chapter 8
Pecisajlas pala kodo, ke andre phirdas le forura haj le gava, predikalisarelas haj viacarelas le Devleske themesko evangeliumo. Lesa sas le deshuduj,
haj unyi romnya, saven sastyardas kathar le nasul duhura haj kathar e nasvalimata: E Marija, kas Magdolnake phenenas, anda kaste efta beng gelas avri,
haj e Johanna, kon le Kuzaski, le Herodesheske prefektoski romnyi sas, haj inke e Zhuzhanna, haj inke but kavera, kon zhutinas les anda penge barvalimata.
Kana but manusha aviline kethane, haj vi anda le forura avenas leste, kadi parabola phendas lenge:
„Avrigelas o beshavari sumboro te beshavel. Sar beshavelas o jekh sumburo pe dromeski dolma pelas. Pe kado vi opre ushtyadine, haj le chereske chiriklya oprekidiniles.
O kaver po barr pelas. Kado avribarilas, ba pala kodo avrishutyilas, ke chi reslasles paji.
O kaver mashkar le kanre pelas. Vi le kanre oprebariline lesa, haj tasadeles.
Ba kavera ande lashi phuv peline. Avribariline haj shelto upajipe kerdine.” Kana kado phendas oprecipisardas: „Kas siles kan po ashunipe, te ashunel les!”
Leske sityarde pushline les, ke so phenel uzhes kadal paraboli.
Voj kado phendas lenge: „Tumenge davadyilas te pinzharen le Devkleske themeske tajni, kaverenge numa ande paraboli, ke dikhles tena dikhen, haj ashundines tena hatyaren.
Kadij apolal e parabola: o sumburo le Devleske alava si.
Pe e dolma pelinde sumbura kodolaj, kon ashunel len, ba pala kodo avel o beng, haj avri lel o alav anda lengo ilo, tena patyan haj te luvudyisardyon.
Pe barr peline sumbura kodolaj, kon, save kana ashunen, loshshanes len le alava, ba naj len rikita: jekh vrama patyan, ba kana avel e zumavjimatako chaso nachontar te patyan.
Mashkar kanre peline sumbura kodolaj, kon ashunenle, ba le trajeske pharimata, haj kodalesko barvalipe haj shukarimata majpalal tasaven ande lende o alav, haj frukto chi upajina.
Save pale ande lashi phuv peline, kodalen phenel, kon uzhe haj lashe ilesa ashunen o alav, inkren les, haj frukto upajin blindosardes.
Khonyik kon melcho phabarel, chi sharavel kodo andre pirasa, haj chi tala pato chi garavelles, ba po inkerdo sholles, ke kon andre zhan, te dikhen o fimlaipe.
Ke khanchi naj garado, haj naj tajnime so avri na zhanardyolas.
Dikhen apolal, ke sar shon kan! Ke kas si, kodalen inke den: kas pale naj, kathar kodo vi kodo len, pa soste kodo gindisarel, ke leskoj.”
Kothe aviline leste leski dej haj leske phral, ba nashtig resline kothe leste kathar e butimata.
Duma dine leske: „Tyi dej haj tye phral avral tordyon, kamen te dikhen tut.”
Ba voj kado phendas lenge palpale: „Kodal si muri dej haj mure phral, kon le Devleske alava ashunen haj vi trajin kodo.”
Pecisardyilas apol jekh dyes, ke andre hulyilas andekh bero peske sityardenca kethane, haj kodo phendas lenge: „Zhas perdal pe pajeski kaver rig!” Gelinetar.
Zhisar berarnas, voj sutastar. Ba mashkaral bari balval kerdyilas po paji, ba kasavi bari, ke na but trubujlino andre te tasadyon.
Atunchi kothe geline leste haj opreushtyadine les: „Maistro, Maistro! Xasajvas!” Voj pale opreushtyilas, vladisardas la balvajake haj le pajeske plemenenge, pe soste kodal nachiletar haj pachardyiline.
Pala kodo kade das duma lende: „Kaj si tumaro patyape?” Kodal pale darasa pherdyardes chudinaspe, haj kodo phenenas jekhavreske: „Kon si kado, ke inke vi le balvajake haj vi la marake vladisarel, haj kodal mukenpe leske?”
Pala kodo avriphangline pe gerazake phuva, save le Galileake mosa pashjon.
Sar avriushtyilas pe dolma, jekh mursh avilas angla leste anda foro, ande kaste beng sas, haj aba dulmut chi las pe peste gada, chi ando kher chi beshelas, ba ande murmuntura.
Kana dikhlas le Jezushes, tele burdusardyilas angla leste, haj glasunes oprecipisardas: „So grizha si man tute, Jezush, le uchimaskire Devlesko Shavo? Mangav tut, na dukhar man!”
Ke vladisardas le biuzhe duhoske, te zhal avri anda o manush. Ke aba dulmut ande leste sas, ke veringenca sas phanglo haj ande sastrune lupunzi lenas pe leste sama, ba sa shingerdas e phanglimata haj o beng ande pusta nashadas les.
O Jezush atunchi pushlas les: „Soj tyo anav?” Kodo phendas: „Legio”, ke but beng sas ande leste.
Pe kodo mangle les, na kodo te vladisarel, ke ando milnope te zhantar.
Sas kothe na dur jekh balengo grupo, po plaj xanas. Mangenas les, te mukel, te shaj zhan ande kodola. Muklas lenge.
Pe kado le beng avrigeline haj huralyine le balen, pe soste le balengo grupo tele nashlas pa plaj ando paji, haj andre tasiline.
Le manusha kon pe bale line sama, dikhlines ke so pecisajlas, nashlinetar haj viacardine kadi traba ande o foro haj gava.
Le manusha avrigeline, te dikhen, ke so pelaspe. Kana kaj o Jezush resline, kothe rakhline kodale manushes, kas le beng mukline, opreuradines haj uzha godyasa, sar kothe beshel kaj le Jezusheske punre, haj bari dar xutyildas len.
Kodal pale, kon dikhline, ke sar slobodisardyilas kodo, kas o beng beshelas.
Atunchi le gerazange intrega manusha pe kodo manglas les, te zhaltar lendar: ke zurales daranas. Voj pale ando bero beshlas haj palpale gelas.
Kodo mursh pale anda kaste avrigeline le beng, mangelas les, lesa te shaj ashol. Ba o Jezush bishaldas les kadale vorbenca:
„Zha feri khere ande tyo kher, haj phen sakoneske, soski bari butyi kerdas tusa o Del.” Kodo vi andre phirdas le intregone foros, haj viacarisarelas, ke soski bari butyi kerdas lesa o Jezush.
Kana o Jezush palpale gelas, but manusha zhukarelas les.
Haj aketa, avilas jekh Jarius anavesko manush, kon la zhinagogako anglalutnari sas, haj kaj le Jezusheske punre changa dines mangelas les, te avel ande lesko kher,
ke leski jekhtuni shej, kon deshuduje bershengi sas, po meripe si. Sar zhalas, le butimata, zurales kikidenas les.
Mashkaral jekh romnyi, kon aba deshuduje bersh ke ratvajvelas, haj so sasla sa pe sastyarde potyindas aba, ba chi jekh chi zhanglas te sastyarel la.
Kothe gelas leste palunes, haj kaj leske gadengo agor reslas. Ande kodo minuto tordyilas lake ratesko shordyipe.
O Jezush kade das duma: „Kon reslas mande?” Kana savora zhene asvikarenas, o Peter kado phendas: „Maistro! O butipe kikidel tut haj pizden tut.”
O Jezush kado phendas: „Varikon, mande reslas, ke hatyardom, ke zor gelas avri anda mande.”
Atunchi e romnyi dikhlas, ke nashtig ashol ande tajna. Izrandes avilas angle, angla leske punre shudaspe, haj andre pizhardas angla intrega manusha, ke anda soste reslas leste, haj ke sar sastyilas ande kodo minuto.
Voj pe kado kodo phendas lake: „Muri shej! Tyo patyape sastyardas tut! Zha pachasa!”
Inke vorbilas kana kothe avilas varikon anda zhinagogake anglalutnaresko kher, haj kodo phendas: „Tyi shej mulas, na khinyar majdur le Maistrovos!”
Ba o Jezush, kana kado ashundas, kade das duma: „Na dara, feri patya, haj muntusardyol!”
Kana pale ande o kher reslas, konyik kavereske chi muklas, te zhal andre lesa, numa le Petereske, le Jakaboske, le Janosheske haj la shejake dadeske thaj dejake.
Savorazhene rovenas haj cipinas anda shej. Voj kade das duma lende: „Na roven! Chi mulas e shej, numa sovel.”
Kodal avri assadine les, ke zhanenas, ke mulas.
Ba voj xutyildas la shako vast, haj vazdine glasesa oprecipisardas: „Cini shej, ushtyi opre.”
Pe kado palpale avilas la shejako duho, haj sigo opreushtyilas. Atunchi phendas te denla te xal.
Laki dej haj dad zurales bari dikhline: voj pale vladisardas lenge, ke khanyikaske tena phen avri, ke so pecisardyilas.
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly