chapter 6
Pecisardyilas apol, ke savatone, kana pe phuva phirelas, leske sityarde tele shingrenas le spikura, haj penge vastenca avri mordines xanas len.
Mashkar le farizana unyizhene kodo phenenas: „Sostar keren kodo, so savatone naj slobodo?”
O Jezush kado phendas lenge: „Chi ginade, ke so kerdas o David, kana bokhajlas, haj kon lesa sas?
Ke sar gelas andre ande Devlesko kher, sar las le avri shutine manre, xalas, haj das vi le majbuten kon lesa sas, saven naj slobodo te xan, feri korkoro le rashajenge?”
Pala kodo inke kado phendas pashe: „Le Manushesko Shavo rajil vi le savatones.”
Pecisardyilas pala kodo pekh kaver savatuno dyes, ke andre gelas ande zhinagoga haj sityarelas. Sas kothe jekh manush, kaske lesko chacho vast shutyilastar.
Le iskiritora haj le farizana pale dikhenas, ke sastyarel dore vi savatone, te rakhen variso, sosa shaj dosharen les.
Ba voj pin-zharelas lenge gindimata, haj kade das duma kaj kodo manush saveske tele sas shutyilime lasko vast: „Ushtyi opre haj tordyu mashkaral!”
Pala kodo o Jezush kodo phendas lenge: „Pushav tumen, slobodo si apol savatone lashipe bake nasulipe te keras, trajo te muntusaras bake mukas te xasajvel?”
Pala kodo krujal dikhlas pe savorazhenende, haj kade das duma kaj o manush: „Lunzhar avri tyo vast!” Kodo vi kade kerdas, haj sastyilas lesko vast.
Kodal pe kado zurales oprexolyajline haj pa kodo linepe te vorbin mashkar pende, so te keren le Jezushesa.
Pecisardyilas apol ande kodal dyesa, ke avri gelas po plaj te rudyil, haj e intrego ratyi ande le Devleso kamimatipe ratyardas.
Kana zorisardyilas, peste akhardas peske sityarden, haj avrialosardas mashkar lende deshudujen. Kadalen aposhtolenge anavardas:
Le Shimones, kas vi Petereske anavarenas, haj le Andrashes, leske phrales, haj inke le Jakabos haj le Janoshes, le Filipos haj le Bertalanes,
le Matevos haj le Tamashos, le Jakabos, le Alfeuseske shaves, haj le Shimones, kas Zeloteske anavarenas,
le Judashes, le Jakabeske shaves, haj le ishkariotickone Judashos, kon purritori kerdyilas.
Pala kodo tele gelas lenca, haj tordyilas lenca pekh samtalo than. Lesa sas leske sityardenge jekh baro grupo haj zurales baro butipe anda intrego Judea, anda Tiruso haj Sidoneski maraki rig,
kon aviletar, te ashunen les haj te sastyon avri anda penge nasvalimata. Kas pale biuzhe duhura azbanas, sastyiline.
E intregone butimata karing leste kamelas te resel, ke zor hatyardyolas avri anda leste, haj sastyardas savorazhenen.
Atunchi peske jakha pe peske sityarde vazdas, haj kade das duma:
„Anande sanle, tume chorre, ke tumaroj le Devlesko them.
Anande sanle tume, kon akanak bokhajven, ke avridostaren tumen.
Anande sanle, kon akanak roven, ke assana.
Anande avna, kana rucina tumen le manusha, haj shudena tumare anava, sar nasulipes anda Manushesko Shavo.
Losshan pe kodo dyes haj vojin tumen, ke aketa, barij tumari rig ando rajo! Haj ke lenge dada zhikade kerdine vi le profetanca.
Ba jaj tumenge, barvale, ke tume aba line tumari potyinimata!
Jaj tumenge, kon akanak chajiline, ke bokhajvena!
Jaj tumenge, kon akanak assan, ke rovena haj pishtyana!
Jaj tumenge, kana sakon asharela tumen, ke tumare dada zhikade kerdine le xoxamne profetanca!
Ba tumenge, kon ashunen man, kodo phenav: Kamen tumare dushmanon! Keren lashipe kodalenge, kon rucin tumen.
Ashtyilisaren kodalen, kon armaja den tumen, haj rudyin anda kodola, kon marhin tumen.
Kodaleske, kon pa mosura shinel tut, inker kothe vi e kaver rig: haj kathar kodo kon lel tyo pluvialo, na sunusar chi tyo gad.
De sakoneske, kon mangel tutar: haj varikon te lela, so tyiroj, palpale na mang kodo.
Sar kamen, te keren tumenca le manusha, vi tume zhikade te keren lenge.
Kana kodalen kamen, kon tumen kamen, soski potyin phirel tumenge? Ke vi le bezexasle kamen kodalen, kon len kamen.
Haj kodalenca te keren lasho, kon tumenge lashipe keren, soski potyin phirel tumenge? Ke kado vi le bezexasle keren.
Haj kodalenge te den unzhiles, kastar sperantisaren, ke palpale len kodo, soski potyin phirel tumenge? Ke vi le bezexasle den unzhiles le bezexaslenge, ke zhikattyi te len palpale.
Kamen apol tumare dushmanon! Keren lashipe haj den unzhiles, khanchi palpales na zhukardines: kade bari avla tumari potyin, haj le Uchimatakireske shave avna, ke voj lashoj vi kaj le bi najisarde haj vi kaj le nasula.
Aven apolal lashe, sar vi tumaro Dad lasho si!
Na krisaren, haj atunchi chi tumen chi krisarenatar! Na krisarentar khanyikas, haj atunchi chi tumen chi krisarena! Jertin sakoneske, haj jertipe resena vi tume!
Den, haj dena vi tumenge: lasho haj pherdo, butimatasa dena ande tumare angalya! Ke sodenca vazarena, katyenca vazarena tumenge palpale!”
Vi metafora phendas lenge: „Dore o korro shaj sikavel o drom le kaver korreske? Chi peren apol soldujzhene ande xiv?
Naj majbaro o sityardo kathar pesko maistrovo: varikon atunchi si feder, kana kasavoj sar lesko maistrovo.
Sostar dikhes e phansliga ande tye phraleske jakha, kana o berando, savo ande tyire jakha si, chi les sama?
Haj sar shaj phenes tye phraleske: »Phrala, mukh te lav avri e phansliga anda tye jakha«, ande tyire jakha pale chi dikhes o berando? Paxandine! Shude avri majanglal o berando anda tyire jakha, haj atunchi dikhesa, avri te shaj zhanes te les anda tye phraleske jakh e phansliga!
Naj lasho kasht, savo nasul frukto upajil: haj naj nasul kasht, savo lasho frukto upajil.
Ke sakone kashtes pa leske fruktura pinzharas. Pa kanralebozuli chi kidas gulara, chi pa vepreso chi kidas drakha.
O lasho manush lasho anel angle anda peske ileske avuciji, haj o nasul manush anda nasul, nasul anel angle: ke anda ilesko butipe vorbil o muj.
Sostar phenen mange: »Raja! Raja!«, kana chi keren kodo so phenav?
Sikavav tumenge, pe kaste cirdel, kon mande avel, ashunel muri vorba haj vi kerel kodalen.
Po kherkerari manush cirdel, kon po mishto tele hunadas haj o fundo po barruno plaj shutas tele. Kana pala kodo avilas le pajesko baro shordyipe, le khereske das le abesko shordyipe, ba chi zhanglas mujal te delles, ke mishto sas kerdino.
Kon pale ashunel, ba chi trajil kodo, pe kodo manush cirdel, kon pesko kher bi fundosko, pe phuv kerdas. Kana o paji leske das, sigo mujaldaspe, haj baro kerdyilas kodale kheresko rumosardyipe.”
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly