Evangeliumo kathar o Janosh
capítulo 19
verso 1
Atunchi o Pilatush ingeradas le Jezushes, haj chunyaradas les.
verso 2
Le ketani pale korona xudine anda kanre, pe lesko shero shutineles, haj lolo pluvialo dine pe leste.
verso 3
Pala kodo anglaleste geline, haj kodo phenenas: „Av drobome, biboldengo kraj!” Haj pa muj shinenas les.
verso 4
O Pilatush pale avrigelas haj kodo phendas lenge: „Aketa, avrianav les, te zhanen avri, ke khanchi dosh chi rakhav ande leste.”
verso 5
Atunchi avriavilas o Jezush, anda kanre kerdino koronasa po shero, haj ando lungo pluvialo. Voj pale kodo phendas lenge: „Aketa, o manush!”
verso 6
Kana le angrashaja haj lenge slugi kado dikhline, line te cipin: „Tannaren les po trushul, tannaren les po trushul!” O Pilatush kade das duma: „Len les tume perdal, haj tannaren les tume po trushul, ke me chi rakhav ande leste dosh.”
verso 7
Ba le bibolde kade dine duma: „Amen kris si, ke e kris avriphenel, ke trubuj te merel, ke le Devleske Shaveske phendas pes!”
verso 8
Kana o Pilatush ashundas kadal vorbi, inke majfeder darajlas.
verso 9
Pale andre gelas po prefektoripe, haj pushlas kathar o Jezush: „Katharutno san tu?” Ba o Jezush chi dasles palpale vorba.
verso 10
Anda kado o Pilatush kodo phendas leske: „Mange chi des palpale vorba? Chi zhanes, ke saktimo si man pe kodo, ke slobodo te mukav tut, haj pe kodo, ke po trushul te tannavarav tut?”
verso 11
O Jezush kodo phendas: „Khanchi zor chi avlas tut pe mande, ke kana kothar opral chi davadyilino tuke. Anda kado, kon man pe tyiro vast das, majbaroj lesko bezexipe.”
verso 12
Kathar kado o Pilatush pe kodo sas, te mukel les. Ba le bibolde kade cipinas: „Kadales te bishalesa, atunchi chi san le chasarosko vortako! Ke sa kodo, kon krajeske shol pes, po chasaro del.”
verso 13
Kana o Pilatush ashundas kadal phenimata, avrianadas le Jezushes, haj ande krisaresko iskamin beshlas pe kodo than, saves barrasle avlinaske phenen, hebericka pale Gabbatake.
verso 14
La patradyako angle lashardo dyes sas atunchi, dore karing le shov chasura. Kade das duma kaj le bibolde: „Aketa, tumaro kraj!”
verso 15
Ba kodal kade cipinas: „Ingren les, ingren les, tannar les po trushul!” O Pilatush pushlas lendar: „Tumare krajes te tannarav po trushul?” Le angrashaja kodo phendine: „Naj amen kraj, feri chasaro!”
verso 16
Atunchi apol ande lengo vast das les, te tannaren les po trushul. Kodal perdal line le Jezushes.
Le Jezushesko meripe po trushul
verso 17
Voj pale pesko trushul phirades avrigelas pe kuputesko than, so hebericka Golgotaske phenen.
verso 18
Kothe po trushul tannardine les, haj lesa kethanes inke dujen dujdoringral, le Jezushes pale mashkaral.
verso 19
O Pilatush vi jekh iskiripe keradash, haj po trushul shuvadasles. Kado sas pe leste iskirime: „O Nazareticko Jezush, le biboldengo kraj.”
verso 20
Kado opreiskiripe apol but zhene ginadine mashkar le bibolde, ke pashe sas kaj o foro kodo than, kaj po trushul tannardine le Jezushes. Hebericka, latinicka haj hellenicka sas iskirime.
verso 21
Le biboldenge angrashaja anda kado pe kodo mangenas le Pilatushes: „Na kado iskirisar: Le biboldengo kraj, ba kodo: Kado kodo phendas: »Le biboldengo kraj som«!”
verso 22
O Pilatush kodo phendas: „So iskirisrdom, kodo iskirisardom!”
verso 23
Le ketani pale, pala soste po trushul tannardine le Jezushes, xutyildine leske gada, alosardinele pe shtar riga, sakone ketaneske jekh rig, pala kodo xutyildine vi pluvialo. O pluvialo bi suvjimasko sas, opralutnes anda jekh xudo.
verso 24
Anda kado kodo phendine jekhavreske: „Kado dore, te na shinas, barem khelasles avri, kasko te avel! Kado anda kodo pecisajlas, ke te pherdyol andre o Iskiripe, so kade del duma:
„Alosardine mashkar pende mure gada,
haj muro pluvialo avrikheldine mashar pende”.
Le ketani apol kado kerdine.
verso 25
Pasha Jezushesko trushul kothe tordyolas leski dej, leska daki pheny, e Marija, le Kleofasheski romnyi haj e Marija Magdolna.
verso 26
Kana o Jezush dikhlas peska da haj le sityardes, kas kamelas, kade das duma kaj peski dej: „Romnye, aketa tyo shavo!”
verso 27
Pala kado kodo phendas le sityardeske: „Aketa, tyi dej!” Haj kathar kodo chaso peste las la o sityardo.
verso 28
Pala kado o Jezush, kon zhanelas, ke aba sakofalo andre agorisajlas, andre te pherdyol o Iskiripe, kade das duma: „Trushajvav!”
verso 29
Sas kothe jekh shutesa pherdo vaso. Anda kado ande shut boldi spondya shutine pekh izhopo, haj kaj lesko muj lunzhardinela.
verso 30
Kana o Jezush o shut zumadas, kodo phendas: „Andrepherdyilas!” Haj pesko shero tele bandyardes avriphurdas pesko dyi.
Le Jezushesko praxope
verso 31
Le bibolde pale, ke angle lasharimasko dyes sas, mangenas le Pilatushes, te phagen lenge punrenge flujerenge kokala, haj te len le tele, ke le trupura tena ashon kothe vi pe savatosko dyes, ke kodo savato barodyes sas.
verso 32
Kothe geline apol le ketani, haj phagline majanglal le jekheske punreske flujera, kon lesa sas po trushul tannardo, pala kodo le kavesko.
verso 33
Ba kana kaj o Jezush resline, haj dikhline, ke mulas aba, chi phagline leske punrenge flujera,
verso 34
ba o jekh ketana, branchasa, puterdas lesko pashavro, anda soste ande kodo minuto rat, haj paji avilas avri.
verso 35
Kon kado dikhlas, chacharipe kerdas pa leste, haj chachoj lesko chacharipe. Voj zhanel, ke chachipe phenel, ke vi tume te patyan.
verso 36
Ke kadal anda kodo pecisajline, ke andre te pherdyol o Iskiripe: „Leske kokala, tena phagen kethane”.
verso 37
Jekh kaver Iskiripe pale kodo phenel: „Dikhena kodo, kas perdal pusadine”.
verso 38
Pala kadal pale o arimateicko Jozhef, kon le Jezushesko sityardo sas, ba kathar le biboldengi dar numa ande tajna, manglas le Pilatushes, tele te shaj lel le Jezushesko trupo. O Pilatush muklasles leske. Gelastar apol haj tele las o trupo.
verso 39
Avilastar vi o Nikodemus, kon majanglal ratyi gelas leste, haj mirha – haj aloe ulojesko hamipe andas, dore karing le shel fontura.
verso 40
Xutyildine apol le Jezushesko trupo, haj le ulojenca kethanes ando poxtan patyardine les, sar kaj le bibolde sityiline te keren.
verso 41
Pe kodo than, kaj po trushul tannardine les, sas jekh bar, haj ande bar jekh nyevo murmunto, ande savo inke khonyik chi pashjilas.
verso 42
Ke o murmunto pashe sas, anda le biboldengo angle lasharimasko dyes, le Jezushes kothe shutine.
Libros
