Evangeliumo kathar o Lukach

chapter 9


Chapters:


Le deshudujengo bishalipe


verse #1

Pala kado kethane akhardas le deshuduje aposhtolen, zor haj saktimo das len pe bengengo nashavjipe haj pe nasvalimatange sastyarimata.


verse #2

Pala kodo bishaldas len, te viacaren le Devlesko them, haj te sastyaren le nasvalen.


verse #3

Kodo phendas lenge: „Khanchi na ingren po drom, chi rolyi, chi trasta, chi manro, chi love, haj chi duj gad tena avel tumen!


verse #4

Ande savo kher andre zhan, ashon kothe, haj kothar zhan majdur!


verse #5

Kana pale varikaj chi muken tumen andre, kana muken o foro, inke vi tumare punrengo praho maren tele, chacharimaske pe lende!”


verse #6

Geletar apol, andre phirdine le gava, viacarisarenas o evangeliumo, haj sastyarenas sako rig.


Phenimata pa Jezush


verse #7

O Herodesh fertajicko kraj ashundas pa sakofaloste, haj daralas, ke unyizhene kodo phendine, ke:


verse #8

„O Janosh trajisajlas opre anda o meripe”, kavera pale, ke: „O Illesh sikadyilas”, inke kavera pale: „Mashkar dulmutane profeti trajisajlas opre varisavo”:


verse #9

Atunchi o Herodesh kodo phendas: „Le Janoshesko shero teleshinadom: kon si apol kado, pa kaste kasave ashunav?” Haj kamlas te dikhel les.


Le sityardengo palpale avlipe: le manresko butaripe


verse #10

Le aposhtolura palpale aviline, haj phendine leske sa kodola, so kerdine. Pala kodo lenca kethanes gelastar andekh Betsaidake anavarde forosesko pashipe.


verse #11

Kana le manusha kado avrizhangline, pala leste geline. Voj peste mukhlas len, vorbilas lenge pa Devlesko them, haj kodalen, kon nasvale sas, sastyardas.


verse #12

Ba o kham aba tele nakhelas, anda kado le deshuduj kothe geline leste, haj kado phendine: „Bishal le manushen, te shaj zhantar ande cine gava, te rakhen sovjimasko than, haj te shaj zhanen vi xamasko te kinen, ke ande pusta samle.”


verse #13

Ba voj kado phendas: „Tume den len te xan!” Kodal kado phendine: „Naj amen majbut sar panzh manre haj duj mashe, kana feri chi zhasatar ame haj kinas xamasko kadale intregone manushenge.”


verse #14

Ke le mursh dore panzh miji zhene sas. Atunchi kado phendas peske sityardenge: „Beshaven len tele ande panzhvardeshenge grupura!


verse #15

Vi kade kerdine, haj vi tele beshade savorazhenen.


verse #16

Atunchi xutyildas le panzhe manren haj le duje mashen po cheri dikhlas, ashtyilisardas len, phaglasle, haj peske sityardenge dasle, te denle kothe le manushenge.


verse #17

Savorazhene xaline, haj chajiline. Pala kodo opre kidine, so mukhline: deshuduje koshnyici pherdo manrenge kotorenca.


Le Peteresko avriphenipe: le Jezusheski angluni profecia pa dukhardyipe haj pa opretrajisaripe


verse #18

Pelaspe jekhar, ke kana korkoro rudyilas, haj vi le sityarde lesa sas, pushlas len: „Kaske inkrel man e butimata?”


verse #19

Von kado phendine: „Si kon le Bolare Janosheske, kavera le Illesheske, inke kavera pale kodo phenen, ke anda dulmutane profeti trajisardyilas opre varikon.”


verse #20

Pala kodo pushlas lendar: „Haj tume kaske inkren man?” O Shimon Peter das vorba palpale: „Le Devleske Kristoske.”


verse #21

Voj pale pe lende vladisardas haj phendas lenge, ke kado khanyikaske tena phenen avri, haj kade das duma:


verse #22

„Le Manusheske Shaveske but trubuj te dukharel, trubuj te xasaren les le phure, le rashajenge anglalutne haj le iskiritora, trubuj te mudaren les, haj po trito dyes opre trubuj te trajisardyol.”


Pala Jezush zhalipe: haj o pesasvikaripe


verse #23

Pala kodo sakoneste vorbisarlas: „Kana varikon pala mande kamel t«avel, te asvikarel pes, haj te lel opre pesko trushul sakodyes, haj t«avel pala mande.


verse #24

Ke kon kamel te muntul pesko trajo, xasarel kodo: kon pale xasarel pesko trajo anda mande, muntul kodo.


verse #25

So mol le manusheske, kana e intrego luma leski avla, pes pale xasarel, bake ande peste dosh dukharla?


verse #26

Ke kon lazhal man haj mure alava, kodales vi le Manushesko Shavo lazhala, kana avela ande pesko, ande Dadesko haj ande Suntone andyelengo luvudyipe.


verse #27

Chachikanes phenav tumenge: si mashkar kathe tordyiline unyizhene, kon chi pinzharna o meripe, zhikaj chi dikhena le Devleske themes.”


Le Jezushesko avriparnyipe


verse #28

Pecisardyilas pala kadal phenimata dore oxto dyesenca majpalal, ke pashapeste las le Peteres le Jakabos haj le Janoshes, haj opre gelas po plaj te rudyil.


verse #29

Sar rudyilas, leski mosura avriparnyilas, leske gada pale parnes fimlalas.


verse #30

Haj aketa, duj mursh vorbinas lesa, o Mozesh haj o Illesh,


verse #31

kon ande luvudyimata sikadyiline, haj vorbinas pa leski zhalimata, so ande o Jeruzhalemo trubuj leske andre te pherdyarel.


verse #32

Le Peteres haj kon lesa sas pizdas e lindra. Kana opreushtyiline, dikhline lesko luvudyipe haj le duje murshen, kon kothe tordyonas lesa.


verse #33

Haj kana nachiline lestar, o Peter kado phendas le Jezusheske: „Maistro! Mishto si amenge kathe t«avas! Mukh te keras trin cerhi: tuke jekh, le Mozesheske jekh haj le Illesheke jekh!” Chi zhanelas apolal, ke so phenel.


verse #34

Zhikana kadal phenelas, jekh noro huraldas tele, haj andre sharadas len. Kana ando noro resline, dar xutyildas len.


verse #35

Anda noro glaso ashundyilas: „Kado muro alosardo shavoj, les ashunen”.


verse #36

Kana o alavipe nachilastar, o Jezush pale korkoro sas. Von pale chi vorbinas, haj khanyikaske chi dine duma ande kodal dyesa, so dikhline.


Jekhe bengale ternesko sastyaripe


verse #37

Pecisardyilas kaverdyes apol, ke sar tele geline pa plaj, baro butipe avelas karing lende.


verse #38

Haj aketa anda butimata oprecipisardas jekh mursh: „Maistro! Mangav tut, dikh pe muro jekhtuno shavo, ke numa voj si mange!


verse #39

Aketha, jekh duho xutyilel les haj jekharsa oprecipil: kade shudel les ke spuma marel, haj feri unyivar del les pacha.


verse #40

Manglom tye sityarden te nashaven les avri, ba chi zhangline.”


verse #41

O Jezush kado phendas: „O, bipatyamne haj rumome populara! Zhisode vrama t«avav inke tumenca haj zhisodenge te toleralisarav tumen? An angle tye shaves!”


verse #42

Kana angle avilas, kaj e phuv shindas les o beng, haj opre tele shudelas les. Ba o Jezush po biuzho vladisardas, sastyardas le shavores, haj palpale das les leske dadeske.


verse #43

Atunchi savorazhene bari dikhline pe Devlesko baripe.

Dujto profecipe pa dukhardyipe haj pa opretrajisaripe Ke savorazhene chudinaspe pe kodo so kerdas, voj kade das duma kaj peske sityarde:


verse #44

„Ashunen mishto kadal vorbimata: le Manusheske Shaves ande le manushenge vast dena.”


verse #45

Ba von chi hatyardine kadal vorbi. Garado sas angla lende, tena hatyarenle, ba chi tromajline te pushen les pa kadal vorbimata.


Le sityardengo rivalizalipe


verse #46

Pala kodo opreavilas e vorba, ke kon si mashkar lende o majbaro.


verse #47

O Jezush kon pinzharelas lenge ilengo gindipe, kothe akhardas jekhe shavores, haj pashapeste tordyardas les,


verse #48

haj kodo phendas lenge: „Kon andre svagarel kadale shavores ande muro anav, man svagarel andre: haj kon man andre svagarel, kodales svagarel andre, kon man bishaldas. Ke kon mashkar tumende o majcinoj, kodo si o majbaro.”


O streno kon chudimata kerelas


verse #49

Atunchi o Janosh kade das duma: „Maistro! Dikhlam varikas, kon ande tyiro anav bengen nashavelas, haj nashtisardam leske, ke ch«avel pala tute amenca kethanes.”


verse #50

O Jezush kodo phendas lenge: „Na nashtisaren leske: Ke kon chi del pe tumende, kodo tumenca si.”


Le samaritanengo dushmanipe


verse #51

Kana aba pashe sas leske opreingremaske dyesa, gindisardas, ke ando Jeruzhalemo zhal.


verse #52

Legatara bishaldas angla peste, kon vi gelinetar, haj ande samaritanengo jekh than resline, than te keren leske.


verse #53

Ba kodal chi mukhline len andre, ke ando Jeruzhalemo kamelas te zhal.


verse #54

Kado dikhlines, leske sityarde, o Jakab haj o Janosh kado phendine: „Raja! Kames apol, te mangas, te hural tele jag anda cheri, haj te mudarel len?”.


verse #55

Ba voj karing lende boldaspe haj tele lazhavardas len,


verse #56

haj gelinetar andekh kaver gav.


Pala Jezush zhalipe


verse #57

Sar zhanas po drom, varikon kodo phendas lenge: „Zhav pala tute, zhikaj zhas!”


verse #58

O Jezush kodo phendas leske: „Le hilpan xiv sile, le chereske chiriklyan pale kulybo, ba le Manusheske Shaveske naj kaj tele shol pesko shero.”


verse #59

Jekhe kavereske kado phendas: „Av pala mande!” Kodo kado phendas palpale: „Raja! Mukh majanglal, te zhavtar, haj te praxosarav mure dades!”


verse #60

O Jezush kado phendas leske: „Mukh pe mule, te praxosaren penge mulen: tu pale zha haj viacar le Devlesko them!”


verse #61

Vi jekh kaver phendas: „Raja! zhav pala tute: ba mukh, majanglal te shaj dyesaravtar kathar mure nyamura!”


verse #62

O Jezush kodo phendas leske: „Kon pesko vast pe plugoske sastra shol haj palpale dikhel, kodo naj lasho pe Devlesko them.”

Chapters:


Books