Evangeliumo kathar o Janosh

chapter 4


Chapters:


Vorbisaripe la samaricka romnyasa


verse #1

Kana o Jezush avrizhanglas, ke le farizana ashundine, ke o Jezush majbut sityarden lel peste haj bolel, sar o Janosh


verse #2

– ba voj o Jezush chi bolelas, numa leske sityarde –,


verse #3

mukhlas la Judea, haj pale ande Galilea gelas.


verse #4

Perdal trubusardas te zhal pa Samaria.


verse #5

Reslas apol ande Samariako jekh foro, saves Sikareske anavaren, pashe kaj kodi phuv, saves o Jakob peske shaveske, le Jozhefeske das.


verse #6

Kothe sas le Jakobeski xajing. O Jezush atunchi khinyilas kathar o drom, haj tele beshlas kaj e xajing. Dore karing le shov chasura phirelas e vrama.


verse #7

Kothe avilas jekh samaricko romnyi, ke paji te cirdel. O Jezush kado phendas lake: „De man te pav!”


verse #8

Ke leske sityarde gelinetar ando foro, xamasko te kinen.


verse #9

E samaricko romnyi kodo phendas leske: „Kana biboldo san, sar shaj manges mandar te pes, kana me samaricko romnyi sim?” Ke le bibolde chi vorbin le samarickirenca.


verse #10

O Jezush kado phendas: „Te pinzharesas le Devleski tofna, haj ke kon si kodo, kon phenel tuke: »De man te pav«, dore tu manglanas les, haj voj trajimasko paji dinosas tut.”


verse #11

E romnyi kade das duma: „Raja, haj china naj tut khanchi sosa cirdesas, e xajing pale milnoj: kathar lesas apol o trajimasko palyi?


verse #12

Dore chi san majbaro kathar amaro Jakob dad, kon amenge e xajing das, anda soste vi voj, haj vi lesko shavo haj leske pedura piline?


verse #13

O Jezush kado phendas: „Sa kodo kon anda kado paji pel, pale trushajvela,


verse #14

ba kon anda kodo paji pela, so me dav leske, chikana trushajvelatar, ba o paji, so dav les, po sagutno trajo shordyilino ab avla ande leste.”


verse #15

Pe kado e romnyi kade das duma: „Raja, de mange kodo paji, ke tena trushajvav, haj tena phirav kathe te cirdav o paji!”


verse #16

O Jezush kado phendas lake: „Zhatar, haj akhar tye romes, haj av kathe!”


verse #17

E Romnyi pe kado kodo phendas, ke: „Naj man rom.” O Jezush kado phendas lake: „Mishto phendan: »Naj man rom«.


verse #18

Ke panzh rom sas tut, haj kon akanak si tut, kodo naj tyo rom. Kado mishto phendan.”


verse #19

E romnyi atunchi kade das duma: „Raja, dikhav ke profeta san.


verse #20

Amare dada pe kado plaj luvudyinas le Devles, tume pale kodo phenen, ke ando Jeruzhalemo si o than, kaj les trubuj te luvudyisaren.”


verse #21

O Jezush kado phendas lake: „Patya mange romnye, ke avlatar o chaso, kana chi pe kado than, haj chi ando Jeruzhalemo chi luvudyina le Dades.


verse #22

Tume kodo luvudyisaren, so chi pinzharen, ame kodo luvudyisaras, so pinzharas, ke o muntusardyipe kathar le bibolde si.


verse #23

Ba avelatar o chaso, haj aba vi kathe si, kana le chache luvudyisara ando Duho haj chachipe luvudyina le Dades, ke o Dad kasave luvudyisaren rodel peske.


verse #24

O Del duhoj, haj kon les luvudyin, ando Duho haj chachipe trubuj te luvudyisaren les.”


verse #25

E romnyi pe kado kodo phendas: „Zhanav, ke avelatar o Messhiasho, kas Kristoske anavaren, haj kana voj avelatar, avriphenel amenge sakofalo.”


verse #26

O Jezush kado phendas lake: „Me som kodo, kon tusa vorbijma.”


O Jezush haj le samaricka


verse #27

Atunchi kothe resline leske sityarde, haj bari dikhline, ke romnyasa vorbisardas. Ba chi kade chi pushlas mashkar lende khonyik: „So kames, bake so vorbis lasa?”


verse #28

E Romnyi pale kothe mukhlas pesko khoro, gelastar ando foro, haj duma das le manushenge:


verse #29

„Aven, dikhen le manushes, kon phendas mange sakofalo, so kerdem. Dore, na voj si o Kristo?”


verse #30

Kodal pe kado avrigeline anda foro, haj kothe geline leste.


verse #31

Ba tala kadi vrama leske sityarde mangenas les: „Rabbi, xa!”


verse #32

Voj kodo phendas lenge: „Si man xamasko, pa soste tume chi zhanen.”


verse #33

Le sityarde jekhavres pushenas: „Shajke andas leske varikon, te xal?”


verse #34

Ba o Jezush kade vorbilas maj dur: „Muro xamasko kodoj, ke kodalesko kamipe te kerav, kon bishaldas man, te lasharav lesko kerdyipe.


verse #35

Chaches tume phenen: Inke shtar shon, haj resla o kosipe? Aketa, phenav tumenge: Vazden opre tumare jakha, haj dikhen le plugasle phuva, ke reslas aba pe lende o kosipe.


verse #36

O Kosari lela pesko potyinipe, haj upaj kidel po sagutno trajo, ke kethane te losshal o beshavari le kosaresa.


verse #37

Ke ande kodo chachipe si la phenimatake: ke kaver si kodo, kon beshavel, haj kaver kon kosil.


verse #38

Bishaldom tumen, ke tele te kosin so na tume butyardine. Kaver khinyarde pen, haj tume ande lengo than tordyiline andre.”


verse #39

Anda kodo foro, mashkar le samaritana but zhene patyanas ande leste pe romnyaki vorba, kon chacharelas les: „Phendas mange sakofalo so kerdem.”


verse #40

Kana apol le samaritana kothe geline leste, mangenas les, te ashol lende. Duj dyes vi kothe ashilas.


verse #41

Atunchi aba majbut zhene patyanas anda lesko sityaripe.


verse #42

La romnyake pale kodo phendine: „Abakanak aba na anda tyiri vorba patyas, ba anda kodo, ke ame ashundam, haj zhanas, ke voj chachikanes la lumako muntori si.”


Sastyaripe ande Galilea


verse #43

Pala duj dyes gelastar kothar ande Galilea.


verse #44

O Jezush aba pa peste chachardas, ke le profetas naj patyiv ande pesko them,


verse #45

ba vi kade, kana ande Galilea reslas, andre svagardine les le galileicka, ke dikhline sa kodo, so ando Jeruzhalemo kerdas pe bare dyesa, ke vi von opregeline pe baredyesa.


verse #46

Pale gelastar apol ande galileicko Kana, kaj anda paji mol kerdas. Sas jekh krajicko raj, kasko shavo nasvalo sas ando Kafarnaumo.


verse #47

Kana ashundas, ke o Jezush anda Judea ande Galilea avilas, gelastar leste, haj manglas les, ke te aveltar haj te sastyarel leske shaves, ke aba kodo po meripe sas.


verse #48

Pe kado o Jezush kodo phendas leske: „Kana feri somnura haj chudimata chi dikhen, chi patyan!”


verse #49

O krajicko raj pe kado kodo phendas: „Raja, avtar, zhikaj chi merel muro shavoro!”


verse #50

O Jezush kodo phendas leske: „Zha, tyo shavo trajil!” Patyalas o manush la vorbake, so o Jezush phendas leske, haj gelastar.


verse #51

Kana inke khere zhalas numa, aba leske slugi angla leste avenas, haj phendine leske, ke lesko shavo trajil.


verse #52

Avrizhanglas lendar, ke ande savo chaso kerdyilas majfeder. Kodo phendine leske: „Aratyi ando eftato chaso mukhlas les o javrope.”


verse #53

Kade hatyardas o dad, ke kodo ande kodo chaso pelaspe, kana o Jezush kodo phendas leske: „Tyo shavo trajil.” Haj patyalas voj haj sakon ande lesko kher.


verse #54

Kado aba o dujto chudicko somno sas, so o Jezush kerdas, kana anda Judea ande Galilea gelas.

Chapters:


Books