Evangeliumo kathar o Mate
capítulo 12
Dyiv kidipe savatone
verso 1
Ande kodi vrama o Jezush mashkar beshavjimata nakhlas perdal. Haj ke leske sityarde bokhale kerdyiline, linepe haj tele kidenas le dyiv haj xanas kodal.
verso 2
Le farizana dikhline kado haj kado phendine leske: „Aketa, tye sityarde kodo keren, so savatone naj slobodo te keren.”
verso 3
Voj kodo phendas lenge palpale: „Chi ginade, ke so kerdas o David, kana bokhalo kerdyilas voj haj kon lesa sas?
verso 4
Sar gelas andre ande Devlesko kher, haj xalas le avri shutine manren, so nas slobodo leske te xal, haj chi kodalenge kon lesa sas, feri korkori le rashajenge?
verso 5
Bake chi ginade ande krisaki hertilya, ke savatone le rashaja ande khangeri xan le savatones, haj vi kade bi bezexaslej?
verso 6
Phenav tumenge: vi kathar e khangeri maj baro si kathe.
verso 7
Te hatyardinesas, ke so sikavel kado: »Lashipo kamav haj na sarkafimo«, chi krisardinesas le bi bezexaslen.
verso 8
Ke le Manushesko Shavo raj si le savatoneske.”
Le paralizanesko sastyaripe
verso 9
Kana kothar majdur gelas, andre gelas ande lengi zhinagoga.
verso 10
Aketa, sas kothe jekh manush kaske tele sas shutyilime lesko vast. Te shaj dosharen les, pushline lestar: „Slobodo si savatone te sastyaren?”
verso 11
Ba voj kado phendas lenge palpale: „Kon si mashkar tumende kodo manush, kas jekh bakro si haj savatone andre perel andekh gropa, chi xutyilelles haj chi cirdel avri kodales?
verso 12
Haj apol sodenca majbut si o manush kathar o bakro! Slobodo si kade lasho te keren savatone.”
verso 13
Pala kodo kade das duma kaj o manush: „Lunzhar avri tyo vast!” Kodo avri lunzhardasles, haj sastyilas, kasavo sasto kerdyilas, sar o kaver.
verso 14
Le farizana pale avri geline haj linepe te vorbinpe pe leste, ke sar te xasaren les.
Jezush, le Devleski sluga
verso 15
O Jezush zhanelas kado, anda kado gelastar kohar. But manusha zhanas pala leste, haj voj savorazhenen sastyardas,
verso 16
Ba vladisardas lenge zurales, tena phenen avri, ke kon si voj,
verso 17
andre te pherdyol o alav, so o Izajash profeta phendas:
verso 18
„Aketa, muri sluga, kas alosardom,
muro kamado, ande kaste muro dyi pesko fajlipo araklas.
Pe leste dav muro Duho,
Haj voj kris viacarela le popularenge.
verso 19
Chi xalpe haj chi cipil,
khonyik chi ashunel pe placcura lesko glaso.
verso 20
Le kole trestijas chi phagel kethane,
o melcho so inke phabol chi mudarel tele,
zhikaj po viktornope chi ingrel la krisa.
verso 21
Ande lesko anav sperantisaren le populara.
Le Jezushesko pestar-chacharipe
verso 22
Atunchi kothe ingerdine leste jekhe korre haj mutone bengales. Voj sastyardas les, haj o muto dikhelas haj vorbilas.
verso 23
E intrego butimata chudilaspe haj kade vorbilas: „Dore na kadoj le Davidesko shavo?”
verso 24
Le farizana kana kado ashundine kado phendine: „Nashtig nashavel kado avri le bengen, feri le bengenge krajeske, le Belzebubeske zhutimatasa kethane.”
verso 25
Apol ke pinzharelas lenge gindimata, kade das duma lende: „Sakono them savo nasul kamel peske, merel, haj vi savo foro bake kher, savo nasul kamel peske, opre chi ashola.
verso 26
Kana o shatano avri nashavel le shatanos, atunchi kodo nasul kamel peske, haj atunchi sar shaj asholas opre lesko them?
verso 27
Kana me le Belzebubeske zhutimatasa nashavav avri le bengen, tumare shave kaske zhutimatasa nashaven len avri? Kade von avna tumare krisara.
verso 28
Ba kana me le Devleske duhoske zhutimatasa nashav avri le bengen, atunchi reslas tumende le Devlesko them.
verso 29
Ke sar shaj zhalas andre varikon ande zuralesko kher, te chorel leske butyan, kana maj anglal chi phandel le zurales? Feri kade zhanel avri te xapavel lesko kher.
verso 30
Kon naj manca, muro dushmanoj, haj kon chi kidel manca, kodo rispisareltar.
verso 31
Anda kado phenav tumenge: le manushengo sako bezex haj kushlipe jertipe rakhel, ba varikon le duhos te kushel, kodo chi rakhel jertipe.
verso 32
Kana varikon pe Manushesko Shavo te phenel variso, kodo jertipe resela, ba varikon po Sunto Duho te phenla variso, chi resla jertipe chi pe kadi luma, chi ande avlimaski.
O kasht haj lesko frukto
verso 33
O kasht vaj lashoj, haj vi leske fruktura lashej; bake nasul si o kasht, haj vi leske fruktura nasulaj. Le kashtes apol pa leske fruktura shaj pinzharen opre.
verso 34
Viperange falura! Sar shaj zhanenas lashe butya te phenen, kana nasula san? Haj ke anda ilesko butipe del duma o muj.
verso 35
O lasho manush anda lashi avucija lashe butya del angle; o nasul manush pale anda nasuleske avucija nasul del angle.
verso 36
Phenav tumenge: Anda sakone khanchi kerde vorbi, so avri phenen le manusha, resen pengo potyinipe pe krisarimako dyes.
verso 37
Ke anda tye vorbi muntuna tut opre, bake anda tye vorbi krisarena tut.”
O Jezush chi del somno
verso 38
Atunchi mashkar le iskiritora haj le farizana unyi zhene kodo phendine leske: „Maistro, fajas amen tutar jekh somno te dikhas.”
verso 39
Voj kado phendas lenge palpale: „O nasul haj marhime generaciovo somno dorosarel, ba chi lel kaver somno, feri le Jonash profetasko somno.
verso 40
Ke sar o Jonash ande cetmasheski rinza sas trin dyes thaj trin ratya, kade avla vi le Manushesko Shavo ande phuvako ilo trin dyes thaj trin ratya.
verso 41
Le ninivicka mursha opretrajina kaj o krisipe kadale generaciovosa kethanes, haj krisarena kodo, ke von patyanas pe Jonashesko alav viacaripe; haj aketa, maj baro si kathe sar o Jonash.
verso 42
E sudnoski krajkinya opretrajila kaj o krisipe kadale generaciovosa kethanes, haj krisarela kodo, ke voj avilastar pa phuvake granici, te ashunel le Shalamoneske platnikimata; haj aketa, maj baro si kathe, sar o Shalamon.
Pa biuzhe duhura
verso 43
Kana o biuzho duho avri zhal anda manush, kaj bipajutne thana phirel haj pachimata rodel, ba chi rakhel.
verso 44
Atunchi kodo phenel: „Palpale zhav ande muro kher, kathar avri avilem. Kana kothe resel, shushes rakhelles, avri shiladines haj opre shukardines.
verso 45
Atunchi zhaltar, pasha peste lel inke efta kavere duhon, pestar maj nasulen; andre zhan haj kothe beshen. Kodole manusheske pale o paluno hatyaripe maj nasul avla kathar o angluno. Kade pecisajvela vi kadale nasule generaciovosa.”
Le Jezusheske chache phral
verso 46
Sar vorbilas kaj e butimata, aketa, leski dej haj leske phral tordyiline avral haj mangenas les, te shaj vorbin lesa.
verso 47
Varikon duma das leske: „Aketa, tyi dej haj tye phral avral tordyon, haj kamenas te vorbin tusa.”
verso 48
Voj kado phendas palpale kodaleske kon duma das leske: „Kon si muri dej haj kon si mure phral?”
verso 49
Pala kodo avri lunzhardas peske vast karing peske sityarde haj kade das duma: „Aketa, muri dej haj mure phral.
verso 50
Ke sa kodo kon kerel mure Dadesko kamipe, kon ando rajo si, kodo si muro phral, muri pheny haj muri dej.”
Libros
