Angluno lil kaj le korintushicka
3. fejezet
Le aposhtolesko pharipe haj butyake amala
1. vers
Ba me, phralale, nashtig vorbisardom tumnege sar duhikanende, ba sar truposkirende, sar cine shavorenge ando Kristo.
2. vers
Thud dom tumen te pen, na zuralo xamasko, ke inke chi zhanglinesas te inkrenles. Haj inke chi akanak chi zhanen te inkrenles,
3. vers
ke inke truposke sanle. Ke kana mashkar tumende daramnimata haj xape si, chi sanle dore truposke, manushikane?
4. vers
Ke kana kodo phenel o jekh: „Me le Palesko som”, o kaver pale: „Me le Apollovesko”, dore chi sanle atunchi manushikane?
5. vers
Dore soj o Apollo? Soj o Pal? Slugij, kon po patyape ingrerdine tumen kade, sar o Del das kodo lenge.
6. vers
Me beshadomles, o Apollo pale shordasles, ba o baripe o Del das.
7. vers
Apol chi kodo naj khanchi kon beshavel, haj chi kodo kon shorel, feri o Del, kon o bararipe del.
8. vers
Kon beshavel haj kon shorel, kodo sa jekh si, sakon lela pesko potyinipe kade, sar kathar leski butyi perelpe.
9. vers
Ke le Devleske butyake amala samle, tume pale le Devleski plugaki phuv, le Devlesko kher sanle.
10. vers
Kathar o Del mange dino gracija, sar platniko vazdari, fundo kerdom; kaver pale pe kodo vazdel peski butyi. Ba sakon te lel sama, ke sar vazdel pe leste.
11. vers
Ke pa tele shutino fundo avralutnes, so o Jezush Kristo si, kaver fundo khonyik nashtig shol tele.
12. vers
Kana pale varikon po fundo somnakaj, rup, kuch barr, kasht, khas, sulum shol,
13. vers
sakoneski butyi dichimaski avla; ke le Rajesko dyes sikavela, ke ande jag sikadyola, haj e jag avrizumavela, ke kaske soskij leski butyi.
14. vers
Kodo, kaske ashola leski butyi, so opralvazdas, potyinipe lela.
15. vers
Kodo, kaski butyi phabolatar, dosh resela; voj apol muntosardyola, ba feri kathar e jag.
16. vers
Chi zhanen, ke le Devleski khangeri sanle, haj le Devlesko Duho beshel ande tumende?
17. vers
Kodo pale, kon le Devleski khangeri tele rumusarel, tele rumusarel le Devles. Ke le Devleski khangeri sunto si, haj tume san kodo.
18. vers
Khonyik tena xoxavel pes. Kon mashkar tumende platnikeske gindil pes pe kadi luma, te kerdyol bi zhanimasko, ke platniko te shaj avel.
19. vers
Ke kadala lumako platnipe khanchimata si angla o Del. Ke iskrime si:
„Xutyilel le platnikon ande lengo xalipe”.
20. vers
Majdur:
„O Raj zhanel pa platnikenge gindimata,
ke khanchikanej”.
21. vers
Khonyik tena asharelpe manushenca. Ke sakofalo tumaro si,
22. vers
vi o Pal, vi o Apollo, vi o Kefash, vi e luma, vi o trajo, vi o meripe, vi le akanutne, vi le avlune: sakofalo tumaro si,
23. vers
tume pale le Kristoske sanle, o Kristo pale le Devleskoj.
Könyvek
