chapter 24
Pe kurkesko angluno dyes kana zorilas kaj o murmunto geline, penca ingerdine le parfumon so kerdine.
O barr aba nas pe murmuntosko vudar kana kothe resline.
Kana andre ushtyiline, chi arakhline le Raj Jezushesko trupo.
Pelaspe apol, zhikaj pa kado vorbinaspe, jekharsa duj manusha tordyonas kothe pasha lende, ande ablyolinde gada.
Le romnya darajline, haj pe phuv dikhline tele. Kodal pale kade dine duma lende: „Sostar roden le zhuvindes mashkar le mule?
Naj kathe, ke opretrajisardyilas. Serosaren feri palpale, so phendas tumenge, kana inke ande Galilea sas:
«Le Manusheske Shaveske ande le bezexasle manushenge vast trubul te perel, po trushul te tannaren les, ba po trito dyes opretrajisardyola.«”
Atunchi ande lengi godyi aviline kadal vorbi.
Palpale geline apol kathar o murmunto, haj phendine sa kado le deshujekhenge haj le majbutenge.
E Marija Magdolna, e Johanna, haj Marija, le Jakaboski dej, haj kon lenca sas le majbut romnya phendine sa kado le aposhtolenge.
Ba von numa viziovoske inkrenas kadala vorbi, haj chi patyanas lenge.
Ba o Peter vi kade oprelaspe, haj kaj o murmunto nashlas. Andre dikhlas, ba numa le poxtana dikhlas, kade pe pecimata chudindes khere gelas.
Kodo dyes dujzhene mashkar lende andekh Emmaiusesko than geline, savo kathar o Jeruzhalemo shovardesh shtadiumo dur sas,
haj vorbinaspe jekhavresa sa pa kodo, so pecisajlas.
Sar vorbinas, jekharsa o Jezush pasharelas lende haj lenca inkerdas.
Ba lenge jakhen palpale inkrelas variso, opretena pinzharen les.
Duma das lende: „Pa soste vorbin tume jekhavresa po drom?” Von brigasles tordyiline.
O jekh, kaske Kleofash sas lesko anav, kodo phendas: „Tu san o korkoruno streno ando Jeruzhalemo, kon chi zhanel, ke so pecisajlas kothe ande kadal dyesa?”
Voj pushlas lendar: „So?” Kodo phendine leske: „Le Nazaretickone Jezusheski traba, kon ande kerdyimata haj ande vorbi zurales baro profeta sas angla o Del haj angla intrega manusha.
Ke sar dine les le angrashaja haj lenge anglune manusha pe merimaski kris, haj sar tannardine les po trushul.
Ame pale kodo sperantisardam, ke voj muntula le Izraeles. Haj sa pe kadal opralutnes, aba kadal trabi trin dyesa ke pecisajline.
Ba vi unnyi romnya save mashkar amende sile daradine amen, kon kana zorilas kaj o murmunto sasle,
haj ke chi arakhline lesko trupo, palpale aviline kodala viacasa, ke vi andyelonge sikadyimata dikhline, kon kodo phendine, ke trajil.
Mashkar amare amala unnyizhene kaj o murmunto geline, haj kade arakhline les, sar le romnya phendine kodo, ba les chi dikhline.”
Pe kado voj kodo phendas lenge: „O, tume chalade haj phare ileskire pe kodo, ke te patyan sa kodo, so le profeti phendine!
Haj na kadala trubusardas te dukhareltar le Kristoske, andre te shaj zhal ando luvudyipe?”
Haj kathar o Mozesh zhikaj le majbut profeti, sakofalo avri phendas lenge, so ande le iskirimata pa leste vorbilas.
Kana kothe resline kaj o gav, kade kerdas sarkon majdur kamel te zhal.
Ba palpale inkrenas les: „Ash amenca, ke aba ratyol, haj tele nakhel vi o kham aba!” Andre gelas, lenca te ashol.
Kana kaj e mesalya beshlas lenca, xutyildas o manro, ashtyilipe phendas, phaglas les haj kothe dasles lenge.
Atunchi puterdyilas lenge jakha, haj pinzhardine les, ba voj nachilastar angla lenge jakha.
Von pale kade dine duma jekhavreste: „Haj chi phabolas amaro ilo kana vorbilas amende po drom, haj opreputerdas angla amende le iskirimatan?”
Inke ande kodo chaso oprelinepe, haj palpale geline ando Jeruzhalemo, haj kethanes arakhline le deshujekhen, haj kon lenca sasle.
Kodal kade dine duma: „Chachikanes opretrajisardyilas o Raj, haj sikadyilas le Shimoneske!”
Pe kado vi von phendine lenge, ke so pecisardyilas po drom, haj kodo, ke sar pinzhardine les opre kana phaglas o manro.
Zhikaj pa kadal vorbinaspe, jekharsa o Jezush tordyolas mashkar lende, haj kodo phendas lenge: „Pachipe tumenge!”
Zurales darajline, ke kodo gindisardine, ke dichimata dikhen.
Ba voj pushlas lendar: „Sostar darajline, haj sostar kerdyilas bipatyape ande tumaro ilo?
Dikhen mure vast haj mure punre, ke le dichimatas naj les mas haj kokala, ba sar dikhen, man si.”
Kado phendas, pala kodo sikadas lenge peske vast haj punre.
Ke ande pengi lossh inke chi akanak chi patyanas, haj feri chudinaspe, kodo phendas lenge: „Si tumen kathe varisosko xamasko?”
Pe kado dine les jekh kotor peko masho.
Lasles, haj angla lenge jakha xalas anda leste.
Pala kodo kade das duma lende: „Kadal si kodal alava, so phendom tumenge, kana inke tumenca somas, ke andre trubuj te pherdyol sa kodaleske, so tele si iskirime pa mande ande Mozesheske krisa ande profeta haj ande salmura.”
Atunchi puterdas lengo hatyaripe, te hatyaren le iskirimata.
Kodo phendas lenge: „Kade si iskirime, ke le Kristoske trubuj te dukhardyol, haj po trito dyes opre te trajisardyol anda o meripe.
Ande lesko anav kaj o Del boldipe trubuj te sityaren pe bezexengo jertipe zhikathar o Jeruzhalemo sakone popularenge.
Tume dikhara sanle kadaleske.
Me maj bishalo tumenge kodo, so muro Dad phendas. Tume feri ashon ando foro, zhikaj chi pherdyarel tumen e zor anda uchipe.”
Pala kodo avriingerdas len, na dur kathar e Betania, oprevazdas pesko vast, haj ashtyilisardas len.
Sar ashtyilisarelas len las te durutnisajvel lendar, haj opreingradyilas ando rajo.
Changadines rudyinas leste, pala kodo bara losshasa palpale geline ando Jeruzhalemo.
Sagutnes kothe sasle ande khangera, haj ashtyilisarenas le Devles.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly