chapter 22
Pashardyolas le bi kamire manreske bare dyesa, saves paskaske anavarenas.
Le angrashaja haj le iskiritora kodo zhukarenas, ke sar shaj mudarenas les, ba daranas kathar le manusha.
Atunchi o beng huralylas le Judashes, kas ishkariotickoneske anavarenas, haj kon jekh sas mashkar le deshuduj.
Gelastar haj vorbisardas le angrashajenca, ke sar dela les ande lengo vast.
Kodal losshajline, haj foro kerdine, ke love dena les.
Voj zhukarelas e vrama, te shaj del les ande lengo vast, kana ch«avla butimata krujal leste.
Reslas le bi kamire manresko dyes, pe soste opretrubulas te sarkafimosaren la patradyake bakrora.
O Jezush bishaldas le Peteres haj le Janoshes: „Zhantar, haj keren amenge la patradyaka bakrora, te shaj xas la!”
Kodal pushline: „Kaj kames, te keras la?”
Kodo phendas lenge: „Andre te zhana ando foro, rakhadyona jekhe manushesa, kon pajesko khoro ingrel. Zhan pala leste ande kodo kher, kaj andre zhal,
haj penen kodo le khereske rajeske: »O Maistro kado phenipe bishalel tuke: Kaj si kodo than, kaj la patradyaka bakrora mure sityardenca shaj xos?«
Voj sikavela tumenge jekh opralutno than angle lashardines, kothe keren la.”
Gelinetar apol, haj kade arakhline sakofalo, sar phendas lenge, haj kerdine la patradyako ratyako xamo.
Kana avilastar o chaso, kaj e mesalya beshlas le aposhtolenca kethane,
haj kodo phendas lenge: „Dorosa dorosardom pe kodo, te xav tumenca kado patradyako ratyako xamo, zhiso anglal dukharos.
Ke phenav tumenge: majbut chi xav anda late, zhikaj andre chi pherdyola ande Devlesko them.”
Pala kodo xutyildas o taxtaj, najisipe phendas, haj kade das duma: „Xutyilen kado, haj ulavenles mashkar tumende.
Ke phenav tumenge: ke kathar kadi vrama chi pav anda drakhengo upajipe, zhikaj ch«aveltar le Devlesko them.”
Pala kodo xutyildas o manro, najisipe phendas, phaglas les, haj kothe dasles lenge kadale vorbenca: „Kadoj muro trupo, savo anda tumende davadyol. Kado te keren pe muro serovjipe!”
Zhikade pe xamosko agor xutyildas o taxtaj, haj kodo phendas: „Kado taxtaj o nyevo teshtamentoj ande muro rat, savo anda tumende avri shordadyol.
Ba aketa, le purritoresko vast muresa jekharsa si pe mesalya.
Ke le Manushesko Shavo apolal zhaltar, sar kodo vi iskirime si, ba jaj kodale manusheske, kon purrij les!”
Pe kado line jekhavrestar te pushen, ke kon si kodo, kon kerla kado mashkar lende?
Rivalizalipe kerdyilas mashkar lende pa kodo, ke kon si o majbaro mashkar lende.
Pe kado kodo phendas lenge: „Le popularenge kraja krajinpe pel manusha, haj kas saktimo si pe lende, lashe kerdarenge phenaven pen.
Ba tume na kade te keren, ke kon o majbaro si mashkar tumende, t«avel kasavo sar o majcino, haj kon anglalari si, t«avel kasavo sar jekh sluga.
Ke kon si majbaro: kodo kon kaj e mesalya beshel, bake kodo, kon opreslugisarel? Na kodo, kon kaj e mesalya beshel? Ba me vi kade, kade som mashkar tumende, sar kon slugisarel.
Tume avriinkerdine manca vi ande mure pharimata,
anda kado tumenge dav o them, so mange das muro Dad,
ke kaj muri mesalya te xan te pen ande muro them, haj pa krajicko iskamin te krisaren pe Izraeleske deshuduj kunpaniji.
Shimon, Shimon! O beng avri manglas tumen, avri te alosarel tumen sar le dyives,
ba me rudyisardom anda tute, tena cerrajvel tyo patyape, haj jekhar karing o Del boldines, te zurares tye phralen”
Voj pe kado kodo phendas leske: „Gata som tusa ande robilya bake ande o meripe te zhav!”
Ba o Jezush kodo phendas: „Phenav tuke Peter: zhiso anglunes opre te cipilas o bashno, vi trivar tele asvikaresa, ke pinzhares man.”
Pala kado kodo phendas lenge: „Kana bi bukhfaresko, bi trastako, haj bi sandalenge bishaldom tumen, dukharenas faltipe ande varisoste?”
Von kodo phendine: „Ande khancheste.” Pala kodo kade vorbilas majdur: „Ba akanak apol kas si bukhfaro, te ingrel les pesa, zhikade vi e trasta, kas pale najle, te biknel peske opralutne gada, haj te kinel xanro.
Ke phenav tumenge: andre trubuj te pherdyol pe mande, so iskirime si: »Mashkar le nasula manusha gindisardine les«. Ke so pa mande del duma, andre pherdyola.”
Pe kado von kade dine duma: „Raja, aketa, kathej le duj xanre.” Voj pale kodo phendas lenge: „Dostaj!”
Pala kodo gelastar, haj sar sityilas pe uloj kashtengo plaj gelas: zhanas pala leste vi leske sityarde.
Kana kothe reslas, kodo phendas lenge: „Rudyisaren, ande zumavjimata tena peren!”
Pala kodo dore sar kana shuden jekh barr, kasavo dur gelas lendar, haj changadines kade rudyilas:
„Dade! Te kames, le mandar kado taxtaj, ba na muro kamipe te pherdyol andre, ba tyiro.”
Atunchi sikadyilas leske jekh andyelo anda cheri, haj zurardas les. Pala kodo merimaski dar muklyosardyilas pe leste haj inke majfeder rudyilas.
Pa lesko chikat le avritatyimaske paja, kasave sas, sar pe phuv peline rateske pitya.
Pala kodo opreushtyilas anda rudyisaripe, haj kothe gelas kaj peske sityarde, ba kathar e briga sovjindes arakhlas len.
Kodo phendas lenge: „Sostar soven? Ushtyen opre, rudyisaren, ke ande zumavjimata tena peren!”
Inke vorbilas, kana ketani pasharenas: o Judash andas len, jekh mashkar le deshuduj. Kothe gelas kaj o Jezush, te chumidel les.
Ba o Jezush kodo phendas leske: „Judash! Chumidesa purris le Manusheske Shaves?”
Kodal, kon krujal leste sas, dikhles, ke so avla, kodo phendine: „Raja, mashkar lende te shinas xanresa?”
Jekh mashkar lende vi opral shindas pe angra-shajeski sluga, haj tele shindas lesko chacho kan.
Ba o Jezush kodo phendas palpale: „Muken les, dostaj!” Pala kodo kaj leske kan reslas, haj sastyardas les.
Atunchi o Jezush kodo phendas kodalenge, kon pe leste aviline, le angrashajenge, le khangerange ketanenge haj le phurenge: „Sar pekh chor, kade aviline xanrenca haj rolyanca.
Kana sako dyes mashkar tumende somas ande khangeri, chi vazdine pe mande vast, ba kado tumaro chasoj, haj le tunyarnyikone saktimosko.”
Xutyildine apol les, haj ande le angrashajesko kher ingerdine les.
Kana jag kerdine ande avlinako mashkar haj krujal beshlinela, vi o Peter mashkar lende beshlas.
Jekh sluga dikhlas les, ke kothe beshel kaj e jag, mishto dikhlas les, haj kado phendas: „Vi kado lesa sas!”
Ba voj asvikarelas: „Romnyale, chi pinzharav les!”
Na butesa pala kado jekh kaver dikhlas les, haj kade das duma: „Vi tu mashkar lende san.” O Peter kodo phendas palpale: „Manusha! Chi som!”
Dore pakh chaso pale zurarlas jekh kaver: „Phenav, vi kado lesa sas, ke galileickoj.”
O Peter pe kado kade das duma: „Manusha! Chi zhanav, so vorbis!” Haj atunchi, kana inke vorbilas, oprecipisardas o bashno.
Atunchi o Raj palpale boldaspe, haj po Peter dikhlas. O Peter pale palpale serosardas pe Rajeske vorbi, ke kodo phendas leske: „Zhiso anglal adyes opre cipila o bashno, vi trivar asvikaresa man.”
Atunchi avri gelas, haj zurales las te rovel.
Le mursh pale, kon samalenas pe leste, prassanas haj marenas les.
Tele sharadine leski mosura, haj kodo pushline lestar: „Profecisar! Kon maladas tut?”
Haj vi majkaver falos kushenas les.
Kana zorisardyilas, kethane aviline le popularenge phure le angrashaja haj le iskiritora, haj angla pengo angsvato ingerdine les. Kade dine duma: „Tu te san o Kristo, phen avri amange!”
Voj kodo phendas lenge: „Vi avri te pheno tumenge, chi patyana:
kanapale pushav tumen, chi den palpale vorba.
Ba kathar kado abakanak le Manushesko Shavo pe saktimone Devleski chachi rig beshela”.
Pe kado savorazhene kado phendine: „Apolal tusan le Devlesko Shavo?” O Jezush kodo phendas lenge palpale: „Tume phenen, ke kodo som.”
Pe kado savorazehne kado phendine: „So grizha trubujas t«avel inke amen pe colaxara? Kana vi ame ashundam anda lesko muj.”
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly