chapter 2
Le efezushickone andyeloske iskirisarles:
Kade del duma kodo, kon le efta cherhajan inkrel ande pesko chacho vast, kon mashkar le efta somnakune memelyenge inkritora phirel:
Pinzharav tye kerdyimatan, tyo khinyardyipe haj tya pachako toleranshipe, haj ke chi kames le nasulen; ke avrizumadan kodalen, kon aposhtolenge phenen pen, ba naj kodal, haj xoxamnenge arakhlan len.
Pachako san, haj dukhardyilan anda muro anav, haj chi khinyilantar.
Ba dosh arakhlom ande tute: kodo, ke muklan tyo angluno kamipe.
Serosar apol pe kodo, kathar pelan avri, inker bezexbunuimata, haj ker kodo, so angla kado keresas: ke tena, atunchi opreushtyavav pe tute haj mishkisarav pa pesko than tye memelyake inkritoros, tena inkresa bezexbunuimata.
Ba kodo ande tute si, ke te rucis le nikolitenge trabi, so vi me rucisarav.
Kas si kan te ashunelles, so phenel o Duho la Eklezhiake: Le viktornisareske dav te xal pa trajosko kasht, so ande Devlesko paradajzo si!
La samirnaicka eklezhiake andyeloske iskirisarles:
Kade del duma o angluno haj o paluno, kon mulo sas haj trajil:
Pinzharav tyo kikidyipe haj tyo chorripe – ba chaches barvalo san –, haj kushen tut kodal, kon biboldenge phenen pen, apol naj kodala, ba le shatanoske zhinagogij.
Na dara khanchi kathar kodal, so dukharesa! Aketa o beng mashkar tumende unyizhenen ande robija shudela, avri te zumavel len, haj tumaro kikidyipe desh dyes inkrela. Av chacho zhikaj o meripe, haj tuke dav le trajoski korona.
Kas siles kan te ashunelles, so phenel o Duho la eklezhiake: Kon angluno avla, ande kodo chi kerel dosh o meripe!
La pergamonicka eklezhiake andyeloske iskirisarles:
Kade del duma kasko le duj rigako xanro si:
Zhanav, ke kaj beshes; kothe kaj le shatenesko kher si: haj avri inkres pasha muro anav, haj chi asvikardan tyo patyape inke chi ande kodal dyesa, kana o Antipas mure chachares, mure patyamnes mudardine mashkar tumende, kaj o shatano beshel.
Ba arakhlom ande tute vi unyi dosh, ke si kothe tute patyamne le Balameske sityarimaske, kon pe kodo sityarelas le Balakos, te xoxvel le Izraeleske shaven, ke anda sarkafimasle maseste te xan haj te marhinpe.
Kade vi tute si kasave, kon patyan le nikolitengo sityaripe.
Inker apol bezexbunuimata vi tu, ke tena atunchi sigo pe tute do, haj maroma kodolenca mure mujeske xanresa.
Kas si kan te ashunelles, so phenel o Duho la eklezhiake: le angluneske garadi manna dav haj jekh cino parno barr, po cino barr iskirisardines pale jekh nyevo anav, so khonyik chi pinzharel, numa kodo, kon lelles.
La tiatiricka eklezhiake andyeloske iskirisarles:
Kade del duma le Devlesko Shavo, kaske jakha kasave si sar e jag, haj leske punre cirden po galbeno xarkom:
Pinzharav tye kerdyimatan, tyo patyape, kamipe, slugipe haj pachako toleranshipe, haj tye palune trabi, save majbutindej kathar anglalutne.
Ba arakhlom ande tute jekh dosh, ke mukes la Jezabel romnyake, kon pes profetazhulyake phenel, te sityarel, haj peste te xoxavel mure slugan, ke te marhinpe haj te xan anda fetishongo sarkafimosaripe.
Vrama dom la te inkrel bezexbunuipe, ba chi kamel bezexbunuipe te inkrel pe pesko marhipe.
Aketa, ando pato peravav la, haj kon lasa ansuripe phagen opre, ando baro kikidyipe avna, kana chi inkrena bezexbunuipe anda penge trabi.
Lake shaven merimasa mudarav, haj zhanela sako eklezhia, ke me som le rinyikonge haj le ilonge perdal dikhari, haj potyino mashkar tumenge sakoneske, sar perelpe kathar lenge trabi.
Tumenge pale kodo phenav haj le majbutenge, kon ande Tiatira sanle, kon chi patyan kado sityaripe, haj kon chi pinzhardine le shatanoske milnomata, sar phenen: Chi shav pe tumende kaver pharipe!
Ba so si tumen, kaj kodo cirdadyon, zhikaj chi avotar!
Kon pale angluno avla haj inkrela mure trabi,
kodaleske saktimo dav pe populara,
ke sastruna rolyasa te lasharel kodalen,
haj te phagerdyontar, sar o mitticko vaso,
sar vi me lomles kathar muro Dad, haj leske dav le zorimaske cherhajes.
Kas si kan te ashunelles, so phenel o Duho la eklezhiange!
The software aims to connect everyone with the text of the Bible on a quickly accessible, customisable interface.
The name refers to both connectivity and speed…
“Let every man be swift to hear, slow to speak, and slow to anger!”
With love, Tom Károly