Evangeliumo kathar o Lukach
capítulo 6
Spiko kidipe savatone
verso 1
Pecisardyilas apol, ke savatone, kana pe phuva phirelas, leske sityarde tele shingrenas le spikura, haj penge vastenca avri mordines xanas len.
verso 2
Mashkar le farizana unyizhene kodo phenenas: „Sostar keren kodo, so savatone naj slobodo?”
verso 3
O Jezush kado phendas lenge: „Chi ginade, ke so kerdas o David, kana bokhajlas, haj kon lesa sas?
verso 4
Ke sar gelas andre ande Devlesko kher, sar las le avri shutine manre, xalas, haj das vi le majbuten kon lesa sas, saven naj slobodo te xan, feri korkoro le rashajenge?”
verso 5
Pala kodo inke kado phendas pashe: „Le Manushesko Shavo rajil vi le savatones.”
Le paralizanesko sastyaripe savatone
verso 6
Pecisardyilas pala kodo pekh kaver savatuno dyes, ke andre gelas ande zhinagoga haj sityarelas. Sas kothe jekh manush, kaske lesko chacho vast shutyilastar.
verso 7
Le iskiritora haj le farizana pale dikhenas, ke sastyarel dore vi savatone, te rakhen variso, sosa shaj dosharen les.
verso 8
Ba voj pin-zharelas lenge gindimata, haj kade das duma kaj kodo manush saveske tele sas shutyilime lasko vast: „Ushtyi opre haj tordyu mashkaral!”
verso 9
Pala kodo o Jezush kodo phendas lenge: „Pushav tumen, slobodo si apol savatone lashipe bake nasulipe te keras, trajo te muntusaras bake mukas te xasajvel?”
verso 10
Pala kodo krujal dikhlas pe savorazhenende, haj kade das duma kaj o manush: „Lunzhar avri tyo vast!” Kodo vi kade kerdas, haj sastyilas lesko vast.
verso 11
Kodal pe kado zurales oprexolyajline haj pa kodo linepe te vorbin mashkar pende, so te keren le Jezushesa.
Le deshudujengo avrialosaripe
verso 12
Pecisardyilas apol ande kodal dyesa, ke avri gelas po plaj te rudyil, haj e intrego ratyi ande le Devleso kamimatipe ratyardas.
verso 13
Kana zorisardyilas, peste akhardas peske sityarden, haj avrialosardas mashkar lende deshudujen. Kadalen aposhtolenge anavardas:
verso 14
Le Shimones, kas vi Petereske anavarenas, haj le Andrashes, leske phrales, haj inke le Jakabos haj le Janoshes, le Filipos haj le Bertalanes,
verso 15
le Matevos haj le Tamashos, le Jakabos, le Alfeuseske shaves, haj le Shimones, kas Zeloteske anavarenas,
verso 16
le Judashes, le Jakabeske shaves, haj le ishkariotickone Judashos, kon purritori kerdyilas.
O Jezush haj e butimata
verso 17
Pala kodo tele gelas lenca, haj tordyilas lenca pekh samtalo than. Lesa sas leske sityardenge jekh baro grupo haj zurales baro butipe anda intrego Judea, anda Tiruso haj Sidoneski maraki rig,
verso 18
kon aviletar, te ashunen les haj te sastyon avri anda penge nasvalimata. Kas pale biuzhe duhura azbanas, sastyiline.
verso 19
E intregone butimata karing leste kamelas te resel, ke zor hatyardyolas avri anda leste, haj sastyardas savorazhenen.
Anandimata haj dukha
verso 20
Atunchi peske jakha pe peske sityarde vazdas, haj kade das duma:
„Anande sanle, tume chorre, ke tumaroj le Devlesko them.
verso 21
Anande sanle tume, kon akanak bokhajven, ke avridostaren tumen.
Anande sanle, kon akanak roven, ke assana.
verso 22
Anande avna, kana rucina tumen le manusha, haj shudena tumare anava, sar nasulipes anda Manushesko Shavo.
verso 23
Losshan pe kodo dyes haj vojin tumen, ke aketa, barij tumari rig ando rajo! Haj ke lenge dada zhikade kerdine vi le profetanca.
verso 24
Ba jaj tumenge, barvale, ke tume aba line tumari potyinimata!
verso 25
Jaj tumenge, kon akanak chajiline, ke bokhajvena!
Jaj tumenge, kon akanak assan, ke rovena haj pishtyana!
verso 26
Jaj tumenge, kana sakon asharela tumen, ke tumare dada zhikade kerdine le xoxamne profetanca!
Le dushmanonge kamimata
verso 27
Ba tumenge, kon ashunen man, kodo phenav: Kamen tumare dushmanon! Keren lashipe kodalenge, kon rucin tumen.
verso 28
Ashtyilisaren kodalen, kon armaja den tumen, haj rudyin anda kodola, kon marhin tumen.
verso 29
Kodaleske, kon pa mosura shinel tut, inker kothe vi e kaver rig: haj kathar kodo kon lel tyo pluvialo, na sunusar chi tyo gad.
verso 30
De sakoneske, kon mangel tutar: haj varikon te lela, so tyiroj, palpale na mang kodo.
verso 31
Sar kamen, te keren tumenca le manusha, vi tume zhikade te keren lenge.
verso 32
Kana kodalen kamen, kon tumen kamen, soski potyin phirel tumenge? Ke vi le bezexasle kamen kodalen, kon len kamen.
verso 33
Haj kodalenca te keren lasho, kon tumenge lashipe keren, soski potyin phirel tumenge? Ke kado vi le bezexasle keren.
verso 34
Haj kodalenge te den unzhiles, kastar sperantisaren, ke palpale len kodo, soski potyin phirel tumenge? Ke vi le bezexasle den unzhiles le bezexaslenge, ke zhikattyi te len palpale.
verso 35
Kamen apol tumare dushmanon! Keren lashipe haj den unzhiles, khanchi palpales na zhukardines: kade bari avla tumari potyin, haj le Uchimatakireske shave avna, ke voj lashoj vi kaj le bi najisarde haj vi kaj le nasula.
verso 36
Aven apolal lashe, sar vi tumaro Dad lasho si!
O krisaripe
verso 37
Na krisaren, haj atunchi chi tumen chi krisarenatar! Na krisarentar khanyikas, haj atunchi chi tumen chi krisarena! Jertin sakoneske, haj jertipe resena vi tume!
verso 38
Den, haj dena vi tumenge: lasho haj pherdo, butimatasa dena ande tumare angalya! Ke sodenca vazarena, katyenca vazarena tumenge palpale!”
verso 39
Vi metafora phendas lenge: „Dore o korro shaj sikavel o drom le kaver korreske? Chi peren apol soldujzhene ande xiv?
verso 40
Naj majbaro o sityardo kathar pesko maistrovo: varikon atunchi si feder, kana kasavoj sar lesko maistrovo.
verso 41
Sostar dikhes e phansliga ande tye phraleske jakha, kana o berando, savo ande tyire jakha si, chi les sama?
verso 42
Haj sar shaj phenes tye phraleske: »Phrala, mukh te lav avri e phansliga anda tye jakha«, ande tyire jakha pale chi dikhes o berando? Paxandine! Shude avri majanglal o berando anda tyire jakha, haj atunchi dikhesa, avri te shaj zhanes te les anda tye phraleske jakh e phansliga!
O chacho patyape
verso 43
Naj lasho kasht, savo nasul frukto upajil: haj naj nasul kasht, savo lasho frukto upajil.
verso 44
Ke sakone kashtes pa leske fruktura pinzharas. Pa kanralebozuli chi kidas gulara, chi pa vepreso chi kidas drakha.
verso 45
O lasho manush lasho anel angle anda peske ileske avuciji, haj o nasul manush anda nasul, nasul anel angle: ke anda ilesko butipe vorbil o muj.
verso 46
Sostar phenen mange: »Raja! Raja!«, kana chi keren kodo so phenav?
Po barr kerdino kher
verso 47
Sikavav tumenge, pe kaste cirdel, kon mande avel, ashunel muri vorba haj vi kerel kodalen.
verso 48
Po kherkerari manush cirdel, kon po mishto tele hunadas haj o fundo po barruno plaj shutas tele. Kana pala kodo avilas le pajesko baro shordyipe, le khereske das le abesko shordyipe, ba chi zhanglas mujal te delles, ke mishto sas kerdino.
verso 49
Kon pale ashunel, ba chi trajil kodo, pe kodo manush cirdel, kon pesko kher bi fundosko, pe phuv kerdas. Kana o paji leske das, sigo mujaldaspe, haj baro kerdyilas kodale kheresko rumosardyipe.”
Libros
