capitolul 6
Len sama pe kodo, ke tumaro chachimo na angla manusha chacharen, bare te aven angla lende, ke kade ch«avla tumen potyinipe kaj tumaro Dad, kon ando rajo si.
Kana apol des, na zhanav avri sakonesa, sar le paxande keren ande zhinagoga haj pe vujici, te luvudyisaren len le manusha. Amen, phenav tumenge: line pengo potyinipe.
Kana tu dimatipe keres, tena zhanel tyo stungo vast, ke so kerel o chacho,
tena zhanardyol avri tyo dinipe; tyo Dad, kon dikhel tut garades, potyinla tuke.
Kana pale rudyin, na keren kade, sar le paxande, saven faj ande zhinagoga haj avral pe vujici tordyindos te rudyinpe, ke te shaj dikhen len le manusha. Amen, phenav tumenge: line pengo potyinipe.
Tu, kana rudyis, zha andre ande tyi soba, phandav andre tyo vudar, haj kade rudyin kaj tyo Dad, kon dikhel tut garades; atunchi tyo Dad, kon ando garadyipe si, potyinla tuke.
Ando rudyipe pale na vorbin anda khanchimata, sar le murtikana, kon kade gindin, ke anda penge but vorbimata ashundyipe rakhena.
Na cirden apol pe lende; ke tumaro Dad zhanel, ke so trubuj tumen, zhimajanglal inke mangenas les.
Anda kado kade rudyin:
Amaro Dad, kon san ando rajo,
te suntosardyol tyo anav;
te aveltar tyiro them;
te kerdyolpe tyiro kamipe,
sar ando rajo, kade vi pe phuv.
Amaro sako dyesesko manro
de amenge adyes;
haj jertisar amare bezexa,
sar vi ame jertisaras
kodalenge, kon amenge bezexaren;
haj na inger amen ande zumavjimata;
ba slobodisar amen kathar o Nasul.
Ke te jertina le manushenge lenge doshimata, vi tumenge jertila tumaro rajuno Dad.
Ba tena jertina le manushenge, chi tumaro Dad chi jertila tumare dosha.
Kana postyin, na sikaven pe tumari mosura briga, sar le paxande. Ke von xoxamni mosura sikaven, ke pe lengo postyipe le manusha bari te dikhen. Amen, phenav tumenge: von aba line pengo potyinipe.
Tu, kana postyis, makh tyo shero, tyi mosura pale thov.
Tena dikhen le manusha, ke postyis, feri tyo Dad, kon ando garadyipe si; haj tyo Dad, kon dikhel ando garadyipe, potyinela tuke.
Na kiden kethane tumenge avuciji pe phuv, kaj kira haj e vrama xalle, kaj le chor andre phagen haj choren.
Kiden tumenge kethane avuciji ando rajo, kaj chi kir haj chi vrama chi nacharel, haj kaj chor chi phagen andre haj chi choren.
Ke kaj tyi avucija si, kothe avla vi tyo ilo.
Le truposko fimlalipe e jakh si. Kana apol tye jakha lashej, tyo intrego trupo fimlalo avla,
ba kana tye jakha nasulaj, tyo intrego trupo tunyariko avla. Kana pale o fimlalipe, so ande tute si, tunyarikipe si, kabor avla atunchi o tunyarikipe!
Khonyik nashtig slugil duje rajeske: ke vaj rucil le jekhes, le kaveres pale kamel, bake patyivil le jekhes, le kaveres pale tele dikhel. Nashtig slugisaren je-kharsa le Devleske haj vi le mammoneske.
Anda kado kodo phenav tumenge: Na daraven tumaro trajo, ke so te xan, haj chi tumare trupos, ke ande soste te uraven tumen. Naj maj but o trajo kathar o xamasko, o trupo pale kathar le gada?
Dikhen le chereske chiriklyan: chi beshaven, chi kosin, chi ande sinura chi kiden ande jekh, haj tumaro rajuno Dad xaxavel len. Chi sanle zurales maj but kathar kadal?
Kon si mashkar tumende, kon peske daramnimatasa zhanel peske trajoski vrama te lunzharel vi jekhe kujesa?
Haj anda gada sostar khinyaren tumen? Dikhen le malyange liliomon, ke sar baron: chi khinyarenpe haj chi xuven;
haj vi kade, phenav tumenge: inke chi o Shalamon nas kade opre urado ande pesko maj baro krajipe, sar jekh mashkar kadal.
Kana pale le malyangi char, so adyes si, haj tehara ande bov shudena, o Del kade opre uravel, sodivar majfeder tumen, cerra patyamne?
Na daran apol haj na phenen: »So te xas«, bake: »So te pas«, bake: »Ande soste te uravas amen?«
Ke kadalen le murtikana roden. Ke zhanel tumaro rajuno Dad, ke sa kadal trubuj tumenge.
Tume roden majanglal le Devlesko them haj kodalesko chachipe, haj sa kado lena pasha leste.
Na daran apol anda tehara: ke e tehara maj darala anda peste. Dostaj le dyeseske peski bida.
Software-ul își propune să conecteze pe toți cu textul Bibliei printr-o interfață rapid accesibilă și personalizabilă.
Numele face referire atât la conectivitate, cât și la viteză…
„Fiecare om să fie grabnic la ascultare, încet la vorbire și încet la mânie!”
Cu dragoste, Tom Károly