Evangeliumo kathar o Lukach

Capítulos:

… 12 13 14 15 16 …   ⇤ ← 14 → ⇥

verso 1

Pelaspe apol, ke o Jezush savatone ande jekhe anglalutne farizanesko kher gelas te xal, haj kodal dikhenas les.

verso 2

Kothe jekh pajinasvalo manush das angla leste.

verso 3

Atunchi o Jezush pushlas kathar le kris zhanara haj kathar le farizana: „Slobodo si dore savatone te sastyaren bake naj?”

verso 4

Kodal chi dine duma. Pe kado kaj o nasvalo reslas, sastyardas les, haj bishaldas les.

verso 5

Pala kodo kade das duma lende: „Mashkar tumende varisavesko shavo bake lesko guruv ande xajing te perel, chi cirdel les avri sigo, inke vi savatone?”

verso 6

Pe kado chi zhangline so te phenen.

verso 7

Le akhardenge pale parabolicka vorbilas, ke dikhlas, ke sar alosaren le anglune thana. Kado phendas lenge:

verso 8

„Kana ando abav akharen tut, na besh po angluno than. Tena perelpe, ke tutar vi majrajkane manushes te akhardinesas,

verso 9

kothe te avel kodo kon les haj vi tut akhardas, haj kodo te phenel tuke: »De perdal tyo than! Haj atunchi ande bari lazhavjimata mashkaral shaj beshes po majpaluno than.

verso 10

Kana apol akharen tut, zha besh tele po majpaluno than. Atunchi kothe avela kodo, kon akhardas tut, haj kodo phenel tuke: »Muro vortakona! Zha majopre!« Kade majbari patyiv avla tut angla sakoneste.

verso 11

Ke kon pes opreasharel, kodales tele lazhavaren, haj kon pes tele lazhavarel, kodales opreasharen.”

verso 12

Kodaleske pale kon les akhardas, kado phendas: „Kana mizmeresko bake ratyako xamo des, na tye vortakon haj tye phralen akhar, haj na tye nyamon bake tye barvale vechinan, kon vi tut palpale akharen haj palpale den tuke.

verso 13

Kana patyiv keres ande tyo kher, akhar le chorren, le paralizanen, le bangen, le korren.

verso 14

Kade anando avesa, ke kodal chi zhanen tuke palpale te denles. Ba kana le chache opretrajisajvena, lesa tyo potyinipe.

verso 15

Jekh akhardo kana kado ashundas kade das leste duma: „Anandoj, kon kaj e mesalya shaj beshel ande Devlesko them!”

verso 16

Voj pale kado phendas palpale: „Jekh manush baro xamo kerdas haj but manushen akhardas.

verso 17

Ande ratyake xamosko chaso bishaldas peske slugas, te del duma le akhardenge: »Aven aba, ke aba sakofalo gata si!«

verso 18

Ba mashkar kodal jekh pala kaver lelas haj avri muntulas pes. O angluno kado phendas leske: »Phuv kindom, trubuj te zhavtar te dikhavles: mangav tut, muntusar man avri!«

verso 19

O kaver pale kodo phendas: »Deshe guruven kindom, zhav avrizumavav len: mangav tut, muntusar man avri!«

verso 20

Jekh kaver kodo phendas: »Akhanak lom romnya, nashtig zhav!«

verso 21

Kana e sluga palpale reslas, sakofalo phendas peske rajeske. Pe kado o raj xolyajlas, haj kado phendas peske slugaske: »Zha avri sigo pe foroske sako placo haj ande sako vujica, haj an kathe andre le chorren, le balvaldiren, le korren haj le bangen!«

verso 22

E sluga phendas leske: »Raja! Kerdyilas so vladisardan, ba inke si than.«

verso 23

Atunchi o Raj kado phendas peske slugaske: »Zha avri pel droma haj kaj le gradyija! Zurar, te aven andre le manusha, te pherdyol muro kher.«

verso 24

Phenav apol tumenge, ke mashkar kodal, kon akharde sas, chi jekh chi xala anda xamo.”

verso 25

But manusha zhanas lesa, voj pale lende boldaspe, haj kado phendas:

verso 26

„Kana varikon mande avel haj chi rucil peske dades haj deja, peska romnya haj shavora, phral haj phenya, haj inke vi pe pesko trajo, atunchi nashtig avel muro sityardo.

verso 27

Haj kon chi phiravel pesko trushul haj ch«avel pala mande, nashtig avel muro sityardo.

verso 28

Ke kon si mashkar tumende, kon kalsamo kamel te kerel, haj chi beshel tele majanglal, avri te ginavel le avri dinimata, ke avla dore andasoste andre te agurutnisarel peski butyi?

verso 29

Tena perelpe, ke kana tele shutas o fundo, tena zhanel andre te agurutnisarel les, haj sakon kon dikhel les, te prassal les:

verso 30

«Kado manush las te kerel les, ba chi zhanglas andre te agurutnisarel les.«

verso 31

Bake savo kraj si kodo, ke kana ando maripe zhal pekh kaver kraj, chi beshel tele majanglal, te gindilpe, ke avla les zor dore, deshmija ketanenca te marel kodales, kon bishmiji ketanenca avel pe leste?

verso 32

Ke tena najles, atunchi legatara bishalel leste, pacha te mangel, kana inke dur si.

verso 33

Kade apol kon mashkar tumende chi phenel tele pa sakofaloste, so siles, nashtig avel muro sityardo.

verso 34

Lashoj o lon: ba kana o lon xasarela pesko svado, sosa londyarenales?

verso 35

Chi pe phuv, chi pe avri shudinimaski gropa naj lasho, avri te shuden les. Kas si kan po ashunipe, t«ashunel les!”

Capítulos:

1 2 3 4 5 6 7 8 9 10 11 12 13 14 15 16 17 18 19 20 21 22 23 24