Evangeliumo kathar o Mate
27. fejezet
Le Jezushes perdal den le Pilatusheske
1. vers
Kana zorisardyilas, le angrashaja savorazhene haj vi le popularenge phure, kris shindine po Jezush, po meripe te den les.
2. vers
Phangline les, haj ingerdine les haj perdal dineles le Pilatush prefektoske.
Le Judashesko meripe
3. vers
Kana o Judash, kon purrisardas les, dikhlas, ke krisardine les, bunusardas pesko purripe haj palpale ingerdas le tranda rupune le angrashajenge haj le phurenge.
4. vers
Kodo phendas: „Bezex kerdom, purrisardom o chacho rat.” Kodal kodo phendine: „So gri-zha si amen kaj kado? Tyiri butyij!”
5. vers
Pe kado andre rispisardas le rupune ande khangeri, pala kodo gelastar, haj opreumladas pes.
6. vers
Le angrashaja pale oprekidine le rupune love haj kado phendine: „Naj slobodo kadal andre te shas ande avucija, ke ratesko potyinipej kado.”
7. vers
Pala soste svato inkerdine, kindine pe lende le kumhareski phuv, pe le strenongi rig murmunceske.
8. vers
Anda kodo anavaren kodola phuva Ratvasle malyake zhikaj kado dyes.
9. vers
Atunchi andre pherdyilas, so o Jeremiash profeta phendas: „Xutyilen le tranda rupune – kado sas o ahor, pe kattyi inkrenas les le Izraeleske shave –,
10. vers
haj kothe dinele pe kumhareski phuv, sar o Raj vladisardasles mange”.
O Jezush angla o Pilatush
11. vers
O Jezush pale kothe tordyolas angla prefekto. O prefekto pushlas lestar: „Tu san le biboldengo kraj?” O Jezush kodo phendas: „Tu phenes.”
12. vers
Kana le angrashaja haj le phure dosharenas les, khanchi chi phenelas.
13. vers
Atunchi o Pilatush kodo phendas leske: „Chi ashunes, ke so sakofalo do-sharen pe tute?”
14. vers
Ba voj chi das leste duma chi jekha vorbasa, o prefekto pale zurales chudilaspe pe kado.
15. vers
Kana bare dyesa sas, jako sas, ke o prefekto slobodo mukel jekhe robos le manushenge, kas mangen.
16. vers
Sas len atunchi jekh viacalo robo, kas Barabasheske anavarenas.
17. vers
O Pilatush kethane akhardas len haj pushlas lendar: „Kas kamen, te mukav slobodo tumenge, le Barabashes bake le Jezushes, kas Kristoske phenen?”
18. vers
Apol zhanelas, ke anda xanzhvajimata dine les pe lesko vast.
19. vers
Sar pe krisako iskamin beshelas, leski romnyi vorba bishaldas leske: „Khanchi butyi tena avel tut kodale chachesa, ke but dukhardem anda leste adyes ande muro suno.”
20. vers
Ba le angrashaja haj le phure opreline le butimatan, ke le Barabashes te mangen, le Jezushes pale te xasaraven.
21. vers
O prefekto apol pushlas lendar: „Saves kamen, ke mashkar duj te slobodisarav tumenge?” Kodal kodo phendine: „Le Barabashes!”
22. vers
O Pilatush pe kado kodo pushlas: „Haj so te kerav le Jezushesa, kas Kristoske phenen?”
23. vers
Kodal savora-zhene kado phendine: „Tannaren les po tru-shul!” Voj pale pushlas: „Ba so nasul kerdas?” Kodal pe kado inke majfeder cipinas: „Tannaren les po trushul!”
24. vers
O Pilatush kana dikhlas, ke khanchi chi zhanel te kerel, haj barem inke maripe kerdyol, paji anadas, thodas pesko vast angla butimata haj kade das duma: „Me bi bezexaslo som kathar kadalesko rat. Tume dikhen kado!”
25. vers
O intrego butipe kado phendas: „Lesko rat te perel pe amende haj pe amare shavora!”
26. vers
Pe kado slobodo mukhlas lenge le Barabashes, le Jezushes pale chunyaradas haj perdal das les lenge, te tannaren les po trushul.
Le Jezushesko avriprassape
27. vers
Atunchi le prefektoske ketani andre ingerdine le Jezushes ande andralutni avlina, haj kethane akhardine krujal leste le intregone ketanen.
28. vers
Tele nandyardine les, lolo ketanicko lungo gad dine pe leste,
29. vers
anda kanre korona xudine, opreshutineles pe lesko shero, jekh trestija dine ande lesko chacho vast, pala kodo changa dine angla leste haj kade prassanas les. „Av drobome, biboldengo kraj!”
30. vers
Tele shungarden les, line lestar e trestija haj lesko shero marenas.
31. vers
Kana kade avri prassadine les, tele line pa leste o ketanushicko gad, pe leste dine leske gada, haj ingerdine les, te tannaren les po trushul.
Po trushul tannaripe
32. vers
Sar zhanas avri, arakhline jekhe cirenickone manushes, kon Shimon busholas. Kadaleske trubusardas te ingrel lesko trushul.
33. vers
Kana resline pe kodo than, saves Golgotaske anavaren, saveske kuputasko than phenen kaver falos,
34. vers
feresa kethane hamisardi mol dine les te pel. Kana zumadasla, chi kamlas anda late te pel.
35. vers
Pala soste po trushul tannardine les, khelimatasa avri alosardine savesko te avel leske gada.
36. vers
Pala kodo tele beshline haj sama lenas pe leste.
37. vers
Opral pa lesko shero opreshutine anda soste krisardine les. Kado sas opral iskirime: „Kado o Jezush si, le biboldengo kraj”.
38. vers
Vi duje chorren po trushul tannardine lesa kethanes, le jekhes pe leski chachi rig le kaveres pale pe stungo rig.
39. vers
Kon pale kothar phirenas penge sheresa mishkisardines kushenas les,
40. vers
haj kado phenenas: „Tu, kon tele putres la khangera haj tala trin dyes opre vazdesla, muntusar tut! Kana le Devlesko Shavo te san, hulyi tele pa trushul!”
41. vers
Zhikade vi le angrashaja kade prassanas les le iskiritorenca haj le phurenca kethanes:
42. vers
„Kaveren muntusardas, pes pale chi zhanel te muntul. Le Izraelesko kraj si voj, te hulyel tele akanak pa trushul, haj patyasa leske!
43. vers
Ando Del patyalas, apol te slobodisarel les, akanak te kamel! Ke kodo phendas: »Le Devlesko Shavo som«.”
44. vers
Kade marhinas les vi le chor, kas lesa kethane tannardine po trushul.
Le Jezushesko meripe
45. vers
Kathar shov chasura tunyarikipe kerdyilas pe intrego luma zhikaj o ijjato chaso.
46. vers
Karing le ijja chasura o Jezush glasunes oprecipisardas: „Eli, Eli, lema sabaktani?” so kodo phenel: „Muro Del, Muro Del, sostar mukhlan man?”
47. vers
Kado ashundines, unyizhene kon kothe tordyonas kade dine duma: „Kado le Illeshes akharel.”
48. vers
O Jekh vi nashlastar haj andas jekh spondya, ando shut boldasles, haj pe trestija shutindes, das les te pel.
49. vers
Le majbut pale kade vorbinas: „Mukh les feri, te dikhas, dore avela apolal o Illesh, te skepil les?”
50. vers
Atunchi o Jezush pale glasunes oprecipisardas haj avri das pesko duho.
51. vers
Haj aketa la khangerako firhango mashkaral shindyilas kathar o opralutnipe zhitele, e phuv mishkisajlas, le plaja puterdyiline,
52. vers
le murmuntura puterdyiline, haj but mule suntonge opretrajisardas lesko trupo.
53. vers
Pala lesko opretrajisaripe angle aviline anda murmuntura, andre geline ando sunto foro, haj bute zhenenge sikadyiline.
54. vers
O shelari pale, haj kon lesa kethane lenas sama po Jezush, kana dikhline ke mishkisajvel e phuv, haj ke soske trabi pecisardyon, zurales darajline haj kado phenenas: „Kado chachikanes le Devlesko Shavo sas.”
55. vers
Sas kothe vi but romnya, kon dural dikhenas les, kodal, kon anda Galilea aviline pala o Jezush, haj sluginas leske.
56. vers
Mashkar lende sas e Maria Magdolna, e Maria, le Jakabeski haj Jozhefeski dej, haj le Zebedeusheske shavengi dej.
Le Jezushesko praxope
57. vers
Kana andre ratyilas avilas anda Arimatea jekh barvalo manush, kaske Jozhef sas lesko anav, haj vi voj le Jezushesko sityardo sas.
58. vers
Kothe gelas kaj o Pilatush haj manglas lesko trupo, Atunchi o Pilatush vladisardas, ke te denles avri leske.
59. vers
O Jozhef xutyildas o trupo andre patyardas les ando uzho dyolchicko colo,
60. vers
haj andre shutasles ando plaj shindo nyevo murmunto, so peske keradas. Angla murmuntesko vudar jekh baro barr shutas haj gelastar.
61. vers
E Maria Magdolna haj e kaver Maria kothe sasle, haj mosa beshenas le murmuntoske.
Le murmuntesko samalelaripe
62. vers
Kaver dyes apol, kana nachilastar le gatapesko dyes, kaj o Pilatush kethane aviline le angrashaja haj le farizana
63. vers
haj kodo phendine: „Raja! Serosaras, ke kado xoxamno inke kana trajilas kodo phendas: »Pala trin dyes opretrajisardyuvav.«
64. vers
Vladisar apol, te len sama po murmunto zhikaj o trito dyes, dore kothe tena zhan leske sityarde, haj te choren les, pala kodo kado te phenen le manushenge: »Opretrajisardyilas anda meripe«. Kado maj palutno xoxamnipe maj nasul avlas kathar o angluno!”
65. vers
O Pilatush kodo phendas lenge: „Si vi tumen ketani, zhantar haj len sama pe leste tume, sar kamen.”
66. vers
Kodal pale gelinetar, tele phandadine somnosa o barr, haj penge ketanenca lavavenas sama po murmunto.
Könyvek
