Evangeliumo kathar o Lukach

chapter 16


Chapters:


Parabola pa godyaver lashari


verse #1

Le sityardenge pale kado phendas: „Jekhe barvale manushes sasles jekh lashari. Andre purissardine les, ke sa mareltar lesko barvalimo.


verse #2

Pe kado peste akharadas les, haj kado phendas leske: »So ashunav pa tute? De vorba pa tyo grizhimo, ke nashtig aves majdur muro lashari!«


verse #3

O lashari kado phendas ande peste: »So te kerav, ke muro raj lel mandar o lasharimo? Te kidyisarav chi zhanav, mang te kerav pale lazhav man.


verse #4

Zhanav aba so kerav, le manusha andre te muken man ande penge khera, kana aba chi avo lashari.


verse #5

Peste akhardas le rajeske sakone manushen, kon kamenas leske, haj pushlas kathar o angluno: »Sodenca kames mure rajeske?«


verse #6

Kodo kado phendas: »Shel khore ulojesa.« Pe kado kodo phendas leske: »Xutyil tyo kamimasko lil, besh tele sigo, haj iskirin panzhvardesh!«


verse #7

Pala kodo pushlas le kaveres: »Haj tu sodenca kames?« Kodo kado phendas: »Shel koshnyica dyivesa.« Pe kado kodo phendas leske: »Xutyil tyo kamimasko lil, haj iskirisar oxtovardesh.«


verse #8

O Raj ashardas le xoxamne lashares, ke godyaverikanes kerdas: ke la lumake shave pe pengi rig majgodyaveraj kathar le fimlalenge shave.


La barvalimatako lasho grizhimo


verse #9

Kodo phenav apol tumenge: Kiden tumenge xoxamne vortakon le mammonesa, ke kana nachardyol, andre te muken tumen ande sagutne khera.


verse #10

Kon ando cino chachoj, vi ando baro chachoj, haj kon ando cino nasul si, vi ando baro nasul si.


verse #11

Apol kana ando xoxamno mammono chi sanasle chache, kon mukela pe tumende le chaches?


verse #12

Haj kana ande kaverenge chi sanasle chache, atunchi kon dela kothe tumenge kodo, so tumaro si?


verse #13

Chi jekh sluga nashtig slugisarel duje rajeske: ke bake jekhes rucil haj le kaveres kamel, bake kaj o jekh cirdel pes haj le kaveres tele dikhel. Nashtig slugisaren le Devleske haj le mammoneske.”


Le farizanengo telelazhavaripe


verse #14

Ashundine sa kado le xanzhvale farizana, haj avriprassadine les.


verse #15

Atunchi kodo phendas lenge: „Tume chacheske sikaven tumen angla e manusha, ba o Del pinzharel tumaro ilo, ke so angla e manusha barimaskoj, kodo angla o Del rutoj.


Pa kris haj pa shindyipe


verse #16

Le krisa haj le profeti zhikaj o Janosh inkresardine: datunchara le Devleske themeski loshaniviaca viacaren, haj sakon zorasa sidyarel kothe.


verse #17

Majushores nacholtar o cheri haj e phuv, sar anda e kris vi »ekh ramope te xasardyol.


verse #18

Sa kodo, kon bishalel peska romnya haj kavera lel, ansurimata phagel: haj kon kathar pesko rom bishalda zhulya lel, vi kodo ansurimata phagel.


Parabola pa barvalo manush haj pa Lazar


verse #19

Sas jekhar »ekh barvalo manush. Ande lole, uzhes uravelaspes, haj sako dyes baro xamo keravelas.


verse #20

Sas vi »ekh Lazar anavesko mangakerari, kon kothe pashjolas angla lesko vudar, pherdo nasvalipesa.


verse #21

Fajlino les te chajol anda kodo, so pa barvaleski mesalya tele perelas, ba feri le zhukela avenas haj charenas lesko dukhardo trupo.


verse #22

Pecisardyilas apol, ke mulas o mangakerari, haj le andyela pe Abrahamesko kolyin ingerdine les. Mulas vi o barvalo, haj vi praxosardine les.


verse #23

Kana ande dyehenna mashkar dukha opredikhlas, dikhlas dural le Abrahamos, haj pe lesko kolyin le Lazares.


verse #24

Atunchi oprecipisardas leske: »Dade, Abraham! Gracijisar mange! Bishal le Lazares, ke te shol pesko naj ando paji, haj te shudrarlel muri shib, ke dukhardyuvav ande kadi jag!«


verse #25

O Abraham kado phendas leske: »Muro shavo! Serosar numa palpale, ke ande tyo trajo lan tyo potyinipe, o Lazar pale zhi kade o nasul: voj akanak kathe hodinisarel, tu pale kothe dukhares.


verse #26

Haj apolal mashkar amende haj mashkar tumende bari gropa si, ke kon kathar perdal te kamenas te zhan tumende, tena zhanen, haj chi kothar amende tena zhanel perdal te avel khonyik.«


verse #27

Pe kado kodo kade das duma: »Atunchi apol, pe kodo mangav tut dade, bishal les ande mure dadesko kher,


verse #28

ke panzh phral si man. Te kerel chacharipe angla lende, tena resen vi von kathe, pe kadale dukhange thana.«


verse #29

O Abraham kado phendas palpale: »Si len Mozesho haj profetura, te ashunen pe kodala!«


verse #30

Kodo pe kado kade mangelas les: »Na kade, dade, Abraham! Ba kana anda mule zhal mashkar lende varikon, bezexbunuipe inkrena.«


verse #31

Pe kado voj kodo phendas: »Apol kana po Mozesh haj pe profeti chi ashunen, inke vi mashkar le mule te trajolas opre varikon, chi kodaleske chi patyana!«”

Chapters:


Books