sama pe mure bakre!
18. vers
Amen, amen phenav tuke: kana majterno sanas, oprebrichinaresas tut, haj kothe zhasas, kaj kamesas. Kana apol phuro kerdyos, avrilunzhares tye vast: kaver brichinarel tut opre, haj kothe ingrel tut, kaj chi kames.”
19. vers
Kado pale anda kodo phendas, ke te somnosarel, ke soske meripesa luvudyisarela les o Del. Pala soste kado phendas, kade das duma: „Av pala mande!”
20. vers
Sar o Peter palpale boldaspe, dikhlas, ke avel pala leste kodo sityardo, kon kaj o xamo, pashe bandyilas kaj o Jezush, haj pushlas les: „Raja, kon si kon tut purril?”
21. vers
Kana apol o Peter dikhlas les, pushlas kathar o Jezush: „Raja haj voj?”
22. vers
O Jezush kodo phendas leske: „Kodo te kamav te ashol, zhikaj avavtar, so grizhostu lesa? Tu av pala mande!”
23. vers
Anda kado mashkar phral kodo phenipe phirelas, ke kodo sityardo chi merela. Ba apol o Jezush na kodo phendas leske: „Chi merel”, ba kodo: „Kodo te kamav, te ashol, zhikaj avavtar, so grizhostu lesa?”
Andre phandade vorbi kaj o evangeliumo
24. vers
Kado sityardo, kon chacharipe kerel sa pa kadal, haj kon kadal iskirisardas. Zhanas, ke chachoj lesko chacharipe.
25. vers
Si inke vi but kaver trabi, so o Jezush kerdas, haj kodal jekh pala jekh tele te iskirinas, kade gindisarav, chi e intrego luma chi zhanelas andre te svagarel le hertiji, saven trubujas te iskirin.
Könyvek
