Evangeliumo kathar o Janosh
capítulo 4
Vorbisaripe la samaricka romnyasa
verso 1
Kana o Jezush avrizhanglas, ke le farizana ashundine, ke o Jezush majbut sityarden lel peste haj bolel, sar o Janosh
verso 2
– ba voj o Jezush chi bolelas, numa leske sityarde –,
verso 3
mukhlas la Judea, haj pale ande Galilea gelas.
verso 4
Perdal trubusardas te zhal pa Samaria.
verso 5
Reslas apol ande Samariako jekh foro, saves Sikareske anavaren, pashe kaj kodi phuv, saves o Jakob peske shaveske, le Jozhefeske das.
verso 6
Kothe sas le Jakobeski xajing. O Jezush atunchi khinyilas kathar o drom, haj tele beshlas kaj e xajing. Dore karing le shov chasura phirelas e vrama.
verso 7
Kothe avilas jekh samaricko romnyi, ke paji te cirdel. O Jezush kado phendas lake: „De man te pav!”
verso 8
Ke leske sityarde gelinetar ando foro, xamasko te kinen.
verso 9
E samaricko romnyi kodo phendas leske: „Kana biboldo san, sar shaj manges mandar te pes, kana me samaricko romnyi sim?” Ke le bibolde chi vorbin le samarickirenca.
verso 10
O Jezush kado phendas: „Te pinzharesas le Devleski tofna, haj ke kon si kodo, kon phenel tuke: »De man te pav«, dore tu manglanas les, haj voj trajimasko paji dinosas tut.”
verso 11
E romnyi kade das duma: „Raja, haj china naj tut khanchi sosa cirdesas, e xajing pale milnoj: kathar lesas apol o trajimasko palyi?
verso 12
Dore chi san majbaro kathar amaro Jakob dad, kon amenge e xajing das, anda soste vi voj, haj vi lesko shavo haj leske pedura piline?
verso 13
O Jezush kado phendas: „Sa kodo kon anda kado paji pel, pale trushajvela,
verso 14
ba kon anda kodo paji pela, so me dav leske, chikana trushajvelatar, ba o paji, so dav les, po sagutno trajo shordyilino ab avla ande leste.”
verso 15
Pe kado e romnyi kade das duma: „Raja, de mange kodo paji, ke tena trushajvav, haj tena phirav kathe te cirdav o paji!”
verso 16
O Jezush kado phendas lake: „Zhatar, haj akhar tye romes, haj av kathe!”
verso 17
E Romnyi pe kado kodo phendas, ke: „Naj man rom.” O Jezush kado phendas lake: „Mishto phendan: »Naj man rom«.
verso 18
Ke panzh rom sas tut, haj kon akanak si tut, kodo naj tyo rom. Kado mishto phendan.”
verso 19
E romnyi atunchi kade das duma: „Raja, dikhav ke profeta san.
verso 20
Amare dada pe kado plaj luvudyinas le Devles, tume pale kodo phenen, ke ando Jeruzhalemo si o than, kaj les trubuj te luvudyisaren.”
verso 21
O Jezush kado phendas lake: „Patya mange romnye, ke avlatar o chaso, kana chi pe kado than, haj chi ando Jeruzhalemo chi luvudyina le Dades.
verso 22
Tume kodo luvudyisaren, so chi pinzharen, ame kodo luvudyisaras, so pinzharas, ke o muntusardyipe kathar le bibolde si.
verso 23
Ba avelatar o chaso, haj aba vi kathe si, kana le chache luvudyisara ando Duho haj chachipe luvudyina le Dades, ke o Dad kasave luvudyisaren rodel peske.
verso 24
O Del duhoj, haj kon les luvudyin, ando Duho haj chachipe trubuj te luvudyisaren les.”
verso 25
E romnyi pe kado kodo phendas: „Zhanav, ke avelatar o Messhiasho, kas Kristoske anavaren, haj kana voj avelatar, avriphenel amenge sakofalo.”
verso 26
O Jezush kado phendas lake: „Me som kodo, kon tusa vorbijma.”
O Jezush haj le samaricka
verso 27
Atunchi kothe resline leske sityarde, haj bari dikhline, ke romnyasa vorbisardas. Ba chi kade chi pushlas mashkar lende khonyik: „So kames, bake so vorbis lasa?”
verso 28
E Romnyi pale kothe mukhlas pesko khoro, gelastar ando foro, haj duma das le manushenge:
verso 29
„Aven, dikhen le manushes, kon phendas mange sakofalo, so kerdem. Dore, na voj si o Kristo?”
verso 30
Kodal pe kado avrigeline anda foro, haj kothe geline leste.
verso 31
Ba tala kadi vrama leske sityarde mangenas les: „Rabbi, xa!”
verso 32
Voj kodo phendas lenge: „Si man xamasko, pa soste tume chi zhanen.”
verso 33
Le sityarde jekhavres pushenas: „Shajke andas leske varikon, te xal?”
verso 34
Ba o Jezush kade vorbilas maj dur: „Muro xamasko kodoj, ke kodalesko kamipe te kerav, kon bishaldas man, te lasharav lesko kerdyipe.
verso 35
Chaches tume phenen: Inke shtar shon, haj resla o kosipe? Aketa, phenav tumenge: Vazden opre tumare jakha, haj dikhen le plugasle phuva, ke reslas aba pe lende o kosipe.
verso 36
O Kosari lela pesko potyinipe, haj upaj kidel po sagutno trajo, ke kethane te losshal o beshavari le kosaresa.
verso 37
Ke ande kodo chachipe si la phenimatake: ke kaver si kodo, kon beshavel, haj kaver kon kosil.
verso 38
Bishaldom tumen, ke tele te kosin so na tume butyardine. Kaver khinyarde pen, haj tume ande lengo than tordyiline andre.”
verso 39
Anda kodo foro, mashkar le samaritana but zhene patyanas ande leste pe romnyaki vorba, kon chacharelas les: „Phendas mange sakofalo so kerdem.”
verso 40
Kana apol le samaritana kothe geline leste, mangenas les, te ashol lende. Duj dyes vi kothe ashilas.
verso 41
Atunchi aba majbut zhene patyanas anda lesko sityaripe.
verso 42
La romnyake pale kodo phendine: „Abakanak aba na anda tyiri vorba patyas, ba anda kodo, ke ame ashundam, haj zhanas, ke voj chachikanes la lumako muntori si.”
Sastyaripe ande Galilea
verso 43
Pala duj dyes gelastar kothar ande Galilea.
verso 44
O Jezush aba pa peste chachardas, ke le profetas naj patyiv ande pesko them,
verso 45
ba vi kade, kana ande Galilea reslas, andre svagardine les le galileicka, ke dikhline sa kodo, so ando Jeruzhalemo kerdas pe bare dyesa, ke vi von opregeline pe baredyesa.
verso 46
Pale gelastar apol ande galileicko Kana, kaj anda paji mol kerdas. Sas jekh krajicko raj, kasko shavo nasvalo sas ando Kafarnaumo.
verso 47
Kana ashundas, ke o Jezush anda Judea ande Galilea avilas, gelastar leste, haj manglas les, ke te aveltar haj te sastyarel leske shaves, ke aba kodo po meripe sas.
verso 48
Pe kado o Jezush kodo phendas leske: „Kana feri somnura haj chudimata chi dikhen, chi patyan!”
verso 49
O krajicko raj pe kado kodo phendas: „Raja, avtar, zhikaj chi merel muro shavoro!”
verso 50
O Jezush kodo phendas leske: „Zha, tyo shavo trajil!” Patyalas o manush la vorbake, so o Jezush phendas leske, haj gelastar.
verso 51
Kana inke khere zhalas numa, aba leske slugi angla leste avenas, haj phendine leske, ke lesko shavo trajil.
verso 52
Avrizhanglas lendar, ke ande savo chaso kerdyilas majfeder. Kodo phendine leske: „Aratyi ando eftato chaso mukhlas les o javrope.”
verso 53
Kade hatyardas o dad, ke kodo ande kodo chaso pelaspe, kana o Jezush kodo phendas leske: „Tyo shavo trajil.” Haj patyalas voj haj sakon ande lesko kher.
verso 54
Kado aba o dujto chudicko somno sas, so o Jezush kerdas, kana anda Judea ande Galilea gelas.
Libros
