Evangeliumo kathar o Lukach

Chapters:

… 17 18 19 20 21 …   ⇤ ← 19 → ⇥

verse #1

Pala kado andre gelas ando Jeriko haj vi perdal gelas pa leste.

verse #2

Atunchi aketa, jekh Zakeush anavesko manush, kon le financengo shero sas haj barvalo,

verse #3

fajlino les te dikhel, ke kon si kodo Jezush, ba chi zhanglas kathar e butimata, ke cino manush sas.

verse #4

Angle nashlas apol, haj oprecirdas pes pekh turbatogular kashteste, te dikhel les, ke intye trubusardas te nakheltar.

verse #5

Kana o Jezush pe kodo than reslas, opredikhlas, dikhlas les, haj kado phendas leske: „Zakeush! Avtar tele sigo, ke adyes ande tyiro kher trubuj te hodinisarav.”

verse #6

Kodo sigosardes tele avilas pa kasht, haj losshasa las, ke o Jezush leste hodinila.

verse #7

Kon kado dikhline, savorazhene xolyasa pherdo phenenas: „Kaj bezexaslo manush hodinila!”

verse #8

Ba o Zakeush kothe tordyilas, haj kodo phendas le Rajeske: „Raja, aketa, mure barvalipesko dopash le chorrenge dav, haj varikas ande varisoste te xoxadom, shtarvar kattyi dav palpale leske.”

verse #9

O Jezush kodo phendas leske: „Adyes muntuimata hurajlas pe kado kher, ke vi voj le Abrahamesko shavo si.

verse #10

Ke le Manushesko Shavo anda kodo avilas, te rodel haj te muntusarel, so xasajlas.”

verse #11

Kodalenge, kon sa kadal ashundine, phendas vi jekh parabola, ke pashe sas aba kaj o Jeruzhalemo, haj kodo gindisardine, ke na pa buteste opredichola le Devlesko them.

verse #12

Kade das duma lende: „Jekh rajkano manush pe durutne phuva gelas, ke krajikano baripe te lel peske, haj pala kodo palpale t«avel.

verse #13

Akharadas peske deshe slugonen, perdal das lenge desh mini, haj kade das lende duma: »Barvajven, zhikaj palpale chi avo!

verse #14

Ba leske telalutne xolyajvenas pe leste, haj legatara bishaldine pala leste kadale phenimatasa: »Chi kamas kado te rajilpe pa mende!«

verse #15

Ba voj kana las peske o krajuno saktimos palpale gelas, haj angla peste akhardas peske slugan, kaske le love das, ke te zhanel avri, kon sode rodas opral pa lende.

verse #16

Avilas o angluno haj kado phendas: »Raja, tyi mina desh mini andas.«

verse #17

Pe kado kodo phendas leske: »Mishtoj, lashi sluga san, ke ande cerra chacho sanas, saktimo avla tut pe Desh forura.

verse #18

Avilas vi o dujto, haj kade das duma. »Raja, tyi mina panzh mina kerdas.«

verse #19

Vi kadaleske kodo phendas: »Rajintu pe panzh forura.«

verse #20

Pala kodo avilas o kaver, haj kade das duma: »Raja, kathej tyi mina! Garademla ande muro dikhlo,

verse #21

ke daros tutar, ke capeno manush san: haj les, so tele chi shutan, haj tele kosis, so chi beshadan.«

verse #22

Kodo phendas leske: »Anda tyiro muj krisarav tut, nasul slugone! Zhanglan, ke capeno manush som: lav kodo, so chi shutom tele, haj tele kosij, so chi beshadom.

verse #23

Sostar chi shutan apol mure love pe love paruvjimatangi mesalya, ke kana palpale avav, butardyimatasa te lav kodal palpale?«

verse #24

Pala kodo kade das duma, kaj kodal kon kothe tordyonas: »Len lestar e mina, haj denla kodaleske, kas desh mina si les.«

verse #25

Kodal kade dine duma: »Raja, kodales aba desh mini si les.«

verse #26

Phenav tumenge: »Sa kodoleske, kas si les, inke dena, kathar kodo pale kas naj, inke vi kodo lena, so si les.

verse #27

Mure dushmanon pale, kon chi kamenas te rajivma pe lende, anenle kathe, haj mudaren len angla mande!«”

verse #28

Pala soste kadal phendas, zhalas majdur karing o Jeruzhalemo.

verse #29

Kana kaj e Betfage haj kaj e Betania pasharelas, kaj kodo plaj, saves uloj kashtenge plajeske anavarenas, bishaldas peske duje sityarden

verse #30

kadale vorbenca: „Zhantar ande kodo gav savo mostar kathe tordyol. Kana andre zhan, arakhena kothe phangles jekha magara khurora, pe savi inke chi beshlas manush skepin la avri haj anen la kathe.

verse #31

Kana pale varikon pushela tumendar: »Sostar phanden la avri?« - phenen leske: »Ke le Rajes trubuj.«”

verse #32

Le legatara gelinetar, haj sakofalo kade arakhline, sar so phendas lenge.

verse #33

Kana avriputerdine le magara khurora, lake inkritora pushline lendar: „Sostar phanden avri la magara khurora?”

verse #34

Von kodo phendine: „Ke le Rajes trubuj:”

verse #35

Haj ingerdinela kaj o Jezush. Pe khurori sharade penge gada, pala kodo pe late beshadine le Jezushes.

verse #36

Kana pale las te zhaltar, po drom sharadine penge gada.

verse #37

Kana aba pashe sas kaj le uloj kashtengo plaj, le sityarde savorazhene line vojikanes te luvudyisaren le Devles anda but chudimata, save dikhline.

verse #38

Kado phendine:
„Ashtyilimej o kraj, kon ande Devlesko anav avel!
Pachipe ando rajo haj luvudyipe ando uchipe!”

verse #39

Anda butimata unyi farizana kado phenenas lenge: „Maistro, de duma pe tye sityarde!”

verse #40

Ba voj kado phendas lenge: „Phenav tumenge: kadal te ashonatar, le barr cipina atunchi!”

verse #41

Kana pashe reslas haj dikhlas le foros, rovjardas les, haj kade das duma:

verse #42

„O feri vi tu opre te pinzharesas pe kado dyes, so pe tyo pachipe slugil! Ba akanak garadoj angla tye jakha.

verse #43

Ke avna dyesa kana tye dushmana krujal lena tut shanconca, haj kikidena tut pa sako riga.

verse #44

Pe phuv marena tut haj tye shavoren, kon ande tute beshen: chi mukena ande tute barr pe barreste, ke chi pinzhardan opre tyi dikhlimaski vrama.”

verse #45

Pala kodo andre gelas ande khangeri, haj las avri te nashavel le biknaren.

verse #46

Kado phendas lenge: „Iskirime si: Muro kher la rudyimatako kher si, tume pale le chorenge cavernake kerdinela.

verse #47

Sako dyes sityarelas ande khangeri. Le angrashaja, le iskiritora, haj le manushenge anglalara pe lesko trajo dine,

verse #48

ba chi zhangline khanchi te keren, ke sa e butimata anda ilo ashunelas les.

Chapters:

1 2 3 4 5 6 7 8 9 10 11 12 13 14 15 16 17 18 19 20 21 22 23 24