chapter 7
Pala kado o Jezush andre phirdas e Galilea. Chi kamlas ande Judea te zhal, ke le bibolde po meripe rodenasles.
Pashe sas le biboldengo barodyes, o cerhaslo barodyes.
Leske phral atunchi kodo phendine leske: „Zhatar kathar, zha ande Judea, ke vi tye sityarde te dikhen tye trabi, so keres!
Ke khonyik chi butyarel ande tajna, kana po pinzharipe kamel te resel. Kana kadal keres, sikav tut la lumake!”
Ke inke chi leske phral chi patyanas ande leste.
O Jezush kodo phendas lenge: „Muri vrama inke naj kathe, ba tumenge e vrama sagutnes lashi si.
Tumen nashtig rucil e luma, ba man rucil, ke me chacharav pa kodo, ke lenge trabi nasulaj.
Tume numa zhan opre po barodyes, me chi zhav opre pe kado barodyes, ke muri vrama inke chi pherdyilas andre.”
Kadal phendas, haj voj ande Galilea ashilas.
Ba kana leske phral opregeline po barodyes, vi voj opregelas, ba na avri sikades, ba ande tajna.
Le bibolde rodenas les po barodyes, haj kodo pushenas: „Kaj si voj?”
Mashkar le manusha but sakofalo phenenas pa leste. Sas kon kadal phenenes: „Lasho manush si kodo!” Kavera pale: „Na, ke xoxavel le manushen.”
Ba khonyik chi tromalas avri sikades te vorbil pa leste, ke daranas kathar le bibolde.
Kana aba le baredyesesko mashkar sas, o Jezush opregelas ande khangeri haj sityarelas.
Le bibolde chudinaspe, haj kado phenenas: „Kathar pinzharel le Iskirimata, kana apol china chi sityilasle?”
O Jezush kado phendas lenge: „Muro sityaripe, na muroj, ba kodaleskoj, kon man bishaldas.
Kana varikon gataj lesko kamipe te kerel, kodo oprepinzharel pa sityaripe, ke kathar o Del si, bake me mandar vorbisarav dore.
Kon pestar vorbisarel, kodo pesko luvudyipe rodel, ba kon peske bishalareske luvudyipe rodel, kodo o chachipe phenel, haj naj ande leste xoxamnipe.
Na o Mozesh das tumenge e kris? Haj khonyik mashkar tumende chi kerel la krisa. Sostar kamen apol man te mudaren?”
Le manusha kodo phendine: „Beng si tut! Kon kamel tut te mudarel?”
O Jezush kodo phendas lenge: „Numa jekh butyi kerdom, haj savorazhene xolyajven.
O krujalshinipe o Mozesh das tumenge – ba kodo china na kathar o Mozesh si, ba kathar le dada –, haj savatone krujal shinen le manushes.
Kana varikon krujal shaj shinavelpe savatone kade, ke ande Mozesheski kris dosh tena kerdyol, atunchi sostar xolyajven pe mande anda kodo, ke le intregone manushen sastyardom savatone?
Na krisaren pa dichipe numa, ba chache krisasa krisaren!”
Mashkar le Jeruzhalemicka unyizhene kodo phenenas: „Na voj si kodo, kas zurales roden?
Aketa, angla sakoneste vorbil, haj khanchi chi phenen leske? Dore, le angmanusha oprepinzhardine, ke voj si o Kristo?
Ba pa leste, zhanas, ke katharutnoj, o Kristo pale kana aveltar, khonyik chi zhanel, ke kathar si.”
Atunchi o Jezush, kon ande khangeri sityarelas, kade cipisardas opre: „Pinzharen vi man, haj zhanen vi kodo, ke katharutno som. Ba me na mandar avilom, ba kodo bishaldas man, kon Chachoj, kas tume chi pinzharen.
Me pinzharav les, ke lestar som, haj voj bishaldas man.”
Atunchi fajlino les te xutyilen, ba khonyik chi vazdas pe leste vast, ke inke chi avilastar lesko chaso.
Ba mashkar le manusha but zhene patyanas leske, haj kodo phenenas: „O Kristo kana aveltar, dore, majbut chiudicka somnura kerela, sar voj aba kerdas?”
Ashundine, le farizana, ke le manusha kasave vorbin pa leste, anda kado le angrashaja haj le farizana slugi bishaldine, te xutyilen les.
Atunchi o Jezush kade das duma: „Inke jekh cerra vrama tumenca som, pala kodo zhavtar kaj kodo kon bishaldas man.
Rodena man, ba chi arakhena, haj kaj me som, kothe tume nashig aven.”
Le bibolde anda kado kodo phendine mashkar jekhavreste: „Kaj kamel kado te zhal, kaj chi rakhas les? Dore chi kamel mashkar le hellena te zhal haj le hellenon te sityarel?
Ta soski vorbaj kadi so phendas: »Roden man, ba chi arakhena, haj kaj me som, kothe tume nashtig aven«?”
Le baredyesengo paluno barodyes o Jezush tordyilas haj oprecipisardas: „Kana varikon trushajvel, te avel mande, haj te pel sakon,
kon patyal ande mande. Sar e Iskirimata phenel: le zhuvende pajeske aba shordyona anda leste.”
Kado pa Duho phendas, so kon ande leste patyan, lenales. Ke o Duho inke nas dino, ke o Jezush inke chi luvudyisajlas.
Kon mashkar le manusha kadal vorbi ashundine, kado phenenas: „Kado chachikanes profeta si!”
Kavera pale kado phenenas: „Kado o Kristoj!” Sas kon kade delas duma: „Dore, na anda Galilea avel o Kristo?
Na kado phendas o Iskiripe: »Anda Davideske falura haj anda Betlehemesko than avel o Kristo, kathar o David falosajlas?«”
Haj ande butimata shindyipe kerdyilas anda leste.
Mashkar lende unyizhene kamline les te xutyilen, ba khonyi chi vazdas vast pe leste.
Le slugi palpale geline kaj le angrashaja haj kaj le farizana. Kodal kodo phendine lenge: „Sostar chi andine les?”
Le slugi kodo phendine: „Chikana kade manush inke chi vorbisardas!”
Pe kado le farizana kado phendine: „Dore, vi tumen xoxadas?
Apol mashkar le angmanusha bake farizana patyajlas ande leste varikon?
Ba kadal manusha, save chi pinzharen la krisa, armajaslej.”
Pe kado o Nikodemus, kon na dulmut leste phirdas, haj mashkar lende sas jekh, kado phendas lenge:
„Dore, amari kris, krisarel le manushes, zhiso majanglal chi ashunel les avri, haj chi zhanglinesas avri, ke so kerdas?”
Kodal kado phendine leske: „Dore, chi san vi tu galileicko? Dikh pala leste, haj dikh andre, ke anda Galilea nashtig avel profeta!”
Pala kodo savorazhene khere geline ande pengo kher.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly