chapter 7
Kana kadal vorbimata le manushenge sa phendas, andre gelas ando Kafarnaumo.
Jekhe shelareski sluga pale, kon kodaleske zurales skunpo sas, po meripe sas.
Ke ashundas pa Jezush, bishaldas leste le biboldenge phuren, haj manglas les, te aveltar haj te sastyarel leske slugas.
Kodal pale kana kothe resline kaj o Jezush, zurales mangenas les: „Patyivaloj, kerlles leske,
ke kamel amare falura, haj ke vi e zhinagoga voj keradas amenge.”
O Jezush apol lenca gelas. Kana aba na dur sas kathar o kher, o shelari angla leste bishaldas peske vortakon, kadale vorbenca: „Raja! Na khinyar tut, ke chi som dosta lasho, ke ande muro kher te aves.
Haj anda kado china chi inkrav man dosta lasheske, ke angla tute te zhav: ba numa jekhe vorbasa phen, haj sastyol atunchi muri sluga.
Ke vi me tala saktimo slugisardo manush som, haj ketani si vi telamande: haj kana kodo phenav e jekheske: »Zhatar« zhaltar: ba le kavereske: »Avtar«, kothe avel: haj mure slugaske: »Ker kado«, kerel kodo.”
Kadal ashundines o Jezush bari dikhlas. Boldaspe, haj kade das duma kodalende kon pala leste avenas: „Phenav tumenge: inke chi ando Izrael chi arakhlom kasavo baro patyape!”
Le legatara pale kana khere resline, aba sastes arakhline le slugas.
Pecisardyilas jekhar, ke pala kado andekh Naim anavesko foro gelas, haj lesa geline vi leske sityarde haj vi le butimata.
Kana kaj le forosko baro vudar pasharlas, aketa, jekhe mules ingrenas avri, »ekha phivlya romnyake jekhtune shaves, haj anda foro but manusha inkernas lenca.
Kana dikhlas la o Raj, sunusardyilas pe late, haj kado phendas lake: „Na rov!”
Pala kodo kothe gelas, haj kaj o ingrimasko pato reslas. Pe kado, kon ingrenas les, tordyiline. Kado phendas: „Shave! Phenav tuke: ushtyi opre!”
O mulo pale oprebeshlas haj las te vorbil. Atunchi perdal das les peska dake.
Savorazhenen bari dar xutyildas, haj kade luvudyinas le Devles: „Baro profeta vazdadyilas mashkar amende!” Haj: „O Del avilas kaj peske populara!”
La trabaki viaca avrizhanglyilas ande intrego Judea, haj sa ande cine gava.
Sa kadal trabi viacardine le Janosheske leske sityarde.
O Janosh pe kado peste akhardas mashkar le sityardine dujen, haj bishaldas len kaj o Jezush, te pushen lestar: „Tu san apol o Avlosardo, bake kaveres te zhukaras?”
Kana kadal mursh kothe resline leste kade dine duma: „O Bolari Janosh bishaldas amen tute, te pu-shas tutar: »Tu san apol o Avlosardo, bake kaveres te zhukaras?«”
Zhiande kodo chaso bute manushen slobodisardas kathar lenge nasvalimata, dukhimata haj kathar nasul duhura, haj bute zhenenge das palpale lenge jakhengo dikhipe.
Kado phendas lenge: „Zhantar, haj phenen le Janosheske, so dikhline haj so ashundine: le korre dikhen, le bange phiren, le leprale uzhiline, le kashuke ashunen, le mule opretrajisardyon, le chorrenge phenen o evangeliumo.
Anandoj, kon patyal ande mande.”
Kana le Janosheske legatara gelinetar, las te vorbil pa Janosh le butimatange: „Sostar geline avri ande pusta, so kamline te dikhen? Kathar balval phurdini trestija?
Bake so kamline te dikhen, kana avrigeline? Aketa, kon ande kuchikane gada phiren haj ando mishtyipe trajin, ande krajune dyiza beshen.
Bake so kamline te dikhen, kana avri geline? Profeta? Ova, phenav tumenge: vi kathar e profeta majbares.
Voj si kodo, pa kaste iskirime si:
»Aketa, bishalav mure andyelos angla tute,
kon lasharel angla tute tyo drom«.
Phenav tumenge: Mashkar kodal shavora kas dej andas pe luma naj majbaro sar o Bolari Janosh: ba kon o majcino si ande Devlesko them, vi kodo majbaroj lestar.
Sa e intrego butimata, kon les ashunelas, haj vi le financura, chacheske pinzhardine andre le Devles kodalesa, ke boladepe le Janosheske bolimatasa.
Ba le farizana haj le iskiritora mudardine le Devlesko kamipe ande pende, haj chi line opre lesko bolimatipe.
Apolal kaste te pasharav kadale popularon? Pe kaste cirden?
Pe kodol shavora anen kon ande o foro beshen, haj save kade cipin jekhavreske:
»Bansurisardam tumenge, ba chi kheldine,
rovjardo gilyabadam, ba chi rovenas!«
Ke avilastar o Bolari Janosh, kon manro chi xal haj mol chi pel, haj kodo phenen: »Beng si les!«
Avilastar le Manushesko Shavo, xal haj pel, haj kodo phenen: »Aketa, o pohortyimo haj piarnyiko manush, le financengo haj le bezexaslengo vortako!«
Ba e platnikimata chacharel kodaleske sakone shave.”
Jekh farizano akhardas les, te xal leste. Andre gelas ande farizanesko kher haj kaj e mesalya beshlas.
Haj aketa, jekh bezexasli romnyi anda o foro, kana avri zhanglas, ke ande farizanesko kher avela, makhlimata andas andekh alabashtromicko vaso.
Tordyilas palal kaj leske punre, las te rovel, haj peske asvenca thovelas leske punre, haj koslasle peske balenca, chumidelas leske punre, haj makhlas les le makhlimatasa.
Kana o farizano, kon akhardas les, dikhlas kado, kade das duma ande peste: „Kado profeta te avlas, dore zhanelas, koni haj soski romnyij kadi, kon leste resel, apolal, ke bezexaslij.”
O Jezush kado phendas leske: „Shimon! Phenos tuke variso.” Kodo kade das duma: „Maistro, vorbisar!”
„Duj unzhilimara sas jekhe manushes. Le jekhes panzhshela denara das unzhile, le kaveres panzhvardesh denara.”
Ba chi jekh chi zhanglas leske palpale te potyinel le love, kade o manush muklas lenge o palpale potyinipe. Savo kamela les majfeder mashkar lende?
O Shimon kodo phendas: „Kade gindisarav, ke kodo, kaske majbut muklas.” Voj pale kado phendas leske: „Mishto krisardan.”
Pala kodo karing e romnyi boldaspe haj kado phendas le Shimoneske: „Dikhes kadala romnya? Andre avilom ande tyo kher, haj chi dan paji pe mure punre: kadi pale peske asvenca thodas mure punren, haj peske balenca koslas kodolen.
Chumidipe chi dan man: kadi pale, zhikanasoste andre avilas, chi muklas ande dopash te chumidel mure punre.
Ulojesa chi makhlan muro shero: kadi pale makhlimatasa makhlas mure punre.
Anda kado phenav tuke: Lake but bezexa jertipe arakhline, ke zurales kamelas man. Kaske cerra jertin, kodo vi majcerra kamel.”
Pala kodo kade das duma kaj e romnyi: „Jertipe arakhline tye bezexa.”
Pe kado le mesalyake manusha kado line te vorbin ande pende: „Kon si kado, ke inke vi le bezexa jertisarel?”
Voj pale kade das duma kaj e romnyi: „Tyo patyape muntusardas tut: zha pachasa.”