Angluno lil kaj le korintushicka
15. fejezet
Le Kristosko opretrajipe haj o muntoipe
1. vers
Inbisarav tumenge phralale, o evangeliumo, so viacardom tumenge, haj so vi patyajline, haj ande soste vi tordyon.
2. vers
Pa leste perdal vi muntosardyona, te inkrenales kade, sar viacardomles tumenge, ke kaverfalos anda khanchi kerdyilinesas patyamnenge.
3. vers
Ke kodo dom tumenge perdal, so vi me lom: ke o Kristo mulas anda amare bezexa sar o Iskiripe phenel,
4. vers
praxosardine les, haj po trito dyes opretrajisdardyilas, sar o Iskiripe phenel.
5. vers
Sikadyilas le Kefasheske, pala kodo le deshudujenge.
6. vers
Pala kodo sikadyilas majbut sar panzhe shele phralenge jekharsa, mashkar kaste inke but zhene vi akanak trajin, kavera pale muline.
7. vers
Pala kodo sikadyilas le Jakabeske, pala kodo sa le aposhtolenge.
8. vers
Pala savorazhenende pale sar pe rigatekerdyilineske, sikadyilas vi mange.
9. vers
Ke me o majcino som mashkar le aposhtolura, chi pe kodo chi som dosta, ke aposhtoleske te phenen man, ke nashavos le Devleski eklezhia.
10. vers
Ba anda Devleski gracija som kodo, so som, haj e mange dini gracija nas anda khanchimaste. Haj kathar savorazhenendar majbut butyardom man, ba na me, barem le Devleski gracija manca kethanes.
11. vers
Apol me, bake von, kade viacarasles, haj tume kade kerdyiline patyamnenge.
12. vers
Kana apol pa Kristo kodo viacaras, ke anda meripe opretrajisardyilas, atunchi sar phenen unyizhene mashkar tumnede, ke naj opretrajipe?
13. vers
Ke tena naj mulengo opretrajipe, atunchi chi o Kristo chi trajisardyilas opre!
14. vers
Kana pale o Kristo chi trajisardyilas opre, atunchi anda khanchipe si amaro alav-viacaripe, haj anda khanchipeste si vi tumaro patyape.
15. vers
Haj inke le Devleske vi xoxamne chachardenge dichuvasa, ke chachardyimata shutam po Del, ke opretrajardas le Kristos, kana pale china chi trajardas les opre, kana le mule chachikanes chi trajin opre.
16. vers
Ke le mule tena trajin opre, atunchi chi o Kristo chi trajisardyilas opre.
17. vers
Kana pale o Kristo chi trajisardylas opre, anda khanchi si tumaro patyape, haj inke vi akanak ande tumare bezexa sanle.
18. vers
Haj inke vi kodola, kon ando Kristo muline, xasajline.
19. vers
Ke numa ande kado trajo te speratisardyuvas ando Kristo, majchorre sam zhi kathar intrega manushendar.
20. vers
Ba o Kristo opretrajisardyilas anda meripe, sar le mulengo kolipe.
21. vers
Ke sar kathar jekh manush kerdyilas o meripe, kade vi kathar jekh manush kerdyilas o opretrajisardyipe.
22. vers
Ke sar ando Adam savorazhene meren, kade ando Kristo savorazhene opretrajisardyona.
23. vers
Sakon sar perelpe: anglunes o Kristo: pala kodo, kodal kon le Kristoskej, kana voj avelatar.
24. vers
Pala kodo avel o agoripe, kana perdal dela o rajipe le Devleske haj Dadeske, pala soste nachardas sakono krajipe, sako baripe haj zor.
25. vers
Ke zhikaj kodo trubuj leske te rajilpe, zhikaj peske dushmanon, sa tala peske punre chi shudela.
26. vers
Sar palutne dushmanos, le meripes nacharela.
27. vers
Ke sakofalo tala peske punre shudas. Ba kana kado phenel: „Sakofalo telaleste si shudino”, numa kodo na, kon telaleste shudas sakofalo.
28. vers
Kana pale sakofalo telaleste avla shudino, atunchi vi o Shavo tala kodo shola pes, kon sakofalo telaleste shutas, ke o Del te avel sakofalo ande sakofaloste.
29. vers
Ke kaver falos so keren kodal, kon bolenpe anda mule? Kana le mule chi sar chi trajin opre, soatar bolenaspe anda lende?
30. vers
Sostar shas avri vi amen bidake ande sako chaso?
31. vers
Pala jekh dyes pala kaver merav, kasavo chaches si kado phralale, sar tumenca kerdo asharipe ando Kristo Jezush, ande amaro Raj.
32. vers
Kana feri manushikanes marosma le turbatonepedonca ando Efezush, so zhutil mange? Kana le mule chi trajin opre, atunchi numa”xas haj pas, ke tehara meras”.
33. vers
Na muken tumen te xoxaven: „O nasul kethanipe rumul o lasho moralo.”
34. vers
Trazosajven avri intregones, haj na bezexaren! Ke unyizhene chi pinzharen le Devles. Anda kodo phenav kado, te lazhan tumen!
Le muntosardyipesko andre pherdyipe ando opretrajisaripe
35. vers
Ba kodo shaj phenelas varikon: „Sar trajin opre le mule? Soske truposa avena maj angle?”
36. vers
Dile! So beshaves, chi baro avri, kana anglunes chi merel.
37. vers
Haj kana beshaves, na le avlune trupos beshaves, ba numa le sumburos, apol le dyivesko bake kaveresko.
38. vers
O Del pale trupo del kodales, sar voj kamel, apol sakone sumbureske trupo del.
39. vers
Na sako trupo zhikodo trupo si, ba kaver si le manushengo, haj kaver le pedongo, kaver le chiriklyango, haj kaver le mashengo.
40. vers
Haj si chereske trupura haj phuvake trupura, ba kaver si le chereskirenge fimlalimata haj kaver le phuvakirenge.
41. vers
Kaver si lesko fimlalipe le khameske, haj kaver si lesko fimlalipe le shonitikoske, haj kaver si lengo fimlalipe le cherhajenge. Sako cherhaj maj kaveres fimlalisarel sar o kaver.
42. vers
Kade si vi le mulengo opretrajipe: ando rumuvjipe beshavenles, haj ando bi rumuvjipe trajil opre;
43. vers
ando lazhavjipe beshavenles, haj ando luvudyipe trajil opre; ando slabipe beshavenles, haj ande zor trajil opre;
44. vers
Hatyarimasko trupo beshaven, haj duhimasko trupo trajil opre.
Kana si hatyarimasko trupo, atunchi si vi duhikano trupo.
45. vers
Kado phenel vi o Iskiripe: „Adam, o angluno manush, trajimasko kerdyilas”, o paluno Adam pale trajisardo duhoske.
46. vers
Ba na o duhikano si o angluno, ba o hatyarimasko, numa pala kodo o duhikano.
47. vers
O angluno manush anda phuv si, phuvakoj, o dujto manush anda rajo si.
48. vers
Soskij e phuvaki, kasavej le phuvakire, haj sosko o rajunoj, kasavej vi le rajune.
49. vers
Haj sar phiradam le phuvake manusheski mosura, kade phiravasa vi le rajoskireski mosura.
50. vers
Phenav apol phralale, ke trupo haj rat nashtig resel le Devleske themes, haj chi o rumuvjipe nashtig resel le bi rumuvjipes.
51. vers
Aketa, tajna phenav tumenge: Chi merasa apol savorazhene, ba savorazhene kaver kerdyuvasa:
52. vers
jekharsa, talakh minuto, po paluno bashavjimasko phurdipe, ke ashundyola o fanfari, haj le mule opretrajisardyona ando bi rumuvjipe, ame pale kaver kerdyuvasa.
53. vers
Ke kadale rumuvjimaske truposke ando bi rumuvjipe trubul te uravelpe, haj kadale merimaske truposke ando bi meripe trubuj te uravelpe.
54. vers
Kana pale kado rumuvjindo trupo ando bi rumuvjipe uravelape, haj kado merimasko ando bi meripe, atunchi andre pherdyol o alav, so iskirime si:
„Nakhadas le meripes o viktornope.
55. vers
Meripe, kaj si tyo viktornope?
Meripe, kaj si tyo xanro?”
56. vers
Le merimasko xanro e bezex si, la bezexaki zor pale e kris si.
57. vers
Ba najis le Devleske, kon das amenge o viktornopes perdal pa amaro Raj, pa Jezush Kristo.
58. vers
Apolal, mure kamade phral, aven zurale, capeni, keren sogodivar majbut anda Raj, ke zhanen, ke tumari butyi na anda khanchi si ando Raj.
Könyvek
