bommey

Chapters:

… 76 77 78 79 80 …   ⇤ ← 78 → ⇥

verse #1

maSqIlvam qon ‘aSav.
chut’a’wIj yI’Ij, ‘o ghotpu’wI’; nujwIj mu’meyvaD teSraj tItlhe’moH.

verse #2

SorHa’meH lut vIjatlh; nujwIj vIpoSmoH. tIQbogh vIttlheghmey Hurgh vIjatlh.

verse #3

DIQoypu’ ‘ej DISovpu’; maHvaD jatlhpu’ no’ma’.

verse #4

puqpu’chajvo’ DISo’be’ ‘ach puq poH veb wIja’. joH’a’ ta’mey Dun, HoSDaj, boqHarmeyDaj je DIrIch.

verse #5

ya’qovDaq nguHta’ ghaH; yISra’elDaq chut cherta’. puqpu’chaj ghojmoH vavpu’ma’ ‘e’ ra’ta’.

verse #6

vaj Sov puq poH veb, wej boghpu’ puqpu’, ‘ej Hu’ ‘ej puqpu’chaj ja’.

verse #7

vaj Qun’a’ luloS ‘ej Qun’a’ ta’mey lIjbe’ ‘ej rIchwInmeyDaj pab.

verse #8

vaj no’chaj rurbe’, lotlhbogh puq poH mul chaHmo’. ngaDbe’ tIqchaj ‘ej Qun’a’vaD matlhbe’ qa’chaj.

verse #9

naQjejHom nuH qeng ‘evra’yIm puqpu’ ‘ach che’ron DoH qaSDI’ may’ jaj.

verse #10

Qun’a’ mab lupabbe’ ‘ej chutDaj lulobQo’.

verse #11

ta’meyDaj lIj ‘ej boqHarmeyDaj ‘angta’bogh lIj.

verse #12

boqHarmey ta’. mItlhra’yImDaq tlho’an yotlhDaq ghu’vam lutu’ no’ma’.

verse #13

bIQ’a’ wav ‘ej chaHvaD luchIqmoH. bIQmey QammoH; Doj lurur.

verse #14

qaStaHvIS pem, DevmeH ‘eng lo’; qaStaHvIS ram, DevmeH qul wovmoHwI’ lo’.

verse #15

DebDaq naghmey rIv ‘ej chaHvaD tlhutlhmoH; bIQ jaQ rur.

verse #16

naghvo’ bIQtIqHommey ghoSmoH ‘ej bIQmey ghItmoH; bIQtIq’a’ rur.

verse #17

‘ach luqaDmeH yem chaH ‘ej yemqa’. DebDaq jenwI’’a’ luqaDmeH lotlh.

verse #18

Qun’a’ lutlhu’moH tIqDu’chaj ‘ej Soj luneHqu’bogh lupoQ.

verse #19

Qun’a’ lurIchHa’ ‘ej lujatlh: “DebDaq raS cherlaH’a’ Qun’a’?

verse #20

nagh mup; vaj ghIt bIQ ‘ej bI’ bIQtIqHom. ghotpu’vaD tIr ngogh, Ha’DIbaH joq noblaH’a’ je?”

verse #21

vaj QoyDI’ joH’a’, QeHqu’choH. ya’qovmo’ meQchoH qul; yISra’elmo’ ghur QeHDaj.

verse #22

qaS wanI’vam, Qun’a’ luHarbe’mo’ ‘ej toDbogh HoSDaj luvoqbe’mo’.

verse #23

‘ach chalmey ra’ ‘ej chal’a’ lojmItmey poSmoH.

verse #24

‘ej SopmeH chaHvaD man SISmoH ‘ej chaHvaD chal tIr nob.

verse #25

HoSDo’ tIr ngogh Sop loD; Soj law’ ngeH.

verse #26

chalDaq chan SuS qaSmoH ‘ej HoSDajmo’ tIng SuS qaSmoH.

verse #27

chaHvaD Ha’DIbaH SISmoH; Say’qIS rur. bo’Deghmey ngeH; bIQ’a’ Do’ol rur.

verse #28

raQchaj qoDDaq bIH pummoH. juH qachmeychaj Dech.

verse #29

Sop chaH ‘ej buy’choHchu’, chaHvaD chabalchaj nobmo’.

verse #30

‘ach yonchoHchu’pa’, nujDu’chajDaq ‘oHtaHvIS Soj,

verse #31

chaHmo’ QeHqu’choH Qun’a’ ‘ej HoSqu’wI’pu’ HoH ‘ej yISra’el loDpu’ Qup jey.

verse #32

‘ach yem ‘ej yemqa’ chaH. boqHarmeyDaj buSHa’ ‘ej HarQo’.

verse #33

vaj jajmeychaj ngabmoH; tlhuHHom rur. DISmeychaj ngabmoH lughIjqu’lu’taHvIS.

verse #34

chaH HoHDI’, ghaH lunej. DIS ‘ej tlhe’ ‘ej pe’vIl Qun’a’ lunej.

verse #35

naghchaj ghaH Qun’a’’e’ ‘e’ luqaw. toDwI’chaj ghaH Qun’a’ jenwI’’a’’e’.

verse #36

‘ach mu’mey qey jatlh nujDu’chaj; lunep jatDu’chaj.

verse #37

ghaHvaD ngaDbe’ tIqDu’chaj ‘ej mabDaj lupabbe’.

verse #38

‘ach vup ghaH. yemDI’ chaH, DIvHa’moHmeH vel ghaH ‘ej chaH Qaw’be’. pIj QeHDaj vuS ‘ej Qay’be’.

verse #39

‘oynot neH chaH ‘e’ qaw; juSbogh ‘ej cheghbe’bogh SuS lurur.

verse #40

pIj HatlhDaq lulotlh ‘ej DebDaq lunuQ!

verse #41

Qun’a’ lutlhu’moH ‘ej lutlhu’moHqa’. yISra’el quvwI’’a’ luSuj.

verse #42

ghopDaj luqawbe’. gholvo’ chaH toD; jajvetlh luqawbe’.

verse #43

mItlhra’yImDaq ta’mey Dun ta’; tlho’an yotlhDaq boqHarmey ta’.

verse #44

bIQtIqmeychajvaD ‘Iw mojmoH, vaj tlhutlhlaHbe’.

verse #45

ghIlab ghew ‘engmey ngeH; chaH natlh bIH. mabebmey ngeH ; chaH Qaw’ bIH.

verse #46

SupwI’ ghewvaD naH yotlhmeychaj nob. yobmeH vum chaH ‘ach Sop SupwI’ ghew.

verse #47

ghIrep naH yotlhmeychaj Qaw’meH muD Dotlh HeqmoH. naH Sormeychaj Qaw’meH muD Dotlh taDmoH.

verse #48

tangqa’meychaj HeghmoH Heqmo’ ‘ej DI’raqmeychaj HeghmoH tuDmo’.

verse #49

chaHDaq QeH’a’Daj, belHa’ghachDaj, SengDaj je lIch. Qaw’bogh HoSDo’ ngeH.

verse #50

QeHDajvaD taw chenmoH; Heghvo’ chaH Qanbe’ ‘ach rop’a’vaD yInchaj nob.

verse #51

mItlhra’yImDaq Hoch ghubDaQ mupchu’; Ham jo’ley’meyDaq HoSchaj wa’DIch mupchu’.

verse #52

ghIq ghotpu’Daj lup ‘ej DebDaq Dev; DI’raqmey rur.

verse #53

chaH Qan vaj ghIj pagh ‘ach jaghpu’chaj vIQmoH bIQ’a’.

verse #54

puHDaqj quvDaq chaH qem. HuDDaq’e’ je’bogh nIHDaj ghop qem.

verse #55

nughmey vuj ghaH; ghu’vam lutu’ chaH. puH lu’atmeH chaH, wav ghaH. yISra’el tuqmeyvaD jo’ley’meychaj DabmoH.

verse #56

‘ach Qun’a’ jenwI’’a’ lutlhu’moH ‘ej lulotlh ‘ej chutmeyDaj pabQo’.

verse #57

ghaHvo’ tlhe’ ‘ej matlhHa’; no’chaj rur. SIH; naQjejHom nuH Duy’ lurur.

verse #58

Daqmeychaj jenmo’ luQeHmoH; latmeychajmo’ lughalmoH.

verse #59

QoyDI’ Qun’a’, Qay’ ‘ej yISra’el woDchu’.

verse #60

SIloHDaq DabmeH Daq lon. Humanpu’ jojDaq jo’ley’Daj lanpu’; ghIq jo’ley’ lon.

verse #61

DerlIq’a’Daj jonlu’ ‘e’ chaw’; ghol ghopDaq ngay’Daj jeghlu’ ‘e’ chaw’.

verse #62

yanvaD ghotpu’Daj nob ‘ej quHDajDaq QeHDaj lIch.

verse #63

loDpu’chaj Qup natlh qul; tlhogh bom luHutlh be’pu’chaj Qup.

verse #64

yanmo’ pum maqleghpu’chaj. SaQlaHbe’ loDnal luweSbogh be’pu’’e’.

verse #65

ghIq vem joH’a’; ‘Iw tlhutlhpu’bogh SuvwI’ jachwI’’e’ rur.

verse #66

gholpu’Daj mup ‘ej Hochlogh chaH tuHmoH.

verse #67

yoSev jo’ley’ lajQo’; ‘evra’yIm tuq wIvbe’.

verse #68

‘ach yeHu’Da tuq wIv; tlhI’yon HuDvaD bangDaj Dam.

verse #69

DaqDaj quv mutlh; chal’a’ rur. reH tera’ chenmoHpu’bogh rur.

verse #70

DawID, toy’wI’Daj wIv ‘ej DI’raq pa’meyvo’ ghaH tlhap.

verse #71

tagha’Ha’ SoS DI’raq Qorgh DawID; ghIq ya’qov ghotpu’Daj, yISra’el quHDaj QorghmeH DawID wIv joH’a’.

verse #72

chaH QorghmeH tIgh QaQ pab ‘ej chaH DevmeH ghopDaj po’ lo’.

Chapters:

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 110 117 122