Angluno lil kaj le korintushicka
16. fejezet
Kethanekidipe pe Jeruzhalemicka patyamnengi rig
1. vers
So pale pe le suntonge kethane kidinisardine dimata kerdyilas, vi tume kade te keren, sar le Galacicka eklezhiange vladisardom.
2. vers
Pe kurkesko angluno dyes savorazhene te shol rigate haj te kidel kethane, so les faj, ke na atunchi te pecilpe o kethanekidipe, kana kothe reso.
3. vers
Kana apol kothe avo, kodalen, kas tume phenen, bishalo le lilesa, ke tumaro kamado kethane kidipe te ingren ando Jeruzhalemo.
4. vers
Haj mishto te avla vi me te zhavtar, atunchi manca avena.
Le aposhtoleske gindimata
5. vers
Tumende pale atunchi zhav, kana aba andre phirdom e Makedonia, ke pa Makedonia perdal zhav.
6. vers
Dore vi kothe ashuvo tumende, bake vi o jivend kothe hodinisarav, ke vi tume te den man pasharimata, zhikaj zhotar me.
7. vers
Ke chi kamav akanak numa kade perdal zhalindes te dikhav, ke sperantisarav, ke jekh vrama tumende ashuvav, o Raj te mukela.
8. vers
Ando Efezush pale zhikaj e rusaja ashuvo.
9. vers
Ke baro haj bulho vudar puterdyilas angla mande, ba but si vi le dushmana.
10. vers
Kana kothe resel o Timoteush, aven pe kodo, ke bi darako te avel tumende, ke ande Rajeski butyi khinyarelpe, sar vi me.
11. vers
Apol khonyik tena dikhel les tele, ba zhan lesa pachasa, te avel mande, ke zhukarav les le phralenca kethanes.
12. vers
Le Apollo phrales pale manglom, ke te zhaltar tumende le phralenca kethanes, ba chi sar chi kamlas akanak te zhal: ba zhalatar, kana vrama avla les.
Palune ferimata haj drobovjipe
13. vers
Len sama, haj aven zurale ando patyape, keren tumare butya murshikanes, haj aven zurale.
14. vers
Sakofalo so keren ando kamipe te kerdyol.
15. vers
Mangav tumen phralale: pinzharen le Stefanaseske khereske manushen, ke von si la Achajake slabura, haj pen po suntongo slugipe suntosardine:
16. vers
vi tume muken tumen le kasavenge, haj sakoneske, kon lenca kethanes butyarelpe haj khinyarelpe.
17. vers
Losshav le Stefanaseske, le Fortunatuseske, haj le Achaikuseske ke kathe si, ke kana dur san von si kathe anda tumende,
18. vers
ke oprelosshardine vi muro dyi, haj vi tumaro. Inkren apol kasaven ande patyivate.
19. vers
Drobovjisaren tumen la Azhiake eklezhiji. Butivar drobovjisaren tumen ando Raj o Akvila haj e Priscilla kodalenca kethanes, kon lenca si ando kher.
20. vers
Drobovjisaren tumen le phral savorazhene. Drobovjisaren jekhavres suntone chumindesa.
21. vers
Me o Pal, mure vastesa iskirisarav o drobovjipe.
22. vers
Kon chi kamel le Rajes, te avel nashado! Marana tha!
23. vers
Le Raj Jezusheski gracija te avel tumenca!
24. vers
Muro kamipe savorazhenenca ando Jezush Kristo.
Könyvek
