Janosheske viziovura

chapter 12


Chapters:


E romnyi haj o drako


verse #1

Atunchi baro somno dichosardyilas opre po cheri: jekh romnyi, kaske gada o kham sas, tala lake phunre o shonitiko, haj pe lako shero anda deshuduje cherhaja tordyilino korona.


verse #2

Apol ke phari sas, mashkar le dukha, kathar o arakhadyisaripe oprecipisarelas.


verse #3

Pala kodo jekh kaver somno dichilas opre po cheri: aketa, jekh baro, jaglolo drako, saves efta shere haj desh shinga sasles, haj pe leske efta shere efta krajicka koroni.


verse #4

Leski pori tele shiladas le chereske cherhajengo trito rigipe, haj pe phuv shiladas len. O drako angla phari romnyi tordyilas, ke kana kodi pe luma anel peske shaves, tele te nakhavel kodales.


verse #5

Kodi shaves andas pe luma, kon sasturna rolyasa lasharela le manushen. Ba line lake shaves haj kaj le Devlesko krajicko iskamin ingerdine les.


verse #6

E romnyi pale ande pusta nashlastar, kaj lako kathar o Del angle lashardo than sas, ke kothe te xaxaven la jekhmija haj dujshela thaj shovardesh dyes.


Le drakosko mardyipe


verse #7

Atunchi baro maripe kerdyilas ando cheri: o Mihaly haj leske andyela marenaspe le sapesa. O drako haj leske andyela marenaspe,


verse #8

ba chi viktornisajline, haj chi than nasle majdur ando cheri.


verse #9

Atunchi tele shudine le drakos, le majdulmutane sapes, kas bengeske haj shatanoske akharen, kon peste xoxavel la intregona luma. Tele shudine les pe phuv, haj lesa kethanes tele shudine vi leske andyelon.


verse #10

Atunchi baro glaso ashundom ando cheri, savo kade das duma:
„Akanak kerdyilas amare Devlesko muntoipe, e zor haj o krajipe,
o saktimo pale leske Kristoskoj, ke tele shudine amare phralenge doshares,
kon vi dyese haj vi ratyi dosh vazdelas pe lende angla amaro Del.


verse #11

Von pale tele mardine les,
perdal pa Bakresko rat haj pa chacharimasko alav,
haj chi sununas chi pengo trajo zhikaj o meripe.


verse #12

Losshan apol cherale, haj kon ande lende beshen!
Jaj la phuvake haj la marake, ke tumende hurajlas tele o beng bara xolyasa, haj zhanel, ke cerra vrama siles!”


Le drakosko maripe la romnyasa


verse #13

Kana o drako dikhlas, ke tele shudine les pe phuv, nashavelas la romnya, kon shaves andas pe luma.


verse #14

Atunchi e romnyi duj bare akvilnikane phaka las, ke ande pusta te hural pe pesko than, ke kothe te xaxaven la jekh vrama, haj vrami haj dopash vrama, dur kathar o sap.


verse #15

Atunchi o sap kattyi but paji phurdas avri anda pesko muj pala e romnyi, sar jekh ab, te shilavella le abesa.


verse #16

Ba e phuv zhutisardas la romnyake, avriputerdas pesko muj haj nakhadas le abes, so o drako phurdas avri anda pesko muj.


verse #17

Atunchi o sap oprexolyajlas pe romnyi, haj gelastar, te marelpe kodalenca, kon anda romnyako falo si, kon andre inkren le Devleske vladimata, haj kaste le Jezushesko chacharipe si.


verse #18

Pala kodo tordyilas pe maraki dolma.

Chapters:


Books