Evangeliumo kathar o Lukach
capítulo 7
O kafarnaumicko shelari
verso 1
Kana kadal vorbimata le manushenge sa phendas, andre gelas ando Kafarnaumo.
verso 2
Jekhe shelareski sluga pale, kon kodaleske zurales skunpo sas, po meripe sas.
verso 3
Ke ashundas pa Jezush, bishaldas leste le biboldenge phuren, haj manglas les, te aveltar haj te sastyarel leske slugas.
verso 4
Kodal pale kana kothe resline kaj o Jezush, zurales mangenas les: „Patyivaloj, kerlles leske,
verso 5
ke kamel amare falura, haj ke vi e zhinagoga voj keradas amenge.”
verso 6
O Jezush apol lenca gelas. Kana aba na dur sas kathar o kher, o shelari angla leste bishaldas peske vortakon, kadale vorbenca: „Raja! Na khinyar tut, ke chi som dosta lasho, ke ande muro kher te aves.
verso 7
Haj anda kado china chi inkrav man dosta lasheske, ke angla tute te zhav: ba numa jekhe vorbasa phen, haj sastyol atunchi muri sluga.
verso 8
Ke vi me tala saktimo slugisardo manush som, haj ketani si vi telamande: haj kana kodo phenav e jekheske: »Zhatar« zhaltar: ba le kavereske: »Avtar«, kothe avel: haj mure slugaske: »Ker kado«, kerel kodo.”
verso 9
Kadal ashundines o Jezush bari dikhlas. Boldaspe, haj kade das duma kodalende kon pala leste avenas: „Phenav tumenge: inke chi ando Izrael chi arakhlom kasavo baro patyape!”
verso 10
Le legatara pale kana khere resline, aba sastes arakhline le slugas.
Le naimickone ternesko opretrajisaripe
verso 11
Pecisardyilas jekhar, ke pala kado andekh Naim anavesko foro gelas, haj lesa geline vi leske sityarde haj vi le butimata.
verso 12
Kana kaj le forosko baro vudar pasharlas, aketa, jekhe mules ingrenas avri, »ekha phivlya romnyake jekhtune shaves, haj anda foro but manusha inkernas lenca.
verso 13
Kana dikhlas la o Raj, sunusardyilas pe late, haj kado phendas lake: „Na rov!”
verso 14
Pala kodo kothe gelas, haj kaj o ingrimasko pato reslas. Pe kado, kon ingrenas les, tordyiline. Kado phendas: „Shave! Phenav tuke: ushtyi opre!”
verso 15
O mulo pale oprebeshlas haj las te vorbil. Atunchi perdal das les peska dake.
verso 16
Savorazhenen bari dar xutyildas, haj kade luvudyinas le Devles: „Baro profeta vazdadyilas mashkar amende!” Haj: „O Del avilas kaj peske populara!”
verso 17
La trabaki viaca avrizhanglyilas ande intrego Judea, haj sa ande cine gava.
Le Bolare Janoshesko pushlipe
verso 18
Sa kadal trabi viacardine le Janosheske leske sityarde.
verso 19
O Janosh pe kado peste akhardas mashkar le sityardine dujen, haj bishaldas len kaj o Jezush, te pushen lestar: „Tu san apol o Avlosardo, bake kaveres te zhukaras?”
verso 20
Kana kadal mursh kothe resline leste kade dine duma: „O Bolari Janosh bishaldas amen tute, te pu-shas tutar: »Tu san apol o Avlosardo, bake kaveres te zhukaras?«”
verso 21
Zhiande kodo chaso bute manushen slobodisardas kathar lenge nasvalimata, dukhimata haj kathar nasul duhura, haj bute zhenenge das palpale lenge jakhengo dikhipe.
verso 22
Kado phendas lenge: „Zhantar, haj phenen le Janosheske, so dikhline haj so ashundine: le korre dikhen, le bange phiren, le leprale uzhiline, le kashuke ashunen, le mule opretrajisardyon, le chorrenge phenen o evangeliumo.
verso 23
Anandoj, kon patyal ande mande.”
O Jezush pa Bolari Janosh
verso 24
Kana le Janosheske legatara gelinetar, las te vorbil pa Janosh le butimatange: „Sostar geline avri ande pusta, so kamline te dikhen? Kathar balval phurdini trestija?
verso 25
Bake so kamline te dikhen, kana avrigeline? Aketa, kon ande kuchikane gada phiren haj ando mishtyipe trajin, ande krajune dyiza beshen.
verso 26
Bake so kamline te dikhen, kana avri geline? Profeta? Ova, phenav tumenge: vi kathar e profeta majbares.
verso 27
Voj si kodo, pa kaste iskirime si:
»Aketa, bishalav mure andyelos angla tute,
kon lasharel angla tute tyo drom«.
verso 28
Phenav tumenge: Mashkar kodal shavora kas dej andas pe luma naj majbaro sar o Bolari Janosh: ba kon o majcino si ande Devlesko them, vi kodo majbaroj lestar.
verso 29
Sa e intrego butimata, kon les ashunelas, haj vi le financura, chacheske pinzhardine andre le Devles kodalesa, ke boladepe le Janosheske bolimatasa.
verso 30
Ba le farizana haj le iskiritora mudardine le Devlesko kamipe ande pende, haj chi line opre lesko bolimatipe.
verso 31
Apolal kaste te pasharav kadale popularon? Pe kaste cirden?
verso 32
Pe kodol shavora anen kon ande o foro beshen, haj save kade cipin jekhavreske:
»Bansurisardam tumenge, ba chi kheldine,
rovjardo gilyabadam, ba chi rovenas!«
verso 33
Ke avilastar o Bolari Janosh, kon manro chi xal haj mol chi pel, haj kodo phenen: »Beng si les!«
verso 34
Avilastar le Manushesko Shavo, xal haj pel, haj kodo phenen: »Aketa, o pohortyimo haj piarnyiko manush, le financengo haj le bezexaslengo vortako!«
verso 35
Ba e platnikimata chacharel kodaleske sakone shave.”
O Jezush haj e bezexasli romnyi
verso 36
Jekh farizano akhardas les, te xal leste. Andre gelas ande farizanesko kher haj kaj e mesalya beshlas.
verso 37
Haj aketa, jekh bezexasli romnyi anda o foro, kana avri zhanglas, ke ande farizanesko kher avela, makhlimata andas andekh alabashtromicko vaso.
verso 38
Tordyilas palal kaj leske punre, las te rovel, haj peske asvenca thovelas leske punre, haj koslasle peske balenca, chumidelas leske punre, haj makhlas les le makhlimatasa.
verso 39
Kana o farizano, kon akhardas les, dikhlas kado, kade das duma ande peste: „Kado profeta te avlas, dore zhanelas, koni haj soski romnyij kadi, kon leste resel, apolal, ke bezexaslij.”
verso 40
O Jezush kado phendas leske: „Shimon! Phenos tuke variso.” Kodo kade das duma: „Maistro, vorbisar!”
verso 41
„Duj unzhilimara sas jekhe manushes. Le jekhes panzhshela denara das unzhile, le kaveres panzhvardesh denara.”
verso 42
Ba chi jekh chi zhanglas leske palpale te potyinel le love, kade o manush muklas lenge o palpale potyinipe. Savo kamela les majfeder mashkar lende?
verso 43
O Shimon kodo phendas: „Kade gindisarav, ke kodo, kaske majbut muklas.” Voj pale kado phendas leske: „Mishto krisardan.”
verso 44
Pala kodo karing e romnyi boldaspe haj kado phendas le Shimoneske: „Dikhes kadala romnya? Andre avilom ande tyo kher, haj chi dan paji pe mure punre: kadi pale peske asvenca thodas mure punren, haj peske balenca koslas kodolen.
verso 45
Chumidipe chi dan man: kadi pale, zhikanasoste andre avilas, chi muklas ande dopash te chumidel mure punre.
verso 46
Ulojesa chi makhlan muro shero: kadi pale makhlimatasa makhlas mure punre.
verso 47
Anda kado phenav tuke: Lake but bezexa jertipe arakhline, ke zurales kamelas man. Kaske cerra jertin, kodo vi majcerra kamel.”
verso 48
Pala kodo kade das duma kaj e romnyi: „Jertipe arakhline tye bezexa.”
verso 49
Pe kado le mesalyake manusha kado line te vorbin ande pende: „Kon si kado, ke inke vi le bezexa jertisarel?”
verso 50
Voj pale kade das duma kaj e romnyi: „Tyo patyape muntusardas tut: zha pachasa.”
Libros
