chapter 17
Kana o Jezush sa kadal phendas, peske jakha po cheri vazdindes kade das duma: „Muro Dad, reslas o chaso: luvudyisar tye Shaves, ke vi tyo Shavo te luvudyisarel tut,
ke saktimo dan les pe sako trupo, ke sakoneske, kas leske dan, sagutno trajo te del.
O sagutno trajo pale kodoj, ke te pinzharen tut, le korkorune chache Devles, haj kas bishaldan, le Jezush Kristos.
Me luvudyisarav tut pe phuv: kerdom e traba, so pe mande mukhlan.
Akanak tu luvudyisar man muro Dad, tute, kodale luvudyimatasa, so muro sas tute, so majanglal e luma sas.
Pinzharadom tyo anav le manushenca, saven anda luma mange dan. Von tyire sas, haj mange dan len, haj von inkerdine tyi vorba.
Abakanak, avri zhangline, ke sakofalo, so mange dan, tutar si,
ke le alava, so mange dan, perdal dom lenge: von linele mandar, haj chachikanes oprepinzhadine, ke tutar avilom, haj patyajline, ke tu bishaldan man.
Anda lende rudyisarav. Na anda luma rudyij, ba anda kodal, kas mange dan, ke von tyire si.
Sa kodo so muroj, tyiroj, haj so tyiroj, kodo muroj, haj me luvudyisardyilom ande lende.
Me aba chi som ande luma, ba von ande luma si, me pale tute zhav.
Muro Sunto Dad, inker len ande tyiro anav, so mange dan, ke jekh te aven, sar ame.
Zhikaj lenca somas, inkerdom len ande tyiro anav, kas mange dan. Inkerdom len, haj khonyik kaver chi xasajlas mashkar lende, numa le nasulesko shavo, ke o iskiripe andre te pherdyol.
Akanak pale tute zhav, haj kadal phenav ande luma, ke muri lossh intrego te avel ande lende.
Phendom lenge tye alava, haj e luma rucilas len, ke na anda lumate si, ke sar chi me chi som anda luma.
Na anda kodo mangav, ke te les len anda luma, ba te feris len kathar o nasul.
Na anda lumate si von, sar ke chi me chi som anda lumate.
Suntosar len ando chachipe. Tyiro alav chachipej.
Sar man ande luma bishaldan, kade bishaldom vi me len ande luma.
Anda lende suntosarav man, ke vi von te suntosardyon ando chachipe.
Ba na feri anda lende rudyisarav, ba vi anda kodal, kon pa lengi vorba perdal patyana ande mande,
ke savorazhene jekh te aven: sar tu, muro Dad, ande mande san, haj me ande tute, kade vi von jekh te aven ande amende, haj kade te patyal e luma, ke tu bishaldan man.
Kodo luvudyipe so mange dan, perdal dom lenge, ke jekh te aven, sar ame jekh sam.
Me ande lende, tu ande mande, ke chachikanes jekh te aven. Te pinzharel pa kado e luma, ke tu bishaldan man, haj kamlan len, sar man kamlan.
Muro Dad, kodo kamav, ke vi von, kas mange dan, kothe te aven manca, kaj me som, ke te dikhen muro luvudyipe, so mange dan, ke kamesas man angla lumako genezaripe.
Muro chacho Dad! E luma chi pinzhardas tut, ba me pinzhardom tut, haj vi von pinzhardine, ke tu bishaldan man.
Pinzharadom lenca tyo anav, haj vi pinzharavav lenca, ke o kamipe, sosa man kamesas, ande lende te avel, haj me ande lende.”
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly