bommey

Chapters:

… 67 68 69 70 71 …   ⇤ ← 69 → ⇥

verse #1

QoQpInvaD bomvam qon DawID; Su’Sanmey lulo’lu’taHvIS [bomlu’].
HItoDneS, ‘o Qun’a’! yInwIj lubuQ bIQmey.

verse #2

DabqI’ jaQDaq jI’oq; pa’ leSmeH qam Daq tu’lu’be’; bIQ jaQ vIghoS ‘ej mubI’chu’ SoD.

verse #3

jIDoy’ jIjachtaHmo’; QaD HughwIj. pujchoH mInDu’wIj, Qun’a’wI’ vIloStaHmo’.

verse #4

mumuSmeH meq luHutlhbogh muSwI’pu’ law’ law’ jIbwIj law’ puS. HoSghaj muQaw’qangbogh ghotpu’; muHIvmeH nep. vInIHbe’pu’bogh Doch vInobHa’nIS?

verse #5

‘o Qun’a’, QaghwIj DaSov; jIyemDI’, SoHvo’ So’be’ wanI’vam.

verse #6

tuHbe’jaj loSwI’pu’lI’ jIHmo’, ‘o mangghom joH’a’, Qun’a’; quvHa’be’jaj nejwI’pu’lI’ jIHmo’, ‘o yISra’el Qun’a’.

verse #7

SoHmo’ vIvaqlu’pu’ ‘ej jItuHpu’; qabwIj velpu’.

verse #8

jIHvaD HujwI’ luDam loDnI’pu’wI’; jIHvaD nov luDam SoSwI’ puqloDpu’.

verse #9

juH qachlIjmo’ jInong; munatlhpu’ wanI’vam. DaH muvaq vaqwI’pu’lI’.

verse #10

jISaQDI’ ‘ej jISopQo’DI’ vIvaqchoHlu’.

verse #11

weSjech ghegh vItuQmoHDI’, jIHvaD mu’qaD luDamchoH.

verse #12

veng lojmItDaq murIch ba’wI’pu’ ‘ej mubopbogh bommey qon chechwI’pu’.

verse #13

‘ach jIH’e’, ‘o joH’a’, qatlhob. qaSDI’ poH mIt, ‘o Qun’a’, pung’a’lIj law’mo’ HIjangneS, vIt toDlIjmo’.

verse #14

DabqI’Daq jI’oqbe’meH HItoDneS; jaghpu’wI’vo’, bIQmey jaQvo’ je vIluplu’jaj.

verse #15

mubI’chu’be’jaj SoD ‘ej mughupbe’jaj bIQ’a’ ‘ej nujDaj SoQmoHbe’jaj mungaSbogh QemjIq’a’.

verse #16

HIjangneS, ‘o joH’a’, QaQmo’ pung’a’lIj; punglIj law’mo’ jIHDaq yItlhe’neS.

verse #17

toy’wI’lI’vo’ qablIj yISo’neSQo', jISotmo’; tugh HIjangneS.

verse #18

qa’wIjDaq yISumneS, HItoDneS; voHDajbo’wIj yIDIlneS jaghpu’wI’mo’!

verse #19

vIqunlu’ ‘e’ DaSov; jItuH ‘ej jIquvHa’ ‘e’ DaSov; Hoch gholpu’wI’ DaSov.

verse #20

vIqunlu’mo’ tIqwIj ghorlu’, vaj jIQIl. vupwI’ vInej ‘ach pagh tu’lu’. baw’moHwI’pu’ vInej ‘ach pagh vISam.

verse #21

tar munob; Soj qa’. jI’ojDI’ HIq wIb munob.

verse #22

jonmeH jan mojjaj raSchaj; vonmeH jan mojjaj chepDI’.

verse #23

HurghchoHjaj mInDu’chaj, vaj leghlaHbe’ ‘ej jeltaHjaj qoDchaj.

verse #24

chaHDaq belHa’ghachlIj yIlIchneS; chaH ‘uchjaj meQbogh QeHlIj.

verse #25

chImchoHjaj raQchaj; jo’ley’meychaj Dabjaj pagh.

verse #26

vay’ DamupDI’, vay’vetlh lutlha’. vay’ DarIQmoHDI’, vay’vetlh ‘oy’ lurIch.

verse #27

HeSmeychaj tIvI’moHneS ‘ej ruvlIj lughoSbe’jaj.

verse #28

yInwI’pu’ paqvo’ luteylu’jaj; quvwI’pu’ jojDaq qI’be’jaj.

verse #29

‘ach vIQeHlu’ ‘ej jI’oy’; muSalmoH toDlIj, ‘o Qun’a’!

verse #30

Qun’a’ pong vInaDmeH bom vIlo’; vIquvmoHmeH vItlho’.

verse #31

joH’a’vaD ta’vam qaq law’ pu’Du’, lemDu’ je ghajbogh tangqa’ qaq puS.

verse #32

ta’vam luleghDI’ nguqHa’wI’pu’, Quchqu’. Qun’a’ bonejchugh, tIqDu’raj lurIHqa’lu’jaj.

verse #33

Do’Ha’wI’pu’ Qoy joH’a’ ‘ej qama’pu’Daj muSbe’.

verse #34

lunaDjaj chal, puH, bIQ’a’, Hoch vIHwI’meyDaj je.

verse #35

tlhI’yon toD Qun’a’ ‘ej yeHu’Da vengmey mutlh ‘ej pa’ luDab ghotpu’ ‘ej lu’at.

verse #36

lu’at toy’wI’pu’Daj nortlhampu’ ‘ej luDab pongDaj muSHa’wI’pu’.

Chapters:

1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 51 52 53 54 55 56 57 58 59 60 61 62 63 64 65 66 67 68 69 70 71 72 73 74 75 76 77 78 79 80 81 82 83 84 85 86 87 88 89 90 91 92 93 94 95 96 97 98 99 110 117 122