Evangeliumo kathar o Lukach
capítulo 2
Le Jezushesko arakhadyipe
verso 1
Pecisajlaspe apol ande kodal dyesa: Vladipe gelas avri kathar o Augustus chasaro, te iskirin kethane sa le manushen pe intrego luma.
verso 2
Kado angluno kethane iskiripe atunchi pecisardyilas, kana la Siria o Kvirinus krajilas.
verso 3
Vi gelastar sakon, kethane te iskirisaren len, sakon ande pesko foro.
verso 4
Opregelas kade vi o Jozhef anda Galilea, anda Nazaretesko foro ande Judea, ande Davidesko foro, saves Betlehemeske anavarenas, ke anda Davidesko kher haj falo sas,
verso 5
kethane te iskirin les la Marijasa, peska piramnyasa kethanes, savi phari sas.
verso 6
Kana kothe sas, avilas e vrama, pe luma te anel le shavores,
verso 7
haj vi pe luma andas peske anglunes-arakhadyiline shaves. Ando sherand sharadas les haj ande jasla pashjardas les, ke chi line than andej khera.
verso 8
Pe kodal phuva malyara ratyarenas, haj sama lenas pe penge bakre ande ratyi.
verso 9
Jekhar feri kothe das pashalende le Rajesko andyelo, haj le Rajesko fimlalipe krujal ablyolisardas len. Zurales darajline.
verso 10
O andyelo kado phendas lenge: „Na daran! Aketa, bari lossh phenav tumenge, anda soste rig avla sakone popolaron.
verso 11
Adyes arakhadyilas tumenge o Muntosari, o Raj Kristo, ande Davidesko foro.
verso 12
Kado avla o somno tumenge: Rakhena jekhe cine shavores ando sherand sharado haj ande jasla pashjardo.”
verso 13
Atunchi rajongire ketanengo butipe line krujal le andyelos, haj asharnas le Devles:
verso 14
„Luvudyipe ando uchipe le Devleske,
haj pe phuv pachipe le lashekamle manushenge!”
verso 15
Haj pelaspe, ke kana le andyelura palpale geline ando rajo, le malyara kade dine duma mashkar pende: „Zhas perdal ando Betlehemo, haj dikhas kodi traba, so pecisardyilas, haj saves o Raj viacarisardas amenge.”
verso 16
Geletar apol sidyardines, vi arakhline la Marija haj le Jozhefes, haj ande jasla pashjindone cine shavores.
verso 17
Kana dikhline len, phendine kodo sakoneske, so pa shavoro ashundine.
verso 18
Haj sakon, kon ashundine len, chudinaspe pe kodo, pa soste le malyara vorbinas lenge.
verso 19
E Marija pale chi bisterdas kadal trabi, haj unyivar gindilaspe pe lende ande pesko ilo.
verso 20
Le malyara pale palpale geline, haj asharnas le Devles sa anda kodal trabi, so ashunde haj dikhline kade, sar vi phendine lenge.
Le Shimeonesko haj la Annako chacharipe pa Jezush
verso 21
Kana avilastar o oxtoto dyes, krujal te shinen le shavores, o Jezush anav dine leske, kade, sar o andyelo anavardas les, zhiangla soste leski dej phari pelas.
verso 22
Kana pale nachilastar lenge uzhilimaske dyesa, opreingerdine les ando Jeruzhalemo sar le Mozesheski kris avri phenel kodo, andre te sikaven les le Rajeske,
verso 23
sar ande le Rajeske krisa iskirime si: „Sako anglunes arakhadyilino shavo le Rajeske te avel suntosardo”,
verso 24
haj ke sarkafimo te sikaven andre, sar le Rajeski kris phenel: „Duje chiriklyoran bake duje gulunboren”.
verso 25
Trajilas apol ando Jeruzhalemo jekh manush, Shimeon sas lesko anav, chacho haj Del patyamno manush sas, kon zhukarelas le Izraelesko zhutisajvipes, haj o Sunto Duho sas pe leste.
verso 26
O Sunto Duho avri phendas leske, ke meripe chi dikhela, zhikaj chi dikhela le Rajeske Opremakhlones.
verso 27
Atunchi pe Duhosko phenipe ande khangeri gelas. Kana e dej haj o dad andre ingerdine le cine Jezushes ande khangeri, kade te keren sar e kris avri phenel kodo,
verso 28
ande peski angalyi las les, haj le Devles ashardes kade das duma:
verso 29
„Akanak bishales, Raja tye slugones
kathar tye alava ande pacha,
verso 30
ke dikhline mure jakha tyo muntusardyipe,
verso 31
saves angla sakone populara kerdan,
verso 32
t«avel fimlalipe le manushenge
haj vi fimlal kodolen
haj luvudyij tye popularon, thaj le Izraeles”.
verso 33
Lesko dad haj dej bare dikhline pe kodo, so pa leste phendine.
verso 34
Ashtyilisardas len o Shimeon, leska dake, la Marijake pale kado phendas: „Aketa, pe butengo rumuvjipe haj opretrajisaripe avla voj ando Izrael: somno avla, saveske na phenena
verso 35
– haj tyiro duho xanro phirela perdal –, ke avri te zhanardyol bute ilenge gindimata.”
verso 36
Sas jekh Anna anavardi romnyi, kon profeta sas, la Fanuelaki shej, anda Aserengo falo. Zurales phuri sas aba, pala pesko shejipe, peske romesa efta bersh trajisardas:
verso 37
oxtovardesh thaj shtari bershengi phivlyi sas, haj chi shindyilastar kathar e khangeri, postyipesa haj rudyipesa slugisarlas kothe dyese haj ratyi.
verso 38
Vi voj kothe avilas zhi ande kodo chaso, asharlas le Devles, haj vorbilas pa leste sa kodalenge, kon zhukarenas le Jeruzhalemesko muntusaripe.
verso 39
Kana sakofalo kerdine save le Rajeske krisa phenen, palpale geline ande Galilea, ande pengo foro, ando Nazaret.
verso 40
O shavoro pale barolas haj zurardyolas, pherdyilas platnikipesa, haj le Devleski gracija sas pe leste.
O deshuduje bershengo Jezush ande khangeri
verso 41
Leski dej haj dad sako bersh zhanastar ando Jeruzhalemo pe patradyake bare dyesa.
verso 42
Kana apolal deshuduje bershengo kerdyilas, opregele savorazhene ando Jeruzhalemo, sar kadi e kris avri phenel pe baredyesa.
verso 43
Kana nachiletar le bare dyesa haj aba zhanas khere, o shavoro Jezush ando Jeruzhalemo ashilas, haj von chi line kado sama.
verso 44
Ke kodo gindinas, ke mashkar le dromara manusha si. Aba jekh dyes zhanas, haj atunchi line te roden les mashkar le pinzharde haj nyamura.
verso 45
Ke chi arakhline les, palpale geline ando Jeruzhalem, te roden les.
verso 46
Haj kade pecisardyilas, ke pa trin dyes vi arakhline les ande khangeri, sar mashkar le sityara beshelas, ashunelas haj pushelas len.
verso 47
Savorazhene, kon ashundine les, bari dikhenas pe lesko godyaveripe haj pe leske phenimata.
verso 48
Kana dikhline les, bari dikhline, haj leski dej kado phendas leske: „Muroshavo! Sostar kerdan kado amanca? Aketa, tyo dad haj me brigasles rodasas tut.”
verso 49
Voj pale kado phendas lenge: „Sostar rodenas man? Chi zhanenas, ke mange ande mure Dadeske trabi trubuj te avav?”
verso 50
Ba von chi hatyardine, so lenge phendas.
verso 51
Atunchi kheregelas lenca. Gelastar ando Nazaret, haj mukhlaspe lenge. Leski dej garadas sa kadal ande pesko ilo.
verso 52
O Jezush pale barolas ando platnikipe, ande vrama haj skunpoipe angla o Del haj angla e manusha.
Libros
