chapter 2
Pecisajlaspe apol ande kodal dyesa: Vladipe gelas avri kathar o Augustus chasaro, te iskirin kethane sa le manushen pe intrego luma.
Kado angluno kethane iskiripe atunchi pecisardyilas, kana la Siria o Kvirinus krajilas.
Vi gelastar sakon, kethane te iskirisaren len, sakon ande pesko foro.
Opregelas kade vi o Jozhef anda Galilea, anda Nazaretesko foro ande Judea, ande Davidesko foro, saves Betlehemeske anavarenas, ke anda Davidesko kher haj falo sas,
kethane te iskirin les la Marijasa, peska piramnyasa kethanes, savi phari sas.
Kana kothe sas, avilas e vrama, pe luma te anel le shavores,
haj vi pe luma andas peske anglunes-arakhadyiline shaves. Ando sherand sharadas les haj ande jasla pashjardas les, ke chi line than andej khera.
Pe kodal phuva malyara ratyarenas, haj sama lenas pe penge bakre ande ratyi.
Jekhar feri kothe das pashalende le Rajesko andyelo, haj le Rajesko fimlalipe krujal ablyolisardas len. Zurales darajline.
O andyelo kado phendas lenge: „Na daran! Aketa, bari lossh phenav tumenge, anda soste rig avla sakone popolaron.
Adyes arakhadyilas tumenge o Muntosari, o Raj Kristo, ande Davidesko foro.
Kado avla o somno tumenge: Rakhena jekhe cine shavores ando sherand sharado haj ande jasla pashjardo.”
Atunchi rajongire ketanengo butipe line krujal le andyelos, haj asharnas le Devles:
„Luvudyipe ando uchipe le Devleske,
haj pe phuv pachipe le lashekamle manushenge!”
Haj pelaspe, ke kana le andyelura palpale geline ando rajo, le malyara kade dine duma mashkar pende: „Zhas perdal ando Betlehemo, haj dikhas kodi traba, so pecisardyilas, haj saves o Raj viacarisardas amenge.”
Geletar apol sidyardines, vi arakhline la Marija haj le Jozhefes, haj ande jasla pashjindone cine shavores.
Kana dikhline len, phendine kodo sakoneske, so pa shavoro ashundine.
Haj sakon, kon ashundine len, chudinaspe pe kodo, pa soste le malyara vorbinas lenge.
E Marija pale chi bisterdas kadal trabi, haj unyivar gindilaspe pe lende ande pesko ilo.
Le malyara pale palpale geline, haj asharnas le Devles sa anda kodal trabi, so ashunde haj dikhline kade, sar vi phendine lenge.
Kana avilastar o oxtoto dyes, krujal te shinen le shavores, o Jezush anav dine leske, kade, sar o andyelo anavardas les, zhiangla soste leski dej phari pelas.
Kana pale nachilastar lenge uzhilimaske dyesa, opreingerdine les ando Jeruzhalemo sar le Mozesheski kris avri phenel kodo, andre te sikaven les le Rajeske,
sar ande le Rajeske krisa iskirime si: „Sako anglunes arakhadyilino shavo le Rajeske te avel suntosardo”,
haj ke sarkafimo te sikaven andre, sar le Rajeski kris phenel: „Duje chiriklyoran bake duje gulunboren”.
Trajilas apol ando Jeruzhalemo jekh manush, Shimeon sas lesko anav, chacho haj Del patyamno manush sas, kon zhukarelas le Izraelesko zhutisajvipes, haj o Sunto Duho sas pe leste.
O Sunto Duho avri phendas leske, ke meripe chi dikhela, zhikaj chi dikhela le Rajeske Opremakhlones.
Atunchi pe Duhosko phenipe ande khangeri gelas. Kana e dej haj o dad andre ingerdine le cine Jezushes ande khangeri, kade te keren sar e kris avri phenel kodo,
ande peski angalyi las les, haj le Devles ashardes kade das duma:
„Akanak bishales, Raja tye slugones
kathar tye alava ande pacha,
ke dikhline mure jakha tyo muntusardyipe,
saves angla sakone populara kerdan,
t«avel fimlalipe le manushenge
haj vi fimlal kodolen
haj luvudyij tye popularon, thaj le Izraeles”.
Lesko dad haj dej bare dikhline pe kodo, so pa leste phendine.
Ashtyilisardas len o Shimeon, leska dake, la Marijake pale kado phendas: „Aketa, pe butengo rumuvjipe haj opretrajisaripe avla voj ando Izrael: somno avla, saveske na phenena
– haj tyiro duho xanro phirela perdal –, ke avri te zhanardyol bute ilenge gindimata.”
Sas jekh Anna anavardi romnyi, kon profeta sas, la Fanuelaki shej, anda Aserengo falo. Zurales phuri sas aba, pala pesko shejipe, peske romesa efta bersh trajisardas:
oxtovardesh thaj shtari bershengi phivlyi sas, haj chi shindyilastar kathar e khangeri, postyipesa haj rudyipesa slugisarlas kothe dyese haj ratyi.
Vi voj kothe avilas zhi ande kodo chaso, asharlas le Devles, haj vorbilas pa leste sa kodalenge, kon zhukarenas le Jeruzhalemesko muntusaripe.
Kana sakofalo kerdine save le Rajeske krisa phenen, palpale geline ande Galilea, ande pengo foro, ando Nazaret.
O shavoro pale barolas haj zurardyolas, pherdyilas platnikipesa, haj le Devleski gracija sas pe leste.
Leski dej haj dad sako bersh zhanastar ando Jeruzhalemo pe patradyake bare dyesa.
Kana apolal deshuduje bershengo kerdyilas, opregele savorazhene ando Jeruzhalemo, sar kadi e kris avri phenel pe baredyesa.
Kana nachiletar le bare dyesa haj aba zhanas khere, o shavoro Jezush ando Jeruzhalemo ashilas, haj von chi line kado sama.
Ke kodo gindinas, ke mashkar le dromara manusha si. Aba jekh dyes zhanas, haj atunchi line te roden les mashkar le pinzharde haj nyamura.
Ke chi arakhline les, palpale geline ando Jeruzhalem, te roden les.
Haj kade pecisardyilas, ke pa trin dyes vi arakhline les ande khangeri, sar mashkar le sityara beshelas, ashunelas haj pushelas len.
Savorazhene, kon ashundine les, bari dikhenas pe lesko godyaveripe haj pe leske phenimata.
Kana dikhline les, bari dikhline, haj leski dej kado phendas leske: „Muroshavo! Sostar kerdan kado amanca? Aketa, tyo dad haj me brigasles rodasas tut.”
Voj pale kado phendas lenge: „Sostar rodenas man? Chi zhanenas, ke mange ande mure Dadeske trabi trubuj te avav?”
Ba von chi hatyardine, so lenge phendas.
Atunchi kheregelas lenca. Gelastar ando Nazaret, haj mukhlaspe lenge. Leski dej garadas sa kadal ande pesko ilo.
O Jezush pale barolas ando platnikipe, ande vrama haj skunpoipe angla o Del haj angla e manusha.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly