Peteresko angluno lil

Chapters:

1 2 3 4 5

verse #1

O Peter, le Jezush Kristosko aposhtolo, ande diaspora trajisardine, le alosardine avlimarenge ando Pontus, Galicia, Kappadocia, Azhia haj ande Bitinia,

verse #2

kathar le Dadunedevlesko anglezhanipe, kathar o Duho kerdyilino suntosardyipe, ke le Jezush Kristoske te muken pen, haj lesko rat te rispisarel len. E gracija haj e pacha te butajvel ande tumende!

verse #3

Ashtyilime te avel o Del, amare Rajesko le Jezush Kristosko Dad, kon peske bare lashipesa zhuvinde sperantimaske arakhadyisardas nyeveske amen, perdal pa Jezush Kristosko opretrajisaripe,

verse #4

po bi shaj rumusardo, bi melalo haj bi shaj kernyilino arandimope, so ando rajo opre si inkerdino pe tumari rig.

verse #5

Le Devleski zor perdal pa patyape sama lel pe tumende po muntoipe, so gata tordyol, ke pe paluni vramate avri te sikadyol.

verse #6

Kadaleske losshana, vi kade, ke akanak trubuj te brigajven anda butfalura zumavjimata,

verse #7

ke tumare patyapesko zumavjipe – so kathar e jag zumaven avri – inke majkuch te avel pe tumaro asharipe, pe tumaro luvudyipe haj patyivipe kana sikadyola o Jezush Kristo,

verse #8

kas apol chi dikhen, ba kamen: ande kaste, apol chi dikhenles, ba patyan: haj ke patyan, vojina tumen zurales bara losshasa,

verse #9

reslines tumare patyapesko dajno, haj duhosko muntuipe.

verse #10

Kado muntoipe dikhenas perdal haj rodenas le profeti, kon pa kodi gracija profetalinas, so ande tumende andre pherdyilas,

verse #11

haj rodenas, ke ande savi bake soski vrama sikavel ande lende le Kristosko Duho, kon anglunes profecisardas kodal dukha, so po Kristo zhukarnas haj pe kodal avlimaske luvudyimata.

verse #12

Zhanardine lenge, ke na penge, ba tumenge sluginas sa kodalesa, so akanak le evangeliumoske viacara avriphenen tumenge, pala soste anda cheri bishaldyilas o Sunto Duho: pe kadalesko dikhlipe doronpe vi le andyela.

verse #13

Anda kado apol brichinaren opre tumara godyako mashkar, aven trazi, haj patyan sagutnes ande gracija, so dena tumenge kana sikadyola o Jezush Kristo:

verse #14

sar muklikane shave, na kaj tumaro bi zhanipesko dulmutano dorope pashindes,

verse #15

ba sar kathar o Sunto, kon tumen akhardas, vi tume ande tumaro intrego trajo suntura te aven,

verse #16

ke iskirime si:”Suntura te aven, ke me sunto som!”

verse #17

Haj Dadeske te akharen kodales, kon bi alosarimasko krisarel sakoneske kathar leske trabi, phiren daripesa pe tumari dromarimaski vrama,

verse #18

zhanindes, ke na pe rumuimasko rup bake somnakaj pecisajlas tumaro muntoipe anda tumare dadendar pe tumende muklino phutyardo trajo,

verse #19

ba kathar le uzhe haj bi reslimaske Bakresko, kathar le Kristosko kuch rat,

verse #20

kas o Dad apol angla lumako kerdyipe dikhlas avri, ba ande palutni vrama phendasles avri anda tumende.

verse #21

Perdal pa leste patyan ando Del, kon les opretrajardas anda meripe, haj luvudyipe das leske, ke ando Del te avel tumro patyape haj sperantipe.

verse #22

Uzharen apol tumaro duho le chachipeske muklikanes, haj ando na xoxamnes sikadino phralikano kamipe. Majfeder, anda ilo te kamen jekhavres,

verse #23

nyeves arakhadyilines na anda rumuimasko, ba anda bi shaj rumuimasko sumburo anda Devlesko zhuvindo haj sagutnes ashilimasko alav,

verse #24

ke
sakono trupo kasavoj sar e char,
haj lesko sakono luvudyipe, sar la charake luludyaj;
avrishutyol e char, haj tere peren lake luludya

verse #25

ba le Rajesko alav sagutnes ashol.
Kado pale kodo alav si, so viacardine tumenge.

Chapters:

1 2 3 4 5