Evangeliumo kathar o Mate

Fejezetek:

… 11 12 13 14 15 …   ⇤ ← 13 → ⇥

1. vers

Kodo dyes o Jezush avri gelas anda kher haj tele beshlas pasha mara.

2. vers

But manusha cirdepe krujal leste. Anda kado andre hulyilas andekh bero, tele beshlas, sa e butimata pale pe dolma tordyolas.

3. vers

But sakofalo phendas lenge ande paraboli: „Aketa, avri gelas o sumburo beshavari, te beshavel.

4. vers

Sar beshavlas o sumburo, unyi sumbura pe dromeski rig peline. Aviline le chiriklya haj opre kidinelen.

5. vers

Kaver sumbura pe barrutne thana peline, kaj nasle but phuv. Sigo avri puterdyiline, ke nasle zurales tele ande phuv.

6. vers

Ba kana o kham opreushtyilas, phabiline, haj ke naslen rikita, avrishutyiline.

7. vers

Kaver unyi sumbura mashkar le kanre pelas. Le kanre opre bariline haj tasade len.

8. vers

Palunes kavera sumbura ande lashi phuv peline. Kadal upaj kerdine, o jekh shelto, o kaver shovardeshto, pale o kaver trandavar majbut.

9. vers

Kas si kan, te ashunelles!”

10. vers

Kothe geline leste leske sityarde haj pushline lestar: „Sostar ande paraboli des lende duma?”

11. vers

Voj kado phendas lenge palpale: „Ke tumenge davadyilas, te pinzharen le rajune themeske tajni, ba lenge chi davadyoltar.

12. vers

Ke kas si, kodales inke dena haj but avla les, ba kas naj kathar kodo inke vi kodo lena so siles.

13. vers

Anda kodo vorbij lende ande paraboli, ke jakhenca dikhen, ba chi dikhen, haj ashunen man, ba chi ashunen haj chi hatyaren.

14. vers

Andre pherdyol pe lende le Izajasheske profecimata, kon kodo phendas:
»Ashundes ashunena maj, ba chi hatyarena,
haj dikhindes dikhena, ba chi dikhena.

15. vers

Ke thulyardyilas le manushengo ilo,
penge kanenca phares ashunen,
penge jakha pale andre phandaven,
tena dikhen penge jakhenca,
ashunen penge kanenca,
hatyaren penge ilenca;
tena boldadyon karing o Del,
haj te shaj sastyarav len«.

16. vers

Ba tumare jakha anandej, ke dikhen, tumare kan, ke ashunen.

17. vers

Amen, phenav tumenge: but profeti haj chache doronas te dikhen, so tume dikhen, haj chi dikhline, te ashunen, so tume ashunen, ba chi ashundine.

18. vers

Ashunen apol, ke so sikavel pa sumboro beshavari phendi parabola:

19. vers

Kana varikon ashunel la themako alav, haj chi hatyarella, atunchi avel o nasul haj ingrel, so ande lesko ilo beshadine: kadoj kodo, so pe dromeski rig pelas.

20. vers

Po barruno than pelo sumburo pale kodoj, kon ashunel o alav, haj atunchi vi ande peste xutyilelles losshasa,

21. vers

ba najles rikita, haj numa unyi chasura inkrel feri. Kana anda alav kikidimata haj nashavjimata kerdyol, sigo bipatyamno kerdyol.

22. vers

Mashkar le kanre pelo pale kodoj, kon ashunel o alav, ba la lumake gindura haj o xoxamno barvalipe tasavel kodo, haj frukto chi kerla.

23. vers

Ande lashi phuv beshado sumburo pale kodoj, kon ashunel o alav haj vi hatyarel kodo. Pala kodo vi frukto kerla: o jekh shelto, o kaver shovardeshto, o trito trandavar majbut.”

24. vers

Vi kaver paraboli phendas lenge: „Cirdel le rajosko them pe jekh manush, kon lasho sumburo beshadas ande peski phuv.

25. vers

Kana sovenas le manusha, avilas lesko dushmano haj konkolyo rispisardas mashkar o dyiv haj gelastar.

26. vers

Kana avri barilas o dyiv haj spiko barardas, angle avilas vi o konkolyo.

27. vers

Kothe geline le slugi kaj o raj haj kodo phendine leske: „Raja! Chaches, ke tu lasho sumburo beshadan ande tyi phuv? Atunchi kathar si ande leste o konkolyo?”

28. vers

Kodo phendas lenge palpale: „Dushmano manush kerdas kado.” Le slugi pe kado pushline lestar: „Kames, dore, te zhastar, haj avri te kidasles anda leste?”

29. vers

Ba voj kado phendas: „Na, ke shajke o konkolyo sar avri cirden, kade avri shaj cirden vi o dyiv.

30. vers

Muken soldujen jekharsa te baron kethanes zhikaj o kosipe. Kana pale avla o kosipe pheno le butyarenge: »Kiden maj anglal kethane o konkolyo haj phandenle ando snopo, te phabarenle. O dyiv pale kiden kethane ande muro sino.«”

31. vers

Vi kaver parabola phendas lenge: „Anel le rajosko them po sinap sumburo, saves jekh manush xutyildas, haj beshadasles ande peski phuv.

32. vers

Kado chaches majcino si kathar sako sumburo, ba kana opre barol, majbaro avla kathar kavera beshavjimata. Kasht avla anda leste, kade aven le chereske chiriklya, haj mashkar leske kranzhi kulybosarena”.

33. vers

Pala kodo jekh kaver parabola phendas lenge: „Cirdel le rajosko them po kamiripe, saves jekh romnyi xutyildas, haj andre hamisardasles ande trin rolya aro, zhikaj chi phuklyilas sa.”

34. vers

Sa kadala o Jezush ande paraboli vorboisardas le bute manushenge. Bi parabolicka khanchi chi phenelas lenge,

35. vers

ke andre te pherdyol so e profeta phendas:
„Pe paraboli putrav mure vusht,
avri phenav zhikathar la lumako kerdyipe
garade butya”.

36. vers

Atunchi bishaldas le manushen haj khere gelas. Leske sityarde kothe geline leste haj kodo phendine: „Phen avri amenge e paraboli so pa konkolyo vorbisardan amenge!”

37. vers

Voj kado phendas lenge: „Kon o lasho sumburo beshavel, kodo le Manushesko Shavo si.

38. vers

E plugasli phuv e luma si, o lasho sumburo le themeske shavej, o konkolyo pale le nasuleske shavej.

39. vers

O dushmano, kon beshadasles, o beng si, o kosipe la lumako agor, le butyara pale le andyelaj.

40. vers

Sar le konkolyos kethane kiden haj ande jag shudenles, kade avla vi pe lumako agor:

41. vers

le Manushesko Shavo bishavela peske andyelon, kodal kehane kiden ande lesko them sakone bidan, haj kodalen kon nasulimata keren,

42. vers

haj andre shudena len ande jagasli bov. Avla kothe rovjipe haj dand kircpe.

43. vers

Atunchi le chache ablyona ande penge Dadesko them, sar o kham. Kas kan si, te ashunelles!

44. vers

Anel le rajosko them pe avucija so ande plugasli phuv garadine. Jekh manush rakhlasles, haj pale garadasles, pala kodo ande peski bari lossh, gelastar haj sakofalo bikindas so sasles, haj kindas e plugasli phuv.

45. vers

Anel le rajosko them po biznisari manush, kon shukarone bisora rodelas.

46. vers

Kana arakhlas jekh bisori, so but kerelas, gelastar, bikindas sakofalo so feri sasles, haj kindas kodo.

47. vers

Cirdel le rajosko them pe kodo xudro so ande mara shuden, haj kethane xutyildas bute falongire mashen.

48. vers

Kana pherdyilas, opre cirdineles pe dolma, tele beshline, haj le lashen ande vasura kidine kethane, le nasula pale avri shudine.

49. vers

Kade avla vi pe lumako agor. Le andyela avri zhana, le nasulen avri alosarena kathar le lashe,

50. vers

haj andre shudenalen ando jagaslo bov. Avla kothe rovjimata haj dad kircipe.

51. vers

Hatyardine sa kadala?” Kodo phendine leske: „Ova”

52. vers

Voj pale kodo phendas lenge: „Kade apol sakono iskiritori, kon pinzhardoj ande rajosko them, cirdel kaj kheresko raj, kon anda peski avucija dulmutano haj nyevo anel angle.”

53. vers

Pelaspe apol, ke kana o Jezush andre agurutnisardas kadal paraboli, gelastar kothar.

54. vers

Pala kodo gelastar ande pesko gav, haj sityarelas len ande pengi zhinagoga, kade, ke bari dikhline pe leste: „Kathar si kadales kasavo platnikipe haj chudimata?

55. vers

Na le kashtaresko shavoj kado? Leska da, na Marijake anavaren, leske phralen pale Jakab, Jozhef, Simon thaj Judasheske?

56. vers

Naj kathe amende leske intrega phenya? Kathar las apol sa kado?”

57. vers

Haj xolyajline pe leste. O Jezush pale kado phendas lenge: „Chi dikhen tele le profetas, feri ande lesko them haj ande lesko kher.”

58. vers

China chi kerdas kothe but chudimata anda lengo bi patyamnipe.

Fejezetek:

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28